Read Saluan TO MIA-MIAN KOPIAN 11 Bible Online

TO MIA-MIAN KOPIAN 11 - Saluan bible

TO MIA-MIAN KOPIAN 11

¹I Yefta samian na suludadu anu baani hondo. Ia jojoong i Gilead. Sanggo nu tuumanyo i Gilead, panyo tinanyo mian anu saja' masala'.

²Tuumanyo aijo' suele ko to ana-anaknyo mo'ane sangga'at hi bengkele'nyo anu i nika'annyo ima-ima'. Salatan to ana-anaknyo haha aijo' ingumolitaumo i laa'mo nu aha na i Yefta da bolimo jojoong i laigan. Koonyo nu aha hi ia, “Beleyum madi' mohumpak pusaka' apa-apaa lengkat mae hi tuuma mami, kalana beleyum anak nu boune sangga'at.”

³Kalana aitu i Yefta nompala'imo to utu-utusnyo lantas nambamo jinojoong i da'erah Tob. Ikiijo' mae daagi' ko sa'angu' na gombuan nu mian anu lewa' mombau anu ma'idek nosa'angu'mo tiba ia lantas aha nambamo lewa' batoma-tomang.

⁴Manga-manga mian nu Israel tinumbuhanmo nu aha mian Amon.

⁵Salatan han aijo' sinidamo to pola-polaya' nu Israel anu kiijo' i Gilead nambamo nonsale'i i Yefta da opala'imo mae na da'erah Tob.

⁶Aha notatae, “Laya' mae na kami da mongewamo aha mian nu Amon.”

⁷Panyo tinaaman i Yefta, “Te misa' belemiu talalomo hondo na nongka'ideki aku? Belemiu nolaa'mo aku da bolimo jojoong i laigan nu tuumangku. Kadaka' uuka aiya salatan belemiu i unomo nu kasusa'an, belemiu tokaje mae hi belengku?”

⁸Tinaman nu aha, “Kami toka mae kalana kami mongkahanda'i da beleyum na bau polaya' iwi-iwi na mian nu Gilead da mompatundu'i bansa Amon uuka aiya.”

⁹I Yefta nontaami, “De belemiu monsale'imo aku da minsusule'mo i Gilead da mompahampateakon bansa Amon ka' Tumpu mombee'i ka'untungan mahampate hi kita, akumo na anu timbali mongkuasai belemiu.”

¹⁰Tinaaman nu aha, “Kami mongka'oho'mo. Tumpu na timbali sakisi.”

¹¹Sahingga nambamo na i Yefta hingga-hinggat tiba to pola-polaya' nu aha Gilead. Lapas aijo' mian anu jojoong i Gilead nohangkatmo ia da mongkuasai ka' bau polaya'. Ka' i ahop nu Tumpu kiijo' i Mizpa, i Yefta nompoto'imo poitaonnyo hi aha mian nu Gilead.

¹²Lapas aijo' i Yefta nonsaimo mian namba hi tomundo nu aha Amon da mompoto'i sumo uuka, “Apaa na kasala'an mami sahingga belemiu mompahampateakonmo lipu' mami?”

¹³Tomundo nu bansa Amon nontaamimo anu sinai mae haha aijo', “Salatan mian nu Israel tinokamo lengkat mae i Mesir aha nongalamo tano' mami, lengkat pe'e mae i Kaunyo nu Arnon toka-toka nokiijo' i Kaunyo nu Yabok tiba Kaunyo nu Yordan. Uuka aiya sule'akonmo mae na aijo' da bolimo bau pahantuda'an.”

¹⁴Lantas po'ule' mule' sinai i Yefta na to mia-mian namba hi tomundo nu Amon.

¹⁵Bau pontaami sumo uuka, “Mian nu Israel madi' hondo-hondo mongagoi tano' nu mian Moab kabai tano' nu mian Amon.

¹⁶Salatan mian nu Israel nompala'imo mae Mesir aha nokiijo'mo i luoknyo nu Akaba nontului i padang bone' lantas tinokamo i Kades.

¹⁷ Lapas aijo' aha nonsaimo mian namba hi tomundo Edom da momoita de timbali opobee' na motulu i lipu' nu aha. Panyo ia madi' nompobee' aha. Lapas aijo' nompoitamo mule' na aha susumo aijo' hi tomundo nu Moab, panyo ia suele madi' nompobee' aha motulu i da'erahnyo. Kalana aijo' mian nu Israel jinojoongmo i Kades.

¹⁸ Lapas aijo' aha po'ule'mo namba notulumo i padang bone' panyo madi' notulu i da'erah Edom tiba Moab, panyo nongalamo jalan anu mompolilit sahingga tinokamo i sasu kabete'an lipu' nu Moab, i santoa nu Kaunyo Arnon. Aha nombaumo kemah ikiijo' mae, panyo madi' notaap i kaunyo aijo' kalana da'erah aijo' ninsoopmo da'erah nu Moab.

¹⁹ Lapas aijo' mian nu Israel nonsaimo mian namba hi Sihon tomundo nu aha Amori kiijo' i Hesybon da momoita de timbali motulu i da'erah Amori kalana aha kahanda'mo mamba i posi da'erah nu aha.

²⁰Panyo i Sihon madi' nompobee' aha kalana ia madi' palesaya na aha aijo' ola kahanda' motulu, Ia ola ahi' nompalentahmo iwi-iwi' na suludadunyo lantas nonjagamo kiijo' i Yahas, lapas aijo' nontumbuhimo Israel.

²¹Panyo Tumpu Allah nu aha Israel nombee'imo ka'untungan nahampate na mian nu Israel nongewa Sihon ka' to sulu-suludadunyo. Sumo aijo' na mian nu Israel nohumpak iwi-iwi' na tano' nu aha mian nu Amori anu jojoong i lipu'nyo aijo'.

²²Da'erah nu aha Amori aijo' jinojoonganmo nu aha lengkat pe'e mae i Arnon sasu selatan, toka-toka i sasu utara Kaunyo nu Yabok, ka' lengkat mae i padang bone' sasu kabete'an, toka-toka i Kaunyo nu Yordan sasu kinsoban.

²³Jadi tumpu Allah nu aha Israel aijo'mo na nolaa' aha mian nu Amori kalana bau kapentingan nu mian anu pinalesayamo hi Tumpu.

²⁴Ka' tempo' uuka aiya tantu ko kahanda'mo na beleyum po'ule' mongala? Tano' anu binee'mo i Kamos, aijo'mo pilogot nu belento hi belemiu na tataap ahi' belemiu na tumpunyo. Panyo apaa na anu binee'mo nu Tumpu, Tumpu Allah mami hi kami, sabole-bole ahi' o ala mami.

²⁵ Kooyum beleyumo na lebe ma'ima' molingkudui i Balak anak i Zipor, tomundo nu Moab? I Balak madi' toho' nongewa kabai nahampate tiba kami.

²⁶Tinolu'atu na taun na kinopinnyo na Israel nompalentah Hesybon tiba Aroer ka' mule' kampu-kampung sangga'atnyo ka' iwi-iwi' na kota-kota i sonibi nu Kaunyo Arnon. Ka' kadaka' tempo'nyo aijo' belemiu madi' po'ule nongala?

²⁷Madi', kami madi' ko sala'nyo hi belemiu. Belemiu na anu ko sala'nyo kalan nontumbuhimo mae kami. Tumpu na anu momputusi palakala aiya sinaa uuka hi bansa Israel tiba bansa Amon.”

²⁸Panyo tomundo nu aha Amon madi' nompajuli potuunon i Yefta aijo'.

²⁹Lapas aijo' Roh nu Tumpu nongkuasaumo i Yefta, sahingga nambamo na i Yefta nontoa da'erah Gilead tiba Manasye lapas aijo' ninsusule'mo i Mizpa i da'erah Gilead. Lengkat ikiijo' ia namba mule' i da'erah nu bansa Amon.

³⁰I Yefta nojanji'mo hi Tumpu, sumo uuka, “De Tumpu mompobee' aku mohungku'i mian nu aha Amon,

³¹ka' aku salamat na minsusule' mae madi' ko apa-apaanyo saba' maumo pa' ihe na anu momona mosabat mae i laiganku molabot aku, ku sombahkon salaku bau koloban anu opotunu obee' hi Tumpu.”

³²Lantas i Yefta notaapmo i Kaunyo nu Yordan kahanda' mompahampateakonmo mian nu Amon, ka' Tumpu nombee'imo ka'untungan ia mahampate.

³³I Yefta nompahampateakonmo aha sahingga i ningkot lengkat i Aroer tinoka-toka i da'erah Minit — iwi-iwi' uampulu' na kota — ka' kojo'onnyo tinoka-toka i Abel-Keramin. Manjoo' hondo na mian nu Amon anu sinilaka sahingga nahungku'mo na aha hi mian nu Israel.

³⁴Salatan i Yefta ninsusule'mo nokiijo' i Mizpa, anaknyo anu lalangkoyang tinokamo nolabot ia ka' nonsaleleimo ka' nohapa'imo gandang. Aijo'mo na anaknyo ola sa'a-sa'angu'nyomo.

³⁵ Salatan tinoa i Yefta, i Yefta talalomo hondo nolibos sahingga binea-beaknyomo na baju'nyo ka' notatae, “Paya' na anakku madi'mo ku poko tahan na kinyonyoa! Kadaka' tionyoje oko na mompolibos kinyonyoangku? Aku binasumpa'mo hi Tumpu, ka' madi'mo ku poko ala na mompojalo janji'ku!”

³⁶Lantas langkoyang aijo' notataemo hi Yefta, “i Papa binasumpa'mo hi Tumpu ka' Tumpu sinitujumo hi papa da mombalosakon ka'idekan nu aha Amon aijo' anu monsampobali' i Papa aijo'. Jadi apaa na anu jinanji'mo i Papa' tionyo ahi' obaumo i Papa.”

³⁷“Ola”, koonyo nu langkoyang aijo' mule', “Daagi' ko anu ku poita: bee'i mae na aku tempo' ohua' na bitu'on da mamba pe'e kolalajang i bungkutnyo tiba to sanga-sangalungku. I kiita' mae na aku mohangi pe'e uki'ku aiya kalana aku silakamo padahan daagi' langkoyang ma'isa toho' no'osoa.”

³⁸Tuumanyo nompobee'mo ia, lantas nompobee'mo ia namba. Langkoyang aijo' tiba to sanga-sangalunyo nambamo i bungkutnyo da lewa' mongkalibosakon i kiita' mae kalana ia ma'isa pe'e mo'osoa ka' mohumpak anak panyo silakamo.

³⁹Salatan ilapasmo ohua' na bitu'on ia ninsusule'mo hi tuumanyo lantas binaumo nu tuumanyo apaa na anu jinanji'nyomo hi Tumpu. Sahingga sinilakamo na langkoyang aijo' tempo'nyo ia ma'isa toho' no'osoa. Aijo' na momona pinolengkatannyo nu kabiasa'an, kadaka' hi aha mian nu Israel, biasanyo

⁴⁰na to ana-anak langkoyang mamba i bungkutnyo patonsinaa na kopinnyo sataun toka sataun mongkalibosakon kinyonyoa monginau' anak i Yefta naipuan mae kiijo' i Gilead.