Read Saluan TO MIA-MIAN KOPIAN 20 Bible Online

TO MIA-MIAN KOPIAN 20 - Saluan bible

TO MIA-MIAN KOPIAN 20

¹Jadi tinokamo na mian nu Israel iwi-iwi' lengkat mae i Dan sasu utara toka-toka i Bersyeba sasu selatan, tiba i Gilead sasu kabete'an, da mohongo apaa na anu i lagakon aijo'. Aha sinihukmo ka' nosa'angu'mo i Mizpa i ahop nu Tumpu.

²Iwi-iwi' konjoo'nyo 400.000 na suludadu anu i lumajang tengke. To pola-polaya' nu aha tulunan nu bansa Israel suele tinoka ikiijo'.

³Tempo'nyo aijo' aha mian tulunan nu bansa Benyamin nohongomo mian nu Israel sangga'at sinihukmo i Mizpa. Sahingga pinokilawamo nu aha mian nu Israel hi mian nu Lewi anu pinateanmo na ambahue'nyo aijo', “Soba sisik mae hi kami mosia na aha nombau han anu ma'idek aijo'!” Mian nu Lewi aijo' nontaami, “Aku tiba ambahue'ku sinonso' i Gibea i da'erah nu Benyamin ka' i nale' ikiijo' mae.

⁴

⁵Lantas to mia-mian nu Gibea tinokamo pihi-pihi molio aku. Aha tinokamo mae nontumbuhi laigan anu kinasonso'anku kahanda' mompateimo aku, ka' nompasala'mo ambahue'ku sampe i nate.

⁶Sahingga ingalangkumo na bangke'nyo ka' pinado-padotkumo na ia, lapas aijo' pinakatungkumo hi sampulu' ka' ohua' na tulunan nu bansanto toto sa'angu, sampadot. Binaungku na aijo' kalana mian nu Gibea haha aijo' nombaumo anu ma'idek ka' nongambangimo mian nu Israel.

⁷Belemiu iwi-iwi' anu tinoka i aiya mian nu Israel. Jadi, ku poita mosia na belemiu mompopikilakon!”

⁸Sahingga mian haha aijo' anu sinihuk i tampat aijo' hingga-hinggat tinuminjo ka' notatae, “Kita iwi-iwi' ma'isa timbali ko anu minsusule' i kemah kabai i laigan.

⁹Sumo uuka na anu tionyo obaunto; Opakento onde na montantukan aha mian anu montumbuhi Gibea.

¹⁰Aha sampulu' na bahagian na to momo'ane nu Israel iwi-iwi', sambahagian na momposadia anu okaan nu aha anu mamba mahampate. Ka' sangga'at na mamba montumbuhi Gibea da o hukum na aha kalana nombaumo anu ma'idek hi aha mian nu Israel.”

¹¹Sumo aijo' na aha mian nu Israel nosa'angu'mo nontumbuhi Gibea.

¹²Salatan mian nu Israel nonsaimo aha to mia-mian namba hi songko-songko na da'erah nu aha tulunan nu bansa Benyamin da mompoto'i lele aiya: “Anu ma'idek apaa na anu jinadimo hi belemiu?

¹³Bee'mo mae na to mia-mian anu madi' talakana' i Gibea aijo' hi kami da opateimo mami na aha ka' tiba jalan sumo aijo' kami mongalinimo anu ma'idek aijo' hi mian nu Israel.” Panyo mian nu Benyamin madi' montapali potatae nu aha mian Israel haha aijo' sangga'at.

¹⁴Ola mule' ahi' iwi-iwi' na kota i da'erah nu Benyamin aijo' aha to mia-mian nu Benyamin tinokamo i Gibea kahanda'mo mompahampateakon aha mian nu Israel sangga'at.

¹⁵Sinaa aijo' aha nomposihuk anu lengkat mae i to kota-kota nu aha konjoo'nyo 26.000 na suludadu. Ka' suele mian anu jojoong i Gibea nomposihukmo 700 na mian anu pinile'anmo. Iwi-iwi' na aku kewe' ka' anu pande na mombunu'akon batu osalambeta. De aha mombunu' osalambeta madi' toho' sala'.

¹⁶

¹⁷Hi aha to mia-mian nu Israel sangga'at sinihukmo 400.000 na suludadu anu ingajanmo.

¹⁸Suludadu nu mian Israel aijo' nambamo i tampat ponsomban nu aha Tumpu kiijo' mae i Betel, ka' nompokilawamo hi Tumpu Allah, “O Tumpu, tulunan nu bansa ile na aiya hi kami na momona mamba montumbuhi aha mian nu Benyamin?” Tumpu nontaami, “Tulunan nu bansa Yehuda.”

¹⁹Dodododopnyo subu-subu nambamo na aha ka' binakemahmo koko kota Gibea.

²⁰Aha nomposadiamo suludadu nu aha anu mahampate mompaha ahop tiba kota aijo', lantas tinumbuhannyomo.

²¹Sahingga suele suludadu nu aha Benyamin nosabatmo mae nontumbuhi ka' nompatei 22.000 na suludadu nu aha Israel sinaa aijo'.

²²Kalana aha nahungku'mo sumo aijo', nambamo na aha mian nu Israel i tampat ponsomban Tumpu lantas i humangmo hi Tumpu sampe i nalom kiijo' mae. Aha nompokilawamo, “O Tumpu, pa' daagi' tionyo ahi' kami mamba mompahampateakon to utu-utus mami mian nu aha Benyamin haha aijo'?” Tumpu nontaami, “Ii' lako'mo.” Mokonyo aijo' suludadu nu aha Israel binaanimo mule', sahingga aha po'ule' mule' nomposadia suludadu nu aha susumo sinaa momonanyo.

²³

²⁴Anu kopinduannyo aha namba nontumbuhi suludadu nu Benyamin aijo'.

²⁵Ka' anu kopinduannyo mule' na mian nu Benyamin haha aijo' nosabat mae nontumbuhi. Ka' mule' aiya aha nompateimo 18.000 na to sulu-suludadu anu ingajanmo mahampate na aha mian nu Israel.

²⁶Jadi, po'ule' mule' namba na aha mian nu Israel i Betel ka' i humang hi Tumpu. Ikiijo' mae aha binapuasa'mo sampe i nalom ka' nonsombahkon koloban pompodame ka' koloban anu opotunu bau bagi nu Tumpu.

²⁷Tempo'nyo aitu Peti' Palajanjian nu Tumpu Allah kiijo' i Betel, ka' i Pinehas, anak i Eleazar, makumpu i Harun, na mokalaja salaku imam. Sahingga aha mian nu Israel nompokilawamo hi Tumpu, “O Tumpu, pa' tionyo ahi' kami daagi' mamba mompahampateakon to utu-utus mami mian nu Benyamin haha aijo', kabai pa' madi'mo kami aiya mamba mahampate?” Tumpu nontaami, “Tumbuhimo na aha! Dodop Ku bee'imo ka'untungan mahampate na belemiu.”

²⁸

²⁹Nohongo pinontaami nu Tumpu aijo', mian nu Israel haha aijo' nompaha potandongmo to sulu-suludadu nu aha i tampat anu madi' otoa-toa kiijo' i Gibea.

³⁰Lantas i sinaa kino itolunnyomo aha nontumbuhimo suludadu nu Benyamin, ingatun nu aha na suludadu gombuannyo mongahopi Gibea susumo anu binaumo nu aha i sinaa momonanyo.

³¹Aha mian nu Benyamin suele nontumbuhimo mae ka' aha madi'mo sininsumbu' na han aijo' nosabatmo nompala'imo kota. Susumo u'utu mae aha lewa'mo nompatei to mia-mian nu Israel i da'erah anu ewa i sambiha' nu kota i jalan mokiijo' i Betel tiba i jalan anu mokiijo' i Gibea. Tolumpulu' na aha mian nu Israel pinatean.

³²Kalana aijo' to mia-mian nu Benyamin monsangka aha po'ule'mo nompatundu' mian nu Israel haha aijo' susumo u'utu mae anu momonanyo. Panyo suludadu nu Israel binatanga'mo da tolosule'mo da bau pongem suludadu nu aha Benyamin aijo' mokiijo' i jalan daka' anu majo'on lengkat i kota.

³³Salatan suludadu nu Israel anu memang ahi' otaha'imani tinolosule'mo ka' nomposadia mule' suludadu kiijo' i Betel-Tamar, aha mian sangalu nu aha anu pino'una' kiijo' i Gibea, sampamo nosabat mae i tampat pinatisulukan nu aha i da'erah sambiha'nyo nu kota.

³⁴Ahamo aijo' na mian anu pinile'anmo nu aha mian nu Israel; konjoo'nyo 10.000 na mian. Sahingga nahampatemo totu-totu'u salatan 10.000 na mian aijo' nontumbuhimo Gibea. Aha mian nu Benyamin madi' hondo-hondo nonsangka na aha madi'mo pin aha mahungku'mo.

³⁵Tumpu nombee'mo ka'untungan mahampate hi mian nu Israel nongewa aha mian nu Benyamin, sahingga i sinaa aijo' aha mian nu Israel nompateimo 25.100 na suludadu nu aha mian Benyamin.

³⁶Atina'je ka' mian nu Benyamin nonsumbu' taalu' aha nahungku'mo. Suludadu nu Israel anu pinile'anmo nontotonggolakonmo nopalai nompala'i aha mian nu Benyamin kalana aha nontaha'imanimo suludadu nu aha i tampat pinaninsulukan kiijo' mae i Gibea.

³⁷Mian haha aijo' anu natisuluk lia-lia' sampamo nontumbuhi Gibea; aha nobagi-bagimo nompinsoopi kota ka' nompatei mian iwi-iwi' ikiijo'.

³⁸Panyo aha sinangaja'mo momonanyo tukoonyo nu aha de tibuk anu daka' ko puha-puhamo mokiita' lengkat i totonga' nu kota aijo',

³⁹suludadu anu pinile'anmo na tionyo ahi' tolosule' ka' montumbuhi sampobali'. Tempo'nyo aitu aha mian nu Benyamin nompateimo 30 na suludadu nu aha Israel ka' nonsangkamo tukoonyo nu aha, aha po'ule'mo nohungku'i to mia-mian nu Israel susumo uuka mae momona.

⁴⁰Panyo monti-montiik tibuk kino puha-puhamo nokiita' lengkat mae i totonga' nu kota Gibea. Aha mian nu Benyamin tinolokengkengmo salatan aha nosiloi ka' nontoamo iwi-iwi' kota nu aha nopapumo.

⁴¹Ka' tempo'nyo aijo' suele suludadu nu Israel anu pinile'anmo nobalikmo ka' nontumbuhimo, sahingga suludadu nu aha Benyamin aijo' tinasiagamo kalana sinumbu'mo nu aha na aha aijo' tantu mahungku'mo.

⁴²Jadi aha nalaimo nompala'i mian nu Israel nambamo i da'erah padang anu mapeges, panyo aha madi' noko ala nopalai. Aha nati'una'mo i totonga' tinikubanmo nu suludadu anu pinile'anmo nu Israel tiba suludadu sangga'at anu tempo'nyo aijo' tinokamo mae lengkat i kota. Mian nu Benyamin nonta'upmo hondo kasansala'an kalana nahungku'mo.

⁴³Aha mian nu Israel nontumbuhimo ka' sabole-bolemo nololoi' tinoka-toka nokiijo' i sa'angu' na tampat sasu kabete'an Gibea. Hau-haunyo mololoi' aha nompateimo,

⁴⁴18.000 na suludadu anu pinile'anmo aijo'mo suludadu nu aha Benyamin.

⁴⁵Suludadu nu aha Benyamin sangga'at nobalikmo ka' nopalaimo namba i da'erah nu padang anu mapeges nokiijo'mo i to bungkut-bungkutnyo nu batu kiijo' mae i Rimon. Aha 5.000 na mian, pinatean i totongan nu jalan. Sangga'at sabole-bolemo i loloi' tinoka-toka i Gideom. Mian haha aijo' 2.000 na mian anu pinatean.

⁴⁶Jadi suludadu nu aha Benyamin anu pinatean i sinaa aitu 25.000 na mian — iwi-iwi' aijo' suludadu anu to babaani.

⁴⁷Panyo aha anu nopalai notulu i da'erah padang anu mapeges nokiijo' i to bungku-bungkutnyo batu Rimon 600 na mian anu nolapas madi' pinoko ala pinatean. Aha jinojoong kiijo' i Rimon ingopat na bitu'on na kinopinnyo.

⁴⁸Lapas aijo' mian nu Israel po'ule' mule' ninsusule' lantas nontumbuhimo ka' nompateimo iwi-iwi' mian nu aha Benyamin anu tinontuha' — mo'ane boune, to ana-anak ka' suele binatang. Iwi-iwi' na kota i da'erah aijo' pinapuanmo nu aha.