Read Saluan TO MIA-MIAN KOPIAN 14 Bible Online

TO MIA-MIAN KOPIAN 14 - Saluan bible

TO MIA-MIAN KOPIAN 14

¹Daagi' kinosansinaan i Simson nambamo i Timna, ka' nontoamo samian na langkoyang nu Filistin ikiijo' mae.

²Lantas ia ninsusule'mo ka' notatae hi tuuma tiba hi tinanyo, “Aku nongka'ima'imo samian na langkoyang mian nu Filistin kiijo' i Timna. Ku poita belento tuuma tiba tinangku mambamo mompokilawakon ia.”

³Panyo tuumanyo tiba tinanyo notatae, “Kadaka' tionyo mamba hi aha mian nu Filistin na pohumpakan bengkele', yo aitu aha madi' minsoop mian anu pinalesayamo hi Tumpu? Te madi' ko anu aiya hi bubu' kita kabai anu hi bansanto iwi-iwi' na madi' ko samian na langkoyang anu mompahakona?” Tinaaman i Simson hi tuumanyo, “Panyo langkoyang nu Filistin aijo'mo na anu ku ka'ima'i. Ka' ku taha'imanimo na belento tuumangku mompokilawakonmo ia da ku alamo.”

⁴Madi' sinumbu' nu tuumanyo tiba tinanyo na i Simson taalu' Tumpu na nompotimbali i Simson da mombau han aijo'. Kalana, Tumpu moliomo tempo' anu ma'ima' da mompahampateakonmo aha mian nu Filistin. Tempo'nyo aitu mian nu Filistin nongkuasaimo aha mian nu Israel.

⁵Sahingga nambamo na i Simson nokiijo' i Timna hingga-hinggat tiba tuuma ka' tinanyo. Hau-haunyo aha notulumo i ale' nu anggur, i Simson siningkabotmo tiba sa'angu' na singa anu daagi' bata'nyo. Singa aijo' tinolo huu'mo,

⁶monti-montiik i Simson nahosonmo nu kahosonan anu lengkat mae hi Tumpu. Lantas binea-beaknyomo na singa aijo' nu limanyo, ola susumo mee' na binatang aijo'. Han aijo' madi' sinisiknyo hi tuumanyo tiba hi tinanyo.

⁷Lapas aitu i Simson nambammmo nosingkaboti langkoyang aijo' ka' binasisik tiba ia, ma ka'i Simson nongkaimaimo ia.

⁸Salatan gagana'mo pinin i Simson po'ule'mo namba kahanda'mo mo'osoa tiba boune aijo'. Ia i namba, ka' nosele nontoa bangke' nu singa anu pinateannyomo aijo'. Salatan tinokamo ikiijo', ia nontoa manjoo' hondo na onjihon i uno nu bangke' aijo' ka' ko ju'nyomo.

⁹Kinayonyo na ju' aijo' nu limanyo lantas po'ule' i lumajang ka' inginumnyomo na ju'nyo aijo'. Lapas aijo' ia nambamo hi tuuma tiba hi tinanyo aijo' ka' binee'annyo suele na aha sambagian na ju' aijo', ka' aha suele nonginumo, panyo madi' sinisik i Simson na ju' aijo' ingala i bangke' nu singa.

¹⁰Salatan tuuma i Simson nambamo i laigan nu langkoyang aijo' i Simson nombaumo bau-bauon ikiijo' mae, kalana sumo aijo' na kabiasa'an anu saja' obau nu to oli-olitau.

¹¹Salatan aha mian nu Filistin nontoamo ia, aha nompile'imo tolumpulu' na to oli-olitau anu monsangalui ia.

¹²Lantas koonyo i Simson hi aha, “Aku daagi' ko tangki-tangki'on. De belemiu moko ala montili'i, belemiu toto samian ku bee'i sangkolong na hude lenan anu ma'ima' hondo ka' sapaan na baju' suele anu ma'ima'. Belemiu ku bee'i tempo' pitun sinaa na kopinnyo sumo kopinnyo nu bau-bauon po'osoan aiya, na montili'i.

¹³Panyo de belemiu madi' moko ala montili'i, belemiumo toto samian na tionyo ahi' mombee' mae hi belengku hude lenan anu ma'ima' hondo ka' sapaan na baju' anu ma'ima'.” Lantas aha mian nu Filistin haha aijo' notatae, “Timbali! Uuka aiya soba poto'imo mae na tangki-tangki'on itina'.”

¹⁴Sahingga i Simson notataemo, “Lengkat mae hi anu mongkaan, nosabatmo mae na anu okaan; lengkat mae hi anu mahoson, nosabatmo mae na anu matami'.” Salatan tinolun sinaamo aha ma'isa ahi' noko ala nontili'i tangki-tangki'onnyo aijo'.

¹⁵Jadi tinoka kino ipatonnyo notataemo na aha hi bengkele' i Simson, “Soba beleyum tionyo ahi' pagala monsale'i langkai' nu beleyum da ia mompoto'i mae hi kami alati'nyo nu tangki-tangki'onnyo aijo'. De madi' opapuimo mami na beleyum tiba belemiu salaigan ka' tuuma nu beleyum. Ugat beleyum molaga kami toka i bau-bauon da mongingkoti halata' mami!”

¹⁶Kalana aijo', bengkele' i Simson nambamo hi Simson ka' i humang, lantas notatae, “Ku sumbu' beleyum madi' mongka'ima'i aku. Kadaka' beleyum nombee'imo tangki-tangki'on hi to sanga-sangalungku ka' madi' nompoto'i na beleyum hi belengku alati'nyo? Tantu beleyum nongka'idekimo aku!” I Simson notatae, “Hongo pe'e! Hi posi tu'anyongku pe'e madi' pinoto'ingku, kadaka' hi beleyum na pompoto'ianmo?”

¹⁷Pitun sinaa na kinopinnyo na bau-bauon aijo' bengkele' i Simson sinahahangnyomo. Jadi kalana ia saja'mo nonginde'i da opoto'i sahingga i sinaa ko ipitunnyo pinoto'imo i Simson na alati'nyo nu tangki-tangki'on aijo' hi ia. Lantas bengkele' i Simson aijo' nompoto'imo hi aha mian nu Filistin.

¹⁸Jadi i sinaa kino ipitunnyomo ma'isa pe'e sinaa nakakinsap mian nu kota haha aijo' notataemo hi Simson, “Apaa na anu lebe matami' molingkudui ju' nu uani'? Ka' apaa mule' na anu lebe mahoson molingkudui singa?” Tinaaman i Simson, “De belemiu madi' pagala nomoita hi bengkele'ku da ia na sabole-bole nongkakase hi belengku, belemiu madi' noko ala nontili'i tangki-tangki'on aijo'!”

¹⁹Monti-montiik i Simson nohumpakmo kahosonan kalana kuasa nu Tumpu, lantas ia nambamo i Askelon. Ikiijo' mae ia nompateimo aha tolumpulu' na to momo'ane anu ko baju' nu aha toto ima-ima'. Ingalanyo na baju' nu aha aijo' ka' binee'nyo hi aha tolumpulu' na mian anu nontili'imo tangki-tangki'on aijo'. Lapas aijo' ia ninsusule'mo i laigannyo ka' nompele-pele'mo na kinyonyoanyo.

²⁰Lantas moniannyo nombee'mo bengkele' i Simson aijo' hi mian anu nonsangalui mae i Simson tempo'nyo ia i nika' aijo'.