Read Saluan 2 PETRUS 3 Bible Online

2 PETRUS 3 - Saluan bible

2 PETRUS 3

¹To utu-utusku anu okanonongi! Aiyamo na sulatku anu ko ohua'nyo toka hi belemiu. I uno nu sulat ko ohua'nyo aiya, aku kahanda' mompolubat pikilan-pikilan anu ma'ima' hi belemiu.

²Ku poto'i da belemiu monginau' iwi-iwi' na potatae anu naipuan mae tinaloakonmo nu to nabi-nabi nu Tumpu, ka' palentah suele lengkat mae hi Tumpu, Tomundo anu Momposalamat, anu pinotokamo hi belemiu nu to rasul-rasul.

³ Momonanyo belemiu tionyo ahi' monsumbu' saba' sinaa anu i mihinyo mae, tokamo na to mia-mian anu kantumuu'annyo kinuasanmo nu napisu nu aha. Aha na saidi' mae monjojoamo belemiu

⁴nu potatae sumo uuka, “Tukoonyo Tumpu nonjanji'mo toka! Uuka iya na Ia? To tutuuma mompolee'to sinilakamo, panyo iwi-iwi na apa-apaa daagi' ahi' pokakana sumo salatanmo pe'e dunia pinotimbali!”

⁵ Aha memang madi' mongka'oho' mongakui tempo'nyo naipuan mae Tumpu nompodaagi'mo langit ka' tano' ola kalana kuasa nu potatae-Nyo. Tano', uee na pinolengkatan-Nyo, ka' tiba uee;

⁶ ka' tiba uee mule' — aijo'mo uee nu iaba' pasawe' daka' — dunia tempo'nyo naipuan mae aijo' ingidean.

⁷Panyo langit ka' tano' anu daagi' tempo' uuka aiya, potatae nu Tumpu suele na mompotuu', ka' mule' da opatei nu apu saidi' mae. Tempo' uuka langit ka' tano' daagi' opotuu' sampeje de tokamo na sinaanyo to mia-mian anu ma'idek o hukummo ka' opateimo.

⁸ Panyo to utu-utusku, sa'angu' na han aiya boli okolilimi nu belemiu: kalana hi Tumpu sansinaa madi' mosi sangalasan tiba samadala na taun — ohu-ohua' aijo' pokakana de hi Ia.

⁹Tumpu madi' lat na mombee' apaa na anu jinanji'-Nyomo, mau mule' daagi' ko anu monsangka sumo aijo'. Panyo mule' ahi', Ia sabaan hi belemiu, kalana Ia madi' mongka'oho' ko anu obinasai mau ola samian. Ia mongkahanda'i da iwi-iwi' na mian bolimo mombau to dosa-dosa'nyo.

¹⁰ Panyo Sinaa katokaan nu Tumpu, toka sumo mian tomang. I Sinaa aijo', langit ma'idekmo sahingga lewa'mo poli-polintup sumo gohung, ka' to apa-apaa aita' i langit mingkotmo motoyo', ka' tano' tiba iwi-iwi na anu i unonyo ma'idekmo.

¹¹Kalana iwi-iwi' aijo' o ideimo nu jalan anu sumo aijo', jadi mosia na belemiu tumuu'? Komiu tionyo ahi' tumuu' susi' ka' samata-mata mombau pongka'oho' nu Tumpu,

¹²hau-haunyo komiu montanda'i ka' mongindi Sinaa katokaanmo nu Tumpu. I Sinaa aijo' langit motoyo'mo iwi-iwi', ka' kalana panasnyo sahingga apa-apaa na anu aita' i langit moe'mo sumo uee.

¹³ Panyo kita montanda'imo apaa na anu jinanji'mo nu Tumpu Allah, aijo'mo langit anu bu'ou ka' tano' anu bu'ou, anu daagi'mo ko ka'adilan-Nyo.

¹⁴Kalana aijo', to utu-utus anu okanonongi, hau-haunyo belemiu montanda'imo Sinaa aijo', bala usaha totu-totu'u da tumuu' susi' ka' madi' ko alunyo i ahop nu Tumpu. Ka' opokopiani ima-ima' na pompahasumbu'an tiba Tumpu.

¹⁵Ka' tionyo ahi' o'akui na kasabalan nu Tumpu saba' sumomo tempo' anu ma'ima' anu binee'-Nyomo hi belemiu da timbali salamat. I Paulus, utusto anu oka-okanonongi, nontulismo suele sumo aijo' anu pinakatunyomo hi belemiu. Tumpu na nombee'i ia kapandean nontulis aijo'.

¹⁶I uno nu sulatnyo iwi-iwi', i Paulus saja' nontulis mongkona han aijo'. Memang daagi' ko to pia-piangkuka na han, na anu mahan na opangalati'i i uno nu sulatnyo haha aijo'. Ka' hanmo aijo' na gineo-geo'akonmo nu to mia-mian anu madi' ko anu nu pisumbu-sumbu' ka' anu madi' mahoson na imannyo. Han aijo' madi'mo okabangangi, kalana bahagian haha aijo' sangga'at i Kitab nu Tumpu nubau suele nu aha sumo aijo'. Apaa na anu binaumo nu aha aijo' ola monsaduakon posi kapatean nu butong nu aha.

¹⁷Panyo belemiu, to utu-utus anu okanonongi, nonsumbu'mo han aijo'. Kalana aijo', obala'ingati boli sampe belemiu mombatukimo kasala'an nu to mia-mian anu palaganta sahingga belemiu manabu'mo ka' madi'mo manintinjo i tampat miu aijo' anu mahoson hondo.

¹⁸Tionyo ahi' belemiu lebemo mongoa'i balakat i Yesus Kristus, Tumpu ka' Tomundo anu Momposalamat kita, ka' tionyo ahi' belemiu lebemo mule' monsumbu' Ia. O puji' na Ia, uuka aiya ka' sampe toka sidu-sidutu'! Amin. Tabea' mami, I Petrus 9