Read Saluan TO MIA-MIAN KOPIAN 10 Bible Online

TO MIA-MIAN KOPIAN 10 - Saluan bible

TO MIA-MIAN KOPIAN 10

¹Salatan i Abimelekh sinilakamo, i Tola anak i Pua, tinimbalimo polaya' da mompobebasmo aha mian nu Israel. Ia aijo' makumpu i Dodo tulunan mae nu bansa Isakhar. Ia jinojoong kiijo' i Samir i da'erah bungkutnyo nu Efraim.

²Ia tinimbali polaya' nu aha mian Israel inguampulu' ka' totolu' na taun na kinopinnyo, lapas aijo' ia sinilakamo ka' i lamunmo kiijo' i Samir.

³Ilapas na i Tola, i Yairmo na tinimbali polaya' inguampulu' ka' ohua' na taun na kinopinnyo. I Yair nolengkat mae i Gilead.

⁴Anaknyo mo'ane aha tolumpulu'. Aha ko keledai tolumpulu' bau kasake'an ka' tolumpulu' na kampung i da'erah nu Gilead. Kampung haha aijo' daagi' osanggohi kampung Yair.

⁵I Yair suele sinilakamo ka' i lamunmo kiijo' i Kamon.

⁶Aha mian nu Israel po'ule' mule' binaladosa' hi Tumpu. Aha madi'mo mongkalinga Tumpu ka' madi'mo daagi' nonsombah Ia. Aha nonsombahmo to pilo-pilogot nu bansa Siria, Sidon, Moab, Amon tiba Filistin.

⁷Kalana aijo' Tumpu nontambuha'imo aha mian nu Israel, sahingga pinojohok-Nyomo na bansa Filistin tiba bansa Amon nongkuasaimo aha.

⁸Sampulu' ka' ualu' na taun na kinopinnyo na bansa anu ohua' aijo' nonsansala aha iwi-iwi' mian nu Israel anu jojoong i Gilead, aijo'mo da'erah nu Amori sasu kabete'an i Kaunyo nu Yordan. Aha nompalentah mian nu Israel nasigo hondo.

⁹Ka' mule' mian nu Amon notaapmo i Kaunyo nu Yordan mamba mompahampateakon aha tulunan nu bansa Yehuda, Benyamin, tiba Efraim, sahingga mian nu Israel sinansalamo hondo.

¹⁰Sahingga mian nu Israel nomoitamo tulung hi Tumpu, koonyo nu aha, “Kami binaladosa'mo hi belento, kalana kami madi'mo nontapali belento, O Tumpu Allah mami. Kami nonsombahmo to pilo-pilogot nu Baal.”

¹¹Tinaaman nu Tumpu, “U'utu mae belemiu pinalentahmo nu bansa Mesir, Amori, Amon, Filistin, Sidon, Amalek tiba bansa Moab. Lantas tempo'nyo aijo' te misa' belemiu nomoitamo tulung hi beleng-Ku? Soba potutugakon, pa' Aku madi' nomposalamat belemiu da boli nukuasai nu aha?

¹³Maumo sumo aijo', belemiu ola ahi' nompaka hiku Aku, lantas nambamo nonsombah to pilo-pilogot. Uuka aiya Aku madi'mo mongka'oho' mompobebas belemiu.

¹⁴Lako'mo hi to pilo-pilogot anu pinile'anmo nu belemiu aijo'. Pomoitamo tulung hi aha! Ahaje na montulungi de belemiu i unomo nu kasusa'an.”

¹⁵Panyo aha mian nu Israel notatae hi Tumpu, “Kami binaladosa'mo, Tumpu. Baumo pa' apaa na anu okahanda'i nu belento, asan belento montulungi mae kami sinaa aiya.”

¹⁶Lapas aijo' ingalinmo nu aha iwi-iwi' na patong bapilogotan, lantas nonsombahmo Tumpu Allah. Sahingga Tumpu Allah nolibosmo na nontoa aha i uno nu kasansala'an aijo'.

¹⁷Tempo'nyo aijo' suludadu nu aha Amon hau-haunyomo mogogau mahampate. Aha binakemahmo i Gilead. Mian nu Israel suele sinilimu'mo ka' binakemahmo i Gilead.

¹⁸Ikiijo' mae mian da'isan tiba to pola-polaya' nu aha tulunan nu bansa Israel nompaha poki-pokilawamo pa' ihe na anu aijo' hi aha baani montoongi pimuhuk bau pahampate mongewa bansa Amon. Mian aijo' opotimbalije polaya' nu aha mian iwi-iwi' anu jojoong i Gilead.