Read Saluan TO MIA-MIAN KOPIAN 12 Bible Online

TO MIA-MIAN KOPIAN 12 - Saluan bible

TO MIA-MIAN KOPIAN 12

¹Tempo'nyo aitu tulunan nu bansa Efraim nonggagau'mo kahanda'mo mahampate lantas nambamo notaap i Kaunyo nu Yordan mompanjolongi Zafon. Aha notatae hi Yefta, “Kadaka' beleyum nompahampateakonmo bansa Amon, panyo madi' nongende mae kami? Uuka aiya opapumo mami na beleyum tiba belemiu salaigan.”

²I Yefta notatae, “Mian nu Amon tiba kami mian nu Gilead madi'mo nompaha sanang hondo. Belemiu ilagangkumo da montulungi aku da mompobebas aku bolimo nupatei nu to mia-mian Amon aijo', panyo belemiu madi' tinoka.

³Jadi, salatan sinumbu'kumo na belemiu madi' toka montulungi aku, aku sinabinmo na mamba mahampate tiba mian nu Amon haha aijo', bakasmo da aku silakamo. Lantas binee'anmo nu Tumpu na aku ka'untungan nahampate nongewa aha. Kadaka' uuka belemiu tokamo montumbuhi aku?”

⁴Lapas aijo' i limu'mo i Yefta iwi-iwi' na mian nu Gilead, lantas aha nahampatemo ka' nompatundu'mo mian nu Efraim. (Mian nu Gilead anu jojoong i Efraim ka' Manasye tinutukmo nu mian Efraim tukoonyo nu aha madi'mo nosa'angu' tiba Efraim bubu' mae gampa nu aha.)

⁵Mian nu Gilead haha aijo' anu nahampatemo nonjojoongimo iwi-iwi' na tampat potaapan i Kaunyo nu Yordan da timbali mongampang to mia-mian nu Efraim anu kahanda'mo malai. Daagi' kino samian na mian nu Efraim, anu kahanda'mo malai, nomoita da motaap, mian nu Gilead nompokilawa hi ia, “Beleyum mian nu Efraim?” De tinaamannyo, “Misa',”

⁶pinokaumo nu aha na ia montaloakon “Syibolet”. Tantu ia montaloakon Syibolet kalana madi' moko taloakon potatae aijo' ma'i-ma'ima'. Jadi nu hakopmo nu aha ka' opatei na ia i sala'sa'angu' na tampat potaapan aijo'. Jadi anu pinatean 42.000 na mian nu Efraim tempo'nyo aitu.

⁷Anom na taun na kinopinnyo na i Yefta nompalentah mian nu Israel. Lapas aijo' ia sinilakamo ka' i lamunmo i kampung kinahampeannyo aijo'mo kota Mezpa anu kiijo' i Gilead.

⁸Noko lapas na i Yefta, mian nu Israel pinalentahmo i Ebzan anu lengkat mae i Betlehem.

⁹I Ebzan ko anak mo'ane aha tolumpulu' tiba anak boune aha tolumpulu' na mian. Anaknyo to bou-boune haha aijo' pino'osoakonnyo tiba to mia-mian anu hi tulunan nu bansa sangga'at, ka' ia mule' nongala tolumpulu' na to lalangkoyang hi tulunan nu bansa sangga'at da bau osoa nu to ana-anaknyo mo'ane. Pinopitu' na taun na kinopinnyo i Ebzan nompalentah mian nu Israel,

¹⁰lapas aijo' ia sinilakamo ka' i lamunmo i Betlehem.

¹¹Noko lapas na i Ebzan, mian nu Israel pinalentahmo i Elon lengkat mae hi tulunan nu bansa Zebulon sinampulu' na taun na kinopinnyo.

¹²Lapas aijo' ia sinilakamo ka' i lamunmo i Ayalon i da'erah nu Zebulon.

¹³Noko lapas na i Elon, mian nu Israel pinalentahmo i Abdon anak i Hilel anu lengkat mae i Piraton.

¹⁴Anaknyo anu to momo'ane aha patompulu' ka' to maku-makumpunyo anu to momo'ane aha tolumpulu'. Aha toto samian daagi' ko keledai toto sa'angu'an bau kasake'an. Inguwalu' na taun na kinopinnyo mian nu Israel pinalentah i Abdon.

¹⁵Lapas aijo' ia sinilakamo ka' i lamunmo i Piraton i da'erah nu Efraim, i da'erah nu bungkutnyo i tano' nu aha mian Amalek.