Read Saluan 1 PETRUS 5 Bible Online

1 PETRUS 5 - Saluan bible

1 PETRUS 5

¹Ku poita da okalesang hondo-hondo nu to pola-polaya' nu jama'at miu. Aku nontulis aiya salaku sangalu bubuu' polaya' ka' salaku mian anu nonsakisimo kasansala'an anu ingoa'anmo i Kristus, ka' anu saidi' mae suele opopodaka', de maluannyo katalasanggoan i Kristus opotoamo hi manusia. Ku poita sabole-bole,

² da belemiu molaya' tompukan nu domba anu pinalesayakonmo nu Tumpu hi belemiu. Oposanang na kinyonyoa de molaya' aha susumo anu nukahanda'i nu Tumpu, ka' boli maboat na kinyonyoa. Boli mule' belemiu mokalaja kahanda' da mohumpak dale', panyo kalana komiu totu-totu'u mongka'oho' mongkalesang.

³Boli mompalentah sumo anu mongkuasai aha anu pinalesayakonmo hi komiu, panyo timbali ahi' sonto' hi aha.

⁴Ka' de saidi' mae Polaya' Anu Talasanggo aijo' tokamo mae, komiu mohumpakmo makota anu jongkilaban, anu madi' toho' mingkot na jongkilabannyo.

⁵ Sumo aitumo na kita Utus, to oli-olitau ka' to lalangkoyang. Tulu-tulutan hi to mia-mian anu motu'amo. Kita Utus iwi-iwi' boli ko tige-tige ka' mompaha kale-kalesang ahi', boli kobubuun na kinyonyoa. Kalana i uno nu Kitab nu Tumpu tinulismo sumo uuka, “Tumpu mongewa mian anu buulon, panyo mongkalibosi mian anu madi' ko tige-tige.”

⁶ Kalana aitu, pati'alukakon na butong nu belemiu i aluk nu lima nu Tumpu anu maho-mahoson, da Nu hangkat na belemiu de tokamo na tempo'nyo.

⁷Sampa' o'asanakon iwi-iwi' hi Tumpu na anu ma'isa talalo matantu i uno nu kinyonyoa nu belemiu, kalana Ia na mongkalesang komiu.

⁸Balajaga-jaga ahi' na komiu ka' mosadia! Kalana Ibilis atina'mo na sampo bali' miu. Ia sumo singa lumajang mokiijo', mo'uuka, ka' molohuu' molio kaanonnyo.

⁹O'ewa na ia nu iman anu totu-totu'u, kalana sinumbu'mo nu belemiu to Utu-utus sangko Kristen sangga'at i songko-songko na dunia singkona nongoa'imo kasansala'an sumo komiu.

¹⁰Panyo salatan lapasmo na komiu mongoa'i kasansala'an, Tumpu Allah na saidi' mae mompotimbali belemiu talakana'. Ia na mompotinjo ka' mompohoson belemiu ka' mule' mompotantu belemiu. Kalana Iamo na Tumpu anu manonong hondo, anu nolagamo belemiu da suele mongoa'i katalasanggoan-Nyo anu sampe toka sidu-sidutu' kalana i Kristus.

¹¹Iamo na anu mongkuasai sampe toka sidu-sidutu'! Amin.

¹² Sulatku anu ola kodo-kodo' aiya tinulisku toka hi belemiu tinulungan i Silas, anu ku anggap samian na utus Kristen, anu mohongo-hongo. Aku kahanda' mongkakeha' belemiu, ka' mompohoson kinyonyoa nu belemiu, kalana apaa na anu tinuliskumo aiya lele anu totu'u aijo'mo balakat nu Tumpu. Opai-pai lio da komiu mintoong ahi' hoso-hoson i balakat aijo'.

¹³ To sanga-sangalu jama'at kiijo' mae i Babilon, anu suele pinile'anmo nu Tumpu, nompakatu mae salan do'a hi belemiu; sumo aitu mule' anakku i Markus anu kuku kanonongi.

¹⁴Mompaha sala-salan do'ai samian ka' samian totu-totu'u nu kalibosan salaku tanda poto utusan nu mian Kristen. O'amalakon da Tumpu mombee'i mae kabilahian hi kita Utus iwi-iwi' anu i Kristusmo na tumpu-Nyo. Tabea' mami, I Petrus 14