Read Saluan 1 PETRUS 3 Bible Online

1 PETRUS 3 - Saluan bible

1 PETRUS 3

¹ Sumo aitumo suele na komiu, to bengke-bengkele' tionyo ahi' obatuki na pongka'oho' nu langkai' nu belemiu, da aha de daagi' ko anu madi' palesaya i lele lengkat mae hi Tumpu, kalakuan nu belemiu na mompotimbali aha da palesaya. Ka' madi' pilenje belemiu montaloakon apa-apaa hi aha,

²kalana aha montoamo kalakuan miu anu sahondo-hondonyo ka' anu palesayamo totu-totu'u.

³ Boli belemiu handa ola handa i sambiha'nyo, sumo lapangnyo mombunga-bungai ubak, kabai mompake mainan, kabai mibaju' nu anu toto maha-mahan.

⁴Panyo belemiu handa tionyo ahi' molengkat mae i uno nu kinyonyoa, kalakuan anu tobos ka' madi' solaa' hengge'; aijo' ahi' na handa anu sampe toka sidu-sidutu' ka' anu talalo ko angga'nyo i pontoan nu Tumpu.

⁵Tiba jalan aiya tempo'nyo naipuan mae to bou-boune anu ko agamamo anu taha'imanmo hi Tumpu nompohandamo butongnyo tiba jalan nontulutimo pongka'oho' nu langkai' nu aha.

⁶ I Sara mule' sumo aijo', ia tulu-tulutan hi Abraham ka' monsanggohi ia tuannyo. Kita utus tempo' uuka to ana-anakmo i Sara, de belemiu nombaumo hahan anu ma'ima' ka' madi' mabuhuk hi mau mule' pa' apaa.

⁷ Ka' komiu mule' suele to langka-langkai' nu mian, tionyo ahi' tumuu' mangalati' totu-totu'u hi bengkele' miu, ka' sinsumbu' saba' aha atina' mian anu madi' mahoson, o adati na mongatun aha, kalana aha mohingga-hinggat tiba belemiu montalimaje balakat kantumuu'an anu mingkaliangan lengkat mae hi Tumpu. Obau na aiya, da belemiu timbali balado'a.

⁸Isinyo aijo'mo: Oposa'angu' ahi' to Utu-utus na tanga'an ka' kinyonyoa. Pompaha kali-kalibosi ahi' sumo to mia-mian anu moto utus. Ka' mompaha kano-kanonongi ahi', ka' mintabiat madi' montige-tige.

⁹Boli mombalosi ka'idekan tiba ka'idekan, kabai monguda-udahi tiba monguda-udahi; panyo ola ahi' obalosi nu momoitakon balakat hi Tumpu. Kalana Tumpu nolagamo belemiu, ko kahanda'nyo da belemiu mohumpak balakat hi Ia.

¹⁰ I uno nu Kitab nu Tumpu tinulismo sumo uuka, “Mian anu mongka'oho' mongoa'i kantumuu'an ka' mongka'oho' mongoa'i iwi-iwi' na sinaa anu ma'ima', nganga'nyo o jagai ahi' da boli lewa' monsisik hahan anu ma'idek, ka' madi' montaeakon hahan anu baleko'.

¹¹Ia tionyo ahi' mompimpali anu ma'idek ka' mombau anu ma'ima'; bala usaha ahi' totu-totu'u na ia da mohumpak paladamean.

¹²Kalana Tumpu saja' monginau' to mia-mian anu montuluti pongka'oho'-Nyo; ka' Tumpu saja' mohongo iwi-iwi' do'a nu aha; panyo Tumpu mongewa to mia-mian anu mombau ka'idekan.”

¹³Ihe na mongka'oho' mombau anu ma'idek hi belemiu, de belemiu sanang na mombau anu ma'ima'?

¹⁴ Panyo mau mule' belemiu tionyo ahi' mongoa'i kasansala'an kalana mombau hahan anu ma'ima', komiu mohumpak dale'! Boli mabuhuk mau pa' hi he, ka' boli bata-bata.

¹⁵Panyo i uno nu kinyonyoa miu, tionyo ahi' belemiu mongadati i Kristus anu samata-mata opotoka hi Ia, anu sitimbang tiba kakuasa'an-Nyo salaku Tumpu. Ka' tionyo ahi' belemiu saja' mosadia bau potaam hi batu-batu mian anu mompokilawa mongkona anu otaha'imani nu belemiu, anu itina'mo hi belemiu.

¹⁶Panyo obau ahi' na aijo' nu ima' ka' mingadat. Ka' kinyonyoa komiu opohodi' ahi', da de belemiu opitana'i kalana belemiu tumuu' ma'ima' salaku anu mombatuki i Kristus, saba' mian anu mompitana'i aijo' timbali mosi pa'ambangje.

¹⁷Sahanyo mongoa'i kasansala'an kalana mombau anu ma'ima' — de aijo' pongka'oho'mo nu Tumpu — ka' de mule' mongoa'i kasansala'an kalana mombau anu ma'idek.

¹⁸Kalana i Kristus sinilaka ola minsan sampe toka sidu-sidutu' kalana dosa' nu manusia — samian anu madi' ko sala'nyo sinilaka kalana monsawani mian anu ko sala'nyo. I Kristus nombau sumo aijo' da Ia timbali molaya' belemiu toka hi Tumpu. Ia sinilakan ola butongnyo biasa, panyo po'ule' pinotumuu' nimbutongmo nu rohani.

¹⁹I uno nu Ia sumo Roh Ia nambamo nompolele, lele lengkat mae hi Tumpu toka hi to roh-roh anu tinalungku'mo:

²⁰ aijo'mo roh nu to mia-mian anu madi' tulu-tulutan hi Tumpu Allah tempo'nyo daagi' i Nuh. Tempo'nyo aijo' Tumpu sinabaan na nontanda'i sampe i Nuh noko baumo kapannyo. Ola to mia-mian anu i uno nu kapan — iwi-iwi' uwalu' na mian — anu pinosalamat madi' sinilakan nu iaba' pasawe' daka' aijo'.

²¹Jadi, anu tinimbali aijo' susumo ibalatnyo palamandian anu tempo' uuka aiya momposalamat belemiu. Palamandian aijo' misa' sa'angu' na jalan mompolomas butong songko-songko anu kudulon, panyo salaku janji' miu hi Tumpu lengkat i kinyonyoa anu ma'ima'. Palamandian aijo' momposalamat belemiu kalana i Yesus Kristus sinilaka po'ule'mo pinotumuu',

²²ka' noliba'mo i suluga'. Uuka aiya Ia mongkuasaimo hingga-hinggat tiba Tumpu ka' mompalentahmo malaikat iwi-iwi', iwi-iwi' anu ko kuasanyo tiba iwi-iwi' na anu mahoson.