Read Saluan TO MIA-MIAN KOPIAN 19 Bible Online

TO MIA-MIAN KOPIAN 19 - Saluan bible

TO MIA-MIAN KOPIAN 19

¹Tempo'nyo Israel ma'isa kino tomundo'nyo, daagi' ko samian na mian nu Lewi anu jojoong majo'on i kota, i da'erah nu bungkutnyo Efraim. Ia nongosoaimo samian na boune anu lengkat mae i Betlehem Yehuda salaku ambahue'nyo.

²Panyo mamanga boune aijo' notambuha'mo hi ia, sahingga ia ninsusule'mo i laigan nu tuumanyo kiijo'mae i Betlehem. Salatan boune aijo' ingopatmo na bitu'on na kinopinnyo na jinojoong kiijo' mae,

³mian nu Lewi aijo' nambamo po'ule' nonsale'i da minsusule' mae hi ia. Ia namba nomboa samian na posaihon ka' ohua' na keledai. Salatan tinokamo ikiijo' mae, boune aijo' nomboamo ia hi tuumanyo. Salatan tinoamo nu tuumanyo nu boune aijo' na ia, i lame'mo na ia nolalabot,

⁴ka' sabole-bolemo nongkakase ia da bolimo minsusule'. Kalana aijo' ia jinojoongmo tinolunsinaa ka' nongkaan, nonginum, ka' nale' ikiijo' tiba ambahue'nyo.

⁵I sinaa ko ipatonnyomo aha sampamo nobula daagi' subu hondo lantas nogogau'mo kahanda' mambamo. Panyo tuuma nu boune aijo' notatae hi mian nu Lewi aijo', “Mongkaan pe'e da mahoson. Lapas aijo' mambaje na belemiu.”

⁶Sahingga sinumuhangmo na mian nu Lewi aijo' lantas nongkaanmo ka' nonginumo hingga-hinggat tiba tuuma nu boune aijo'. Panyo salatan ia tinuminjomo kahanda' mambamo, tuuma nu boune aijo' pagalamo nonsale'i da bolimo mamba. “Balasanang-sanangmo pe'e i aiya,” na koonyo, “ka' male'mo pe'e i aiya.” Sahingga daagi' jinojoong na mian nu Lewi aijo' sinampahu mule'.

⁸I sinaa kino ilimannyo, daagi' subu-subu hondo salatan ia kahanda'mo mamba, tuuma nu boune aijo' notataemo mule', “Dongan pongkaan pe'e; lapas aijo' mambaje.” Jadi, ua-ua'aha nongkaanmo hingga-hinggat tiba aha aijo', madi' kino sia-sia' sampe sinaa nontampu'unimo makakinsap.

⁹Lapas aijo', salatan mian nu Lewi aijo' tiba ambahue'nyo ka' posaihonnyo kahanda'mo mamba, tuumanyo aijo' notataemo, “Sinaa ohanimo malom, gagana' uuka pintungmo. Sahanyo male'mo pe'e i aiya ka' balasanang-sanang. Dodop belemiu mobula daagi' subu-subu ka' mambamo minsusule'.”

¹⁰Panyo mian nu Lewi aijo' madi'mo mongka'oho' daagi' male' ikiijo'. Ia ka' ambahue'nyo nambamo, hingga-hinggat tiba posaihonnyo tiba keledainyo ohu-ohua' anu pino'una'anmo bau patisake'an. Salatan sinaa ohanimo malom aha tinokamo kiijo' koko Yebus (aijo'mo Yerusalem). Lantas posaihon aijo' notataemo hi tuannyo, “O Tuanku, indah da kita sahanyo sonso'mo male' i kota nu mian Yebus aiya.”

¹²Panyo tuannyo nontaami, “Bolimo! Kita madi' timbali sonso' i tampat anu misa' mian nu Israel. Indah da kita mambamo daagi' pe'e sangkiding male'je i Gibea kabai i Rama.”

¹⁴Kalana aijo' aha sabole-bolemo namba madi'mo sinonso' i Yebus. Sinaa nakakinsapmo salatan aha tinokamo i Gibea i da'erah nu aha tulunan nu bansa Benyamin.

¹⁵Aha sinonso'mo nale' ikiijo', lantas ninsoopmo i kota ka' sinumuhangmo i anu lewa' pilawean Panyo madi' ko samian pe'e na anu mongende aha sonso' i laigan da male'.

¹⁶Hau-haunyo aha suha-suhang i tampat pilawean kiijo' i kota tinokamo na tu'anyo samian anu salaje mae ninsusule' lengkat i ale' namba nokalaja. Ia memang ahi' anu nolengkat mae i da'erah nu bungkutnyo Efraim, panyo ia jinojoongmo i Gibea. (Mian anu jojoong i Gibea aijo' sangga'at mian nu Benyamin.)

¹⁷Salatan tu'anyo aijo' nontoa mian nu Lewi aijo' i tampat pilawean, pinokilawanyomo, “To utu-utus lengkat mae iya, ka' moyamo?”

¹⁸Mian nu Lewi aijo' nontaami, “Kami sala'je tinoka mae lengkat i Betlehem Yehuda, ka' aiya minsusule'mo i laigan anu kiita' mae i bungkutnyo nu Efraim, majo'on i kota. Aku nolengkat mae i kiita'. Mau pe'e samian na anu jojoong i kota aiya madi' mongka'oho' mompaso kami da sonso' i laigannyo male'.

¹⁹Kami madi' mompalalui apa-apaa sangga'at, mantu mami sukup. Daagi' ko hemput da' bau pompakan keledai mami; daagi' ko roti ka' anggur bau bagingku ka' bengkele'ku aiya ka' posaihonku.”

²⁰Lantas tu'anyo aijo' notatae, “Boli bata-bata, ku tulungije. Boli male' aiya i pilawean.”

²¹Lantas binoanyomo na aha i laigannyo ka' binee'annyo pakan na keledainyo haha aijo'. Ka' salatan noko pindudu'mo na mian haha aijo' anu sinonso', aha nongkaanmo.

²² Hau-haunyo aha kiijo' balasanang-sanang, monti-montiik laigan aijo' tinumbuhanmo nu aha to mia-mian anu madi' talakana' i kota aijo'. I lengku-lengkutmo nu aha na tumban ka' notatae hi tu'anyo aijo', “Bee' mae hi kami na mo'ane itina' anu pinosoopmo nu beleyum i laigannum da opasala'i mami na ia!”

²³Tu'anyo aijo' nosabat ka' notatae hi aha, “Boli to utu-utus! Ku poita, boli mombau anu ma'idek ka' anu madi' pantas sumo aijo', kalana ia anu sinonso' mae nale' hi belengku.

²⁴Sahanyo ku bee'je na ambahue'ku, ka' anakku lalangkoyang hi belemiu. Ahaje na bau pompa'osa belemiu. Panyo boli mombau apa-apaa anu ma'idek hi mian anu sinonso' mae nale' aijo'!”

²⁵Panyo kalana aha to mia-mian anu madi' talakana' haha aijo' tataap panggaga, sahingga mian nu Lewi aijo' nonsulakonmo ambahue'nyo aijo' nosabat nokiijo' hi aha. Lantas saja'mo pinasala' nu aha na boune aijo', sampe nopatas.

²⁶Subu-subu boune aijo' ninsusule'mo mae, panyo i ahop nu sabatan nu laigan nu tu'anyo aijo', tampat nu langkai'nyo sinonso' i nale' ia pinoso'mo. Sampe sinaa binete'mo ia daagi' ikiijo'.

²⁷Subu-subu aijo', salatan langkai'nyo nobulamo ka' nontuhea'akonmo tumban kahanda'mo mamba, tinoanyo na ambahue'nyo tiba-tibaha i ahop nu tumban aijo' ka' limanyo totoong i tumban.

²⁸“Pobulamo,” na koonyo hi ia, “indah da kita mambamo.” Panyo boune aijo' madi' nontaami kalana ia sinilakamo. Lantas, i hangkatnyomo na boune aijo' ka' pinosake'nyo i keledai, lapas aijo' aha nambamo ninsusule'mo i laigannyo.

²⁹ Tinoka i laigannyo pinosoopnyomo ka' ingalanyomo na piso' ka' sinampa-sampannyo na bangke' nu ambahue'nyo aijo' binaunyo sampulu' ka' ohua' na padotannyo. Lapas aitu pinakatunyomo na padotan haha aijo' hi sampulu' ka' ohua' na tulunan nu bansa Israel, toto sa'angu' na bansa sampadot.

³⁰Iwi-iwi' na mian anu nontoa aijo' notataemo, “Ma'isa toho' tinimbali na han anu sumo aiya, salatanmo pe'e mian nu Israel nosabat lengkat mae i Mesir sampe sinaa uuka aiya. Kita madi' ola momohokot. Kita tionyo ahi' basale' da obalosakon!”