Read Saluan TO MIA-MIAN KOPIAN 15 Bible Online

TO MIA-MIAN KOPIAN 15 - Saluan bible

TO MIA-MIAN KOPIAN 15

¹Madi' pinin lengkat i aijo', kakona tempo'nyomo pinompadakan gandum, i Simson nambamo nontoa bengkele'nyo aijo'. I Simson notataemo hi tuuma nu bengkele'nyo, “Aku mongkahanda'i minsoop i salipi' da singkabot pe'e tiba bengkele'ku.” Panyo tuuma nu bengkele'nyo madi' nompobee' ia.

²Ia notatae hi Simson, “Koongku pa' totu-totu'u beleyum nongka'idekimo ia, jadi, ia binee'kumo hi sangalu nu beleyum. Panyo desumo itina' beleyum timbali mongalamo utusnyo ise'. Ia na lebe handa.”

³I Simson notatae, “Apaa na anu kahanda' po'ule' ku bau hi mian nu Filistin uuka aiya, misa'mo kasala'anku!”

⁴Lantas ia nambamo nohakop tolu'atu na serigala. Iku nu serigala haha aijo' pinosegotnyomo toto ohua'. I pinonsegotannyo aijo' pinaha posegotnyomo sa'angu' na potong.

⁵Lapas aijo' tinutungannyomo na potong haha aijo' i ale' nu aha mian nu Filistin. Sahingga nopapumo na gandum iwi-iwi' anu pinoko padakmo ikiijo'. Ka' mule' gandum anu sinu'anmo tiba ale' nu anggur iwi-iwi' suele nopapu.

⁶Aha mian nu Filistin nambamo noleleki pa' ihe na nombau han aijo'. Lantas pinoto'imo nu mian hi aha tukoonyo i Simson na nombau, kalana moniannyo kiijo' i Timna nombee'mo bengkele' i Simson hi samian na sangalu i Simson. Kalana aijo' pinapuanmo nu aha mian nu Filistin na boune aijo' tiba aha salaigan nu tuumanyo sampe i ningkot.

⁷Lantas notataemo na i Simson hi aha mian nu Filistin aijo', “O, taalu' sumo aijo' na belemiu nombau? Aku basumpa' madi' ola momohokot de aku ma'isa mombalosakon han aijo' hi belemiu?”

⁸Lapas aijo' tinumbuhannyomo na aha ka' pinoko ideknyo totu-totu'u ka' manjoo' na aha pinateannyo. Lapas aijo' ia nambamo ka' jinojoongmo i uno nu liang i sa'angu' na bungkutnyo nu batu kiijo' mae i Etam.

⁹Sahingga mian nu Filistin tinokamo i da'erah nu Yehuda lantas nombaumo kemah ikiijo', lapas aijo' nontumbuhimo kota Lehi.

¹⁰Aha mian nu Yehuda nompokilawamo hi mian nu Filistin, “Kadaka' belemiu montumbuhimo mae kami?” Tinaaman nu aha, “Kami toka mae mohakop i Simson da okabisa'i mami na ia susumo ia nongkabisa'imo kami.”

¹¹Nohongo anu sumo aijo' nambamo na aha 3.000 na mian nu Yehuda i liang anu kiijo' i bungkutnyo nu batu kiijo' i Etam. Ikiijo' mae aha notataemo, “Simson, madi' nu sumbu' na mian nu Filistin nongkuasaimo mae kita? Apaa na anu binaumo nu beleyum aiya hi kami!”

¹²Aha notatae, “Kami toka mae da mompungu ka' mombee'mo beleyum hi aha mian nu Filistin.” I Simson notatae, “Bajanji' pe'e saba' belemiu madi' ahi' mompatei aku.”

¹³“Sumo itina'mo”, na koonyo nu aha, “memang kami kahanda' mompungu ka' mombee' beleyum hi mian nu Filistin. Kami madi' mompatei beleyum.” Lantas aha nompungumo ia nu kahohon ohua' anu daagi' bu'ou, ka' nomboamo ia lengkat i liang aijo'.

¹⁴Salatan i Simson binoamo ka' tinokamo i Lehi, aha mian nu Filistin singkapmo mae tinoka ka' nontaligalai ia. Monti-montiik ia nahosonmo kalana kuasa nu Tumpu. Kahohon haha aijo' anu pinompungu limanyo binotu-botu'nyo pokakanamo sumo anu notoyo' na kahohon aijo'.

¹⁵Lapas aijo' ia nohumpakmo sa'angu' na aje nu keledai anu daagi' bu'ou. Tinoluknyo na bukunyo aijo', ka' bau pinompahantutukakonnyo 1.000 na mian sahingga i nate.

¹⁶Sahingga nanyanyimo na i Simson. “Tiba aje nu keledai, na pinompateingku samadala na mian; tiba aje nu keledai, tinambunkumo na aha anu sinilakamo.”

¹⁷Lapas aijo', ingalinnyomo na buku nu ajenyo aijo'. Mokonyo aitu tampat aijo' sinanggohanmo Ramat-Lehi.

¹⁸Lapas aijo' i Simson i negotmo hondo, sahingga ia nomoitamo tulung hi Tumpu. Ia notatae, “O Tumpu, sala'je uuka na Belento nombee'i mae ka'untungan nahampate anu daka' aiya hi belengku. Uuka aiya pa'aku silakamo nu megot, sahingga nuhakopmo nu to mia-mian nu Filistin anu madi' monsumbu' belento?”

¹⁹Sahingga binuka'mo nu Tumpu Allah na bolo' nu batu anu i bungkutnyo kiijo' i Lehi lantas nosabatmo mae na uee. I Simson nonginumo sahingga po'ule'mo nahoson Mokonyo aitu mata nu uee aijo' sinanggohanmo mata nu uee Hakor. Mata nu uee aiya daagi' kiijo' i Lehi.

²⁰Uampulu' na taun na kinopinnyo na i Simson tinimbali polaya' nu aha mian Israel tempo'nyo aha kinuasanmo nu mian Filistin.