Read Saluan 1 YOHANES 2 Bible Online

1 YOHANES 2 - Saluan bible

1 YOHANES 2

¹To ana-anakku! Aku nontulis aiya toka hi komiu da komiu boli mombau dosa'. Panyo de ko anu mombau dosa', saba' hi kita daagi' ko samian na anu mombolosakon, aijo'mo i Yesus Kristus anu talalo adin hondo aijo'; Iaje na mompoitakon ka'ampunan dosa' hi Tuuma.

²I Yesus Kristus na mombolosakon da iwi-iwi' na dosa'to o ampuni. Ka' misa' ola dosa'to panyo suele tiba dosa' nu iwi-iwi' mian.

³De kita tulu-tulutan hi iwi-iwi' na palentah nu Tumpu, aijo'mo na tandanyo taalu' kita nonsumbu'mo Tumpu.

⁴Mian anu motatae, “Aku monsumbu' Tumpu,” panyo madi' tulu-tulutan hi iwi-iwi' na palentah-Nyo, mian aijo' baleko', ka' Tumpu madi' ko anu i uno nu kinyonyoanyo.

⁵Panyo mian anu tulu-tulutan i potatae nu Tumpu, mian aijo' mongkalibosi Tumpu totu-totu'u. Aijo'mo na tandanyo taalu' kita tumuu' nosa'angu'mo tiba Tumpu.

⁶De ihe na motatae tukoonyo ia tumuu' nosa'angu'mo tiba Tumpu, ia tionyo ahi' tumuu' mombatuki lawo i Kristus.

⁷ To Utu-utus anu okanonongi! Anu ku tulis aiya misa' sa'angu' na palentah anu sala'je. Aiya palentah anu pininmo anu pinotokamo hi belemiu salatanmo pe'e komiu nontampu'unimo pinalesaya hi Kristus; aijo'mo lele anu lengkat mae hi Tumpu Allah anu noko hongomo miu momonanyo.

⁸Mau mule' sumo aijo', palentah anu tinuliskumo aiya suele ahi' sala'je, kalana katotu'uannyo timbalimo otoa hi butong i Kristus ka' hi butong miu. Kalana kapintungan ko lapu-lapusnyomo ka' jingka anu totu'u momtampu'unimo majingka.

⁹Mian anu motatae tukoonyo ia kiijo'mo i uno nu jingka, panyo mian aijo' daagi' mongka'ideki utusnyo, mian aijo' daagi' i uno nu kapintungan sampe tempo' uuka aiya.

¹⁰Mian anu mongkalibosi utusnyo, tumuu'mo i uno nu jingka, sahingga madi'mo ko sa'angu' pe'e hi ia na anu monsaduakon mian sangga'at manabu' i uno nu dosa'.

¹¹Panyo mian anu mongka'ideki utusnyo, daagi' i uno nu kapintungan. Ia lumajang i uno nu kapintungan, ka' madi' nu sumbu' pa' moya na kalambanannyo, kalana kapintungan aijo' sahingga ia madi' moko ala montoa.

¹²Aku nontulismo toka hi belemiu, to Ana-anak, kalana dosa' miu ingampunanmo, aijo' ola kalana i Kristus.

¹³Aku nontulismo toka hi belemiu to Tutuuma, kalana komiu nonsumbu'mo Ia anu polo-polo'mo daagi' salatanmo pe'e i momonanyo. Aku nontulismo toka hi belemiu, to Oli-olitau kalana komiu nohungku'imo, Anu Ma'idek.

¹⁴Aku nontulismo toka hi belemiu, to Ana-anak kalana komiu nonsumbu'mo Tumpu Tuuma. Aku nontulismo toka hi belemiu to Tutuuma, kalana komiu nonsumbu'mo Potatae nu Tumpu anu polo-polo'mo daagi' salatanmo pe'e i momonanyo. Aku nontulismo toka hi komiu to Oli-olitau, kalana komiu mahoson. Potatae nu Tumpu Allah itina' i uno nu kinyonyoa miu, ka' komiu nohungku'imo Anu Ma'idek.

¹⁵Boli mongka'ima'i dunia aiya, kabai mau mule' pa' apaa na anu i uno nu dunia aiya. De komiu mongka'ima'imo dunia, komiu madi'mo mongka'ima'i Tuuma.

¹⁶Iwi-iwi na apaa anu daagi' i uno nu dunia aiya — anu nuka'ima'i nu kalakuan nu mian baladosa', anu otoa lantas oka'ima'imo ka' anu okabubuulakon — iwi-iwi' anu madi' nolengkat mae hi Tuuma, panyo nolengkat mae i dunia.

¹⁷Dunia ka' iwi-iwi na apaa anu i unonyo anu nuka'ima'i nu mian, hau-haunyomo lanyap. Panyo mian anu tulu-tulutan i pongka'oho' nu Tumpu tataap tumuu' sampe toka sidu-sidutu'.

¹⁸To ana-anakku, kakiamatan ohanimo! Pinoko poto'imo hi komiu i momonanyo tukoonyo Sampo Bali' i Kristus tokamo saidi' mae; ka' tempo' uuka aiya i lubatmo da'isan na mian anu monsampo bali' i Kristus. Aijo'mo na tandanyo saba' kakiamatan malia'mo toka.

¹⁹Anu monsampo Bali' i Kristus aijo', atina'mo to mia-mian anu nompala'imo kita, kalana aha memang misa' to mia-mian gampanto. De aha to mia-mian gampanto, tantu aha tataap hi kita. Panyo aha nompala'imo kita, da manasa saba' madi' ko samian pe'e anu aijo' hi aha na totu-totu'u tonsoop timbali gampanto.

²⁰Panyo komiu nohumpakmo Roh nu Tumpu anu i lambe'akonmo i Yesus Kristus ka' mokonyo aijo' komiu iwi-iwi' nonsumbu'mo pangajalan anu totu'u.

²¹Jadi aku nontulis aiya toka hi belemiu misa' kalana komiu madi' monsumbu' pangajalan anu totu'u, panyo kalana komiu nonsumbu'mo, ka' komiu mule' nonsumbu'mo saba' madi' ko leko'nyo i uno nu pangajalan anu totu'u aijo'.

²²Anu baleko' atina'mo mian anu motataemo tukoonyo i Yesus misa' Tomundo anu Momposalamat anu Jinanji'mo nu Tumpu. Mian aijo' Sampo Bali' i Kristus; ia madi' mongakui Tuuma kabai Anak.

²³Mian anu madi' mongakui Anak, alati'nyo madi' montalima Tuuma mule'. Ka' mian anu mongakui Anak, alati'nyo montalima Tuuma suele.

²⁴Kalana aijo', lele anu i hongomo miu salatanmo pe'e momonanyo komiu pinalesayamo tionyo ahi' o toongi miu ma'i-ma'ima' i uno nu kinyonyoa. De lele aijo' o toongimo miu ma'i-ma'ima', komiu saja'mo tumuu' mosa'angu' tiba Anak ka' tiba Tuuma.

²⁵Ka' aiyamo na anu jinanji'mo i Kristus hi kita: Tumuu' kopian ka' sampe toka sidu-sidutu'.

²⁶Aku nontulismo aiya toka hi belemiu kona hi to mia-mian anu hau-haunyo ko kahanda'mo mongakali komiu.

²⁷Panyo kona hi posi komiu, i Kristus nolambe'akonmo Roh-Nyo hi komiu. Ka' de Roh-Nyo daagi'mo itina' hi komiu, madi'mo palalu ko mian sangga'at mompogulu' komiu. Kalana Roh-Nyomo na mompogulu' komiu mongkona iwi-iwi' na han; ka' apaa na anu pinogulu'akon-Nyomo aijo' totu'u, madi' baleko'. Kalana aijo' komiu tionyo ahi' tulu-tulutan hi apaa na anu pinogulu'mo nu Roh aijo', ka' tionyo ahi' komiu saja' tumuu' mosa'angu' tiba i Kristus.

²⁸Jadi to ana-anakku, saja' ahi' tumuu' mosa'angu' tiba i Kristus, da saidi' mae de tempo'nyomo Ia toka, kita buke-buke' nu kabaanian na mangadap hi Ia, ka' madi' maninsuluk kalana ma'ambang.

²⁹Komiu nonsumbu'mo taalu' i Kristus titumuu'mo tulu-tulutan i pongka'oho' nu Tumpu. Kalana aijo' komiu tionyo ahi' monsumbu' suele saba' batu-batu mian anu tumuu'mo tulu-tulutan i pongka'oho' nu Tumpu, atina' anakmo nu Tumpu.