Read Saluan TO MIA-MIAN KOPIAN 13 Bible Online

TO MIA-MIAN KOPIAN 13 - Saluan bible

TO MIA-MIAN KOPIAN 13

¹Mian nu Israel nompo'ule'mo binaladosa' hi Tumpu, lantas Tumpu nompojohokmo mian nu Filistin nongkuasai aha kinopinnyo pinatompulu' na taun.

²Tempo'nyo aitu daagi' ko samian na mo'ane kiijo' i kota Zora. Sanggonyo i Manoah tulunan mae nu bansa Dan. Bengkele'nyo lengke'.

³Panyo daagi' kinosansinaan malaekat nu Tumpu nanintoamo hi ia ka' notatae, “Sumo uukamo na kinopinnyo beleyum madi' nohumpak anak mo'ane.

⁴Kalana aijo' opokopiani na butong nu beleyum ima-ima'. Boli monginum anggur kabai monginum anu moko palangu, kabai mongkaan apa-apaa anu madi' toho' okaan.

⁵ De anak nu beleyum aijo' hampemo, boli hondo-hondo o gunting na ubaknyo kalana i uno pe'e nu ma'alum ia tinantukanmo da mombau anu nupalentahkon nu Tumpu. Ia na montinjohakon da mompobebas aha bansa Israel da bolimo nukuasai nu mian Filistin.”

⁶Lapas aijo' bengkele' i Manoah nambamo hi langkai'nyo ka' notatae, “O langkai'ku, daagi' ko posaihon nu Tumpu Allah tinoke hi belengku; mimbalu-balu' susumo malaekat nu Tumpu Allah sahingga aku nabuhukmo. Aku madi' nompokilawa pa' lengkat mae iya na ia, ka' ia mule' madi' nompoto'i sanggonyo hi belengku.

⁷Panyo ia notataemo tukoonyo aku poboamo ka' mohumpakmo samian na anak mo'ane. Ia mule' notatae tukoonyo aku madi' timbali monginum anggur kabai anu moko palangu, kabai mongkaan apa-apaa anu madi' toho' okaan, kalana anak aijo' tionyo ahi' o bee' hi Tumpu Allah da timbali mian anu mombau apaa na anu nupalentahkon nu Tumpu i uno nu kantumuu'annyo.”

⁸Nohongo anu sumo aijo', binalado'amo na i Manoah hi Tumpu, sumo uuka, “O Tumpu, po'ule' pe'e mae sanang na belento monsai mae posaihonto aijo' hi kami da mompoto'i apaa na anu tionyo obau mami hi anak aijo' de ia hampemo.”

⁹Tumpu Allah nohongomo apaa na anu pinoita i Manoah. Malaekat nu Tumpu po'ule' mule' tinoka tempo'nyo bengkele' i Manoah hau-haunyo suha-suhang kiijo' mae i ale'. Tempo'nyo aitu langkai'nyo madi' ko anu ikiijo'.

¹⁰Jadi, ia nopadeka'mo namba nompoto'i han aijo' hi ia, “O langkai'ku, soba toa, mian anu u'utu mae tinoka hi belengku aijo' po'ule' mule' tinoka!”

¹¹I Manoah lia-lia' nombatuki bengkele'nyo. Ia nongohani mian aijo' ka' nompokilawa, “Belentomo tuan na nomboa mae lele hi bengkele'ku?” “Totu'u”, na pinontaaminyo.

¹²Lantas pinokilawa i Manoah, “De anu pinoto'i nu belento tuan aijo' saidi' mae jadimo, apaa na anu tionyo ahi' nubau nu anak aijo'? Mosia na kantumuu'annyo saidi' mae?”

¹³Malaekat nu Tumpu aijo' nontaami, “Bengkele' nu beleyum madi' timbali monginum anggur kabai anu moko palangu, ka' mule' madi' timbali mongkaan apa-apaa na anu molengkat mae i kau' anggur kabai apa-apaa na anu madi' toho' okaan. Ia tionyo ahi' mombau iwi-iwi' apaa na anu pinoto'ingkumo hi ia ka' obala'ingati da madi' ko anu madi' obau.”

¹⁵Lantas i Manoah notataemo hi ia, “De timbali Tuan, tanda'i pe'e sasaingoni'. Da okola'i pe'e mami mee' anu daagi' bata'nyo na belento Tuan.”

¹⁶Panyo malaekat nu Tumpu aijo' notatae, “Mau mule' ku tanda'i aiya, aku madi' mongkaan apaa na anu nu tatuakon nu beleyum aijo'. Panyo, de beleyum sabole-bole ahi' montatuakon, tatuakonmo na aijo' salaku koloban anu opotunu ka' anu osombahkon hi Tumpu.” I Manoah ma'isa nonsumbu' saba' anu notatae hi ia aijo' te malaekat nu Tumpu. Jadi ia notatae, “Desumo itina' yo poto'i mae Tuan na sanggo nu belento Tuan, da apaa na anu pinoto'imo nu belento Tuan itina' saidi' mae jadimo, kami timbali mombee' apaa na anu bau pongadati mami belento Tuan.”

¹⁸Malaekat nu Tumpu aijo' nompokilawa, “Kadaka' beleyum mongkahanda'i monsumbu' sanggongku? Sanggongku aijo'sanggo anu okabangangi.”

¹⁹Sahingga i Manoah nongalamo sa'angu' na mee' bata'nyo tiba gandum sangkiding lantas pinotimpasnyo i batu ka' sinombahkonnyomo hi Tumpu, aijo'mo Tumpu anu mombau apaa na anu okabangangi,

²⁰Hau-haunyo apu i noakmo nokiita' lengkat i batu aijo', i Manoah tiba bengkele'nyo nontoamo malaekat nu Tumpu aijo' noliba'mo nokiita i uno nu apu anu i noakmo aijo', nokiita'mo i langit. Atina'je ka' sinumbu' i Manoah taalu' aijo' malaekat nu Tumpu; sahingga ia tiba bengkele'nyo tinolodadupumo nonsombahmo. Madi'mo daagi' toho' aha nontoa malaekat aijo'.

²²Lantas i Manoah notatae hi bengkele'nyo, “Kita tantu silakamo kalana nontoamo Tumpu Allah!”

²³Bengkele'nyo nontaami, “De Tumpu kahanda'mo mompatei kita, tantu Ia madi'mo mongala koloban anu sinombahkontomo hi Ia aijo'; Ia mule' madi'mo mompotoa iwi-iwi' aijo' hi kita kabai nompoto'i hahan anu tinaloakon-Nyomo aijo' hi kita.”

²⁴Tinopia-piangkuka na bitu'on lapas aijo' bengkele' i Manoah nohampeakonmo samian na anak mo'ane, lantas sinanggohannyomo i Simson na ia. Anak aijo' kino daka-daka'nyomo ka' binalakatanmo nu Tumpu;

²⁵ka' tempo'nyo ia jinojoongmo i kemah nu aha tulunan nu bansa Dan, anu kiijo' i olot nu Zora tiba Esytaol, Roh nu Tumpu nombee'imo kahosonan hi ia.