Read Saluan TO MIA-MIAN KOPIAN 16 Bible Online

TO MIA-MIAN KOPIAN 16 - Saluan bible

TO MIA-MIAN KOPIAN 16

¹Daagi' kinosansinaan i Simson nambamo i Gaza. Ikiijo' mae ia siningkabotmo tiba samian na boune anu saja' masala' lantas ia nambamo nale' tiba boune aijo'.

²Jadi mian nu Gaza nohongomo taalu' i Simson kiijo'mo mae, sahingga aha nontikumo kota aijo' montanda'i ia sinampahu i sabatan daka' nu kota. Panyo aha madi' noko bau apa-apaa pihi-pihi aitu kalana tinutugan nu aha, “Pobakas bete'je na sinaa, opateintoje na ia.”

³Panyo i Simson ma di' i nale' ikiijo' sampe napatas. Tonga-tonga' pahu ia nobulamo lantas ia nambamo i sabatan daka' nu kota. Pinahagautannyo na ohi' nu sabatan aijo' iwi-iwi' tiba ponsupatinyo. Lapas aijo' sinimbunyomo na sabatan aijo' ka' binoanyo i bawo nu bungkutnyo i sambiha'nyo nu Hebron.

⁴Lapas aijo' i Simson nongka'ima'imo samian na boune anu i Bangka'nyo Sorek. Sanggo nu boune aijo' i Delila.

⁵Jadi tinokamo na aha olima' anu mongkuasai Filistin hi boune aijo' ka' notatae, “Soba pagala sale'i na i Simson da nu poto'i hi beleyum mosia na lahasianyo sahingga ia mahoson sumo aijo', ka' apaa na obau da ia madi'mo mahoson sumo aijo'. Da kami toka ka' moko ala mompungu ia da ia ohungku'i. Kami toto samian mombee'je hi beleyum samadala ka' sa'atu na doi pelak.”

⁶Jadi notataemo na i Delila hi Simson, “O Simson, mosia na beleyum ka' nahosonmo susumo atina'? Apaa na bau pompungu beleyum da madi'mo ko kahosonan susumo atina'? Soba poto'i mae na lahasianyo!”

⁷Tinaaman i Simson, “De aku o pungu nu popitu' na kahohon nu pana' anu daagi' bu'ou anu ma'isa talalo manggas hondo, aku lundengmo ka' timbalimo susumo mian baban.”

⁸Lantas anu mongkuasai Filistin haha aijo' nombee'mo hi Delila popitu' na kahohon nu pana' anu bu'ou anu ma'isa talalo manggas. Lapas aijo', hau-haunyo mian nu Filistin montanda'i aijo' mae i salipi' sangga'at ka' i Delila nompungumo i Simson nu kahohon aijo' lantas notataemo daka-daka', “O Simson! Mian nu Filistin tinoka mo mae!” Lau-laus na i Simson nompahambotu'akon kahohon nu pana' aijo'. Kahohon haha aijo' nobotu-botu' susumo anu tinoyo'anmo nu apu. Lahasia nu kahosonan i Simson ma'isa sinumbu-sumbu'.

¹⁰Lantas notataemo na i Delila hi Simson, “Ha, beleyum baleko'! Beleyum ola monggagau' aku. Sampa palia-lia', sisik mae hi belengku apaa na bau pompungu' beleyum!”

¹¹Tinaaman i Simson, “De aku o pungu nu kahohon bu'ou anu ma'isa toho' pinomputi apa-apaa aku lundengmo ka' timbalimo mian baban.”

¹²Hau-haunyo mian nu Filistin montanda'i aijo' mae i salipi' sangga'at, i Delila nongalamo to pia-piangkuka na kahohon anu bu'ou ka' nompungumo i Simson. Lantas ia notataemo daka-daka', “Simson! Mian nu Filistin tinokamo mae!” Panyo pinahambotu'akon i Simson na kahohon haha aijo' anu i limanyo susumo mian nombotu'i banang.

¹³Lantas i Delila notataemo hi Simson, “Ha, beleyum po'ule' mule' nonggagau' aku. Beleyum baleko'. Sampa lia-lia' sisik mae apaa na bau pompungu beleyum!” Tinaaman i Simson, “De popitu' na hambahan nu ubak ku opokalekot i banang anu aijo' i pakakas pontonunan, lantas oposegotmo i kau' pakakas nu pontonunan aijo' aku lundengmo ka' timbalimo susumo mian baban.”

¹⁴Sahingga lewa'mo pinanya-panya i Delila da sanang na kinyonyoa i Simson sahingga ia kinahoyotanmo lantas pinokalekotnyomo na ubak i Simson popitu' na hambahannyo i banang anu aijo' i pakakas nu pontonunan. Lapas aijo' pinosegotnyomo i kau' pakakas nu pontonunan aijo' lantas ia notataemo daka-daka', “O Simson! Mian nu Filistin tinokamo mae!” I Simson nobula lantas i hambetnyo na ubaknyo sahingga tinompohusmo i pakakas nu pontonunan aijo'.

¹⁵Lapas aijo' i Delila notataemo hi ia, “Ha, beleyum notatae tukooyum nu kalibosi na aku padahan kinyonyoa nu beleyum madi' totu-totu'u hi belengku! Pintolunmo na beleyum monggagau' aku, ka' sampe uuka aiya beleyum mule' madi' mongka'oho' mompoto'i kadaka' beleyum talalo mahoson.”

¹⁶Sansina-sinaa na i Delila saja' pagala mongkakase, sahingga i Simson na'osamo na nohongo.

¹⁷Ahennyo sinisikmo i Simson na lahasianyo. I Simson notataemo, “Ubak ku ma'isa toho' ginunting,” “Aku binee'mo hi Tumpu Allah da Tumpu Allah-mo na tumpunyo da mombau apaa na anu Nu palentahkon. Salatanmo pe'e aku i hampe, aku tinimbalimo mian anu mombau apaa na anu nupalentahkon nu Tumpu. De ubak ku o guntingmo aku madi'mo mahoson, aku lundengmo ka' timbalimo susumo mian baban.”

¹⁸Salatan sinumbu'mo i Delila na i Simson nompoto'imo lahasia nu kinyonyoanyo. Sahingga ia nompolelemo hi aha anu mongkuasai Filistin, “Tokamo mae me minsan aiya. I Simson nonsisikmo lahasianyo hi belengku.” Aha tinokamo ka' nomboamo mae doi obee' hi Delila.

¹⁹Lapas aijo' i Delila nompanya-panyamo i Simson da sanang na kinyonyoanyo sampe ia kinahoyotanmo i pa'anyo, lantas ia nolagamo mian ka' noki gunting popitu' na hambahan nu ubak i Simson. Lapas aijo' sinakisanyomo na i Simson, kalana i Simson madi'mo nahoson.

²⁰Lantas ia nolobo'mo, “Simson! Mian nu Filistin tinokamo me!” I Simson nobulamo ka' pa' kokoonyo ia daagi' moko ala gawe susumo uuka mae. Madi' sinumbu'nyo saba' Tumpu nompala'imo ia.

²¹Sahingga ia i hakopmo nu to mia-mian Filistin ka' kinubatakonmo nu aha na matanyo. Binoamo nu aha na ia i Gaza, ka' pinungumo na ia nu lante' tambaga ohua', ka' pinosoopmo i talungku'. Ikiijo' mae i binee'anmo kalaja monggiling.

²²Panyo tempo'nyo aijo' ubaknyo po'ule' mule' tinumuu'.

²³Daagi' kinosansinaan anu mongkuasai Filistin sinihukmo mombau lamean daka' hondo ka' monsombahkon koloban hi Dagon, pilogot nu aha. Aha lewa'mo nanyanyi, “Pilogoto nompo'untungmo kita kalana nohungku'imo i Simson, aijo'mo sampobali'to!”

²⁴Hau-haunyo aha balame-lame' aha notataemo, “Boamo mae na i Simson da ia lewa' okokojointo!” Sahingga ingalamo mae nu aha na i Simson kiijo' i talungku' ka' binaumo anu lewa' okokojoi. Aha nompokaumo ia da tuminjo i olot nu ohi' ohua' anu daka-daka'. Salatan mian da'isan aijo' nontoamo i Simson, aha nompuji'mo Dagon ka' nanyanyi, “Pilogoto nombee'imo kita ka'untungan nahampate hi sampobali' anu nombusikimo lipu'to ka' nompateimo manjoo' hondo na gampanto!”

²⁶I Simson notatae hi to ana-anak mo'ane anu nontaka' ia, “Boli otoongi na limangku da timbali ku kanyang na to ohi-ohi' anu montungkon laigan daka-daka' aiya, kalana aku kahanda' matiseha ikiijo'.”

²⁷Laigan daka-daka' aijo' nobuke'mo nu mian. Aha oli-olima' na anu mongkuasai Filistin suele daagi' ikiijo'. Ka' aita' mae i lundunyo nu laigan daka-daka' aijo' suele ko miannyo kila-kila aha 3.000 na mian. Aha iwi-iwi' mompotoakon ka' lewa' mongalu i Simson.

²⁸Tempo'nyo aitu i Simson binalado'amo; ia notatae, “O, Tumpu Anu Matangkas na Kuasa-Nyo, inau'akon pe'e mae nu Belento na aku. Po'ule' pe'e mae bee'i kahosonan ola minsan o Tumpu Allah, da tiba jalan sumo aijo' timbali ku balosi na mian nu Filistin anu nongkubetakonmo ohu-ohua' na batu nu matangku.”

²⁹Lapas aijo' i Simson nontoongimo ohu-ohua' na ohi' i totonga'nyo anu montungkon laigan daka-daka' aijo'. Lantas hau-haunyo limanyo kewe' montoongi ohi' sa'angu' ka' limanyo koanan montoongi ohi' sangga'at.

³⁰Ia notataemo daka-daka', “Bakasmo da aku matemo tiba mian nu Filistin haha aiya!” Tiba kahosonannyo ingko-ingkot, sinulakonnyomo na ohi' haha aijo' sahingga notua' ka' nongutuni oli-olima' na anu mongkuasai Filistin tiba iwi-iwi' mian sangga'at anu ikiijo'. I Simson suele sinilakamo. Panyo, tempo'nyo ia sinilaka aijo' ia daagi' nompatei lebe manjoo' na mian molingkudui tempo'nyo ia daagi' tutuu'.

³¹Lapas aijo' tinokamo na to utu-utusnyo ka' to julu-julunyo mongala butongnyo anu sinilakamo aijo'. Aha nonsule'akonmo ia, ka' i lamunmo na ia i kubulan anu binau i Manoah tuumanyo, kubulan aijo' binau i olot nu Zora tiba Esytaol. I Simson tinimbali polaya' nu Israel inguampulu' na taun na kinopinnyo.