Read Saluan TO MIA-MIAN KOPIAN 17 Bible Online

TO MIA-MIAN KOPIAN 17 - Saluan bible

TO MIA-MIAN KOPIAN 17

¹Daagi ko samian na mo'ane sanggonyo i Mikha. Ia jojoong i daerah nu bungkutnyo i tano' nu aha Efraim.

²Daagi' kino sansinaan ia notataemo hi tinanyo, “Otinangku, tempo'nyo belento tinangku nolapus na doi salaka samadala' ka' sa'atu i hongongku belento tinangku nongkutukimo anu nontomang. Aiyamo tinangku na doi aijo'! Akumo na nontomang.” Tinanyo nontaami, “Ku amalakon da beleyum anakku nu balakati nu Tumpu!”

³I Mikha nonsule'akonmo doi aijo' hi tinanyo, lantas koonyo nu tinanyo, “Da beleyum anakku, madi' nu kona nu kutuk anu tinaloakonkumo aijo' ku sombahkonmo na doi salaka aiya hi Tumpu da obau patong kau' anu olapisi nu salaka. Jadi doi aijo' ku sule'akonmo hi beleyum.”

⁴Sahingga salatan i Mikha nonsule'akonmo doi aijo' hi tinanyo, tinanyo aijo' nongalamo ua'atu na takeannyo nu doi aijo' ka' nombee' hi samian na tukang salaka. Lantas pinokaunyomo na tukang da mombauakon sa'angu' na patong kau' anu olapisi nu salaka aijo'. Lapas aijo' patong aijo' pino una'mo hi laigan i Mikha.

⁵I Mikha daagimo ko posi tampat sa'angu' bau ponsomban. Ia nombau tinopia-piangkuka na patong nu pilogot ka' sa'angu' na baju' nu imam lantas ihangkatnyomo na anaknyo mo'ane samian binau imam.

⁶ Tempo'nyo aijo' bansa Israel madi'mo kino tomundo'nyo: batu-batu mian apa-apaa asan anu nu tutugi totu'u.

⁷Tempo'nyo aijo' suele daagi ko samian na olitau hi aha tulunan nu bansa Lewi. U'utu mae ia jinojoong i Betlehem i daerah nu aha Yehuda.

⁸Panyo uuka aiya ia nompala'imo kota aijo' ka' nambamo nolio tampat kajojoongan sangga'at. Ia namba aijo' sinonso'mo hi laigan i Mikha i daerah nu bungkutnyo daerah nu aha Efraim.

⁹I Mikha nompokilawamo ia, “Beleyum utus, mian lengkat mae iya?” Mian aijo' nontaami, “Aku mian nu Lewi lengkat mae i Betlehem i daerah nu aha Yehuda. Aku molio tampat kajojoongan.”

¹⁰Tinaamanmo i Mikha, “Jojoongmo hi belengku i aiya, da beleyum timbalimo anu bau lewa' mompokinde'i ka' timbalimo imam mami. Ku bee'ije na beleyum sampulu' na doi salaka toto sataun ka' suele baju' tiba anu okaan.”

¹¹Olitau nu aha mian Lewi aijo' sinitujumo, lantas ia ihangkatmo i Mikha binau imamnyo. Ia jinojoongmo hi laigan i Mikha ka' tinimbalimo sumomo posi anaknyo i Mikha.

¹³Sahingga notataemo na i Mikha, “Ya uuka aiya aku palesayamo totu-totu'u, tantu Tumpu mombaumo mae han anu ma'ima' hi belengku kalana daagimo ko samian aha mian nu Lewi anu tinimbalimo Imamku.”