Read Saluan TO MIA-MIAN KOPIAN 21 Bible Online

TO MIA-MIAN KOPIAN 21 - Saluan bible

TO MIA-MIAN KOPIAN 21

¹Salatan aha mian nu Israel sinihukmo i Mizpa, aha nonjanji'mo hi Tumpu tukoonyo nu aha, mau pe'e ola samian na aha madi' timbali mompobee' anaknyo langkoyang timbali bengkele' nu aha mian Benyamin.

²Uuka aha nambamo i Betel ka' sinumuhang lewa' susa' na kinyonyoa sampe i nalom i ahop nu Tumpu. Aha i humang ka' notatae,

³“O Tumpu, Tumpu Allah nu Mian Israel, kadaka' iwi-iwi' aiya jinadimo susumo aiya. Aha tulunan nu bansa Benyamin, sala'sa'angu' na tulunan nu bansa mami, ohanimo mingkot!”

⁴Dodododopnyo subu-subu hondo mian nu Israel nompotinjomo sa'angu' na mezbah i kiijo' lantas nonsombakkonmo hi Tumpu koloban anu opotunu tiba koloban bau pompodame.

⁵Lapas aijo' pinaha pokilawamo nu aha na to tulu-tulunan nu bansa Israel pa' daagi ko anu madi' namba sinihuk i ahop nu Tumpu kiijo' i Mizpa u'utu mae. (Tempo'nyo aitu aha binasumpa'mo tukoonyo nu aha mian anu nohongo-hongo polaga namba i Mizpa hukumannyo tionyo ahi' opatei.)

⁶Mian nu Israel nolibosmo hi to utu-utusnyo aha tulunan mae nu bansa Benyamin; aha notatae, “Sinaa aiya Israel madi'mo ko tulunan nu bansa sa'angu'.

⁷Pa' mosia na kita mombau da aha mian nu Benyamin anu daagi tinontuha' aiya mohumpak bengkele', kalana kita binasumpa'mo hi Tumpu tukoonto, kita madi' mompobee' to ana-anak langkoyang to timbali bengkele' nu aha mian Benyamin?”

⁸Sahingga pinaha pokilawamo nu aha pa' daagi' ko sa'angu' na tulunan nu bansa Israel anu madi' namba sinihuk i Mizpa. Jadi salatan sinumbu'mo nu aha taalu' aha mian nu Yabea i daerah Gilead na madi' i namba i Mizpa.

⁹Kalana pinalesamo i daputan madi' koanu kiijo' tuli-tulis na mian nu Yabes.

¹⁰Kalana aijo' to mia-mian anu sinihuk i Betel aijo' nonsaimo 12.000 na mian anu baani hondo anu aijo' hi aha da mamba mompatei toto samian kiijo' i Yabes, tibamo to bou-boune, ka' to ana-anak.

¹¹Aha pinalentah da mompatei iwi-iwi' na to momo ane tiba suele to bou-boune anu toho'mo no osoa.

¹²Jadi aha tomia-mian anu jojoong i Yabes i humpak nu aha 400 na anu ma'isa toho no osoa. Binoa nu aha na langkoyang haha aijo' i binakemah'an nu aha kiijo' i Silo i lipu' nu Kana'an.

¹³Lapas aijo' iwi-iwi' na mian nu Israel nonsaimo bobotokon hi to mia-mian nu Benyamin anu kiita mae ito bungkut-bungkutnyo nu batu Rimon kahanda' monsale'i da baladamemo.

¹⁴Kalana aijo' aha mian nu Benyamin haha aijo' ninsusule'mo, lantas binee'anmo nu mian Israel na aha to lalangkoyang anu lengkat mae i Yabes anu madi' pinatean. Panyo konjoo'nyo nu langkoyang haha aijo' madi' sinampa' hi aha mian nu Benyamin haha aijo'.

¹⁵Mian nu Israel nolibosmo hi aha mian nu Benyamin, kalana Tumpu madi'mo nomposa'angu' tulunan nu bansa Israel haha aijo'.

¹⁶Kalana aijo' to tu'a-tu'anyo anu sinihuk i Betel aijo' notataemo, “Hi aha tulunan nu bansa Benyamin madi'mo ko bounenyo. Panyo bemanau'; kita madi' timbali mompobee' to ana-anakto lalangkoyang mo osoa tiba aha, kalana kita nonsumpa'akonmo toto samian anu aiya hi kita madi' timbali mompobee' anaknyo lalangkoyang mo osoa tiba aha mian nu Benyamin! Jadi apaa na anu tionyo ahi' obaunto hi aha anu tinontuha' aiya da aha timbali mohumpak bengkele' suele? Da boli Israel anu sampulu' ka' ohua' na tulunan nu bansa mingkot na sa'angu' na tulunan nu bansa. Kita tionyo ahi' molio jalan da tulunan nu bansa Benyamin saja' ko lee'nyo ka' tataap tano' nu aha saja' aha na tumpunyo.”

¹⁹Sumo uuka'na koonyo nu aha, “daagi ko jalan sa'angu', aijo'mo ko lamean anu saja' obau sataun toka sataun kiijo' i Silo, monsombah Tumpu.” (I Sasu salatan silo aiya daagi ko kota Betel ka i sasu kinsobannyo daagi ko jalan daka'lengkat mae i Betel mokiijo' i Sikhem ka' i sasu utaranyo ko kota Lebona.)

²⁰Jadi to tu'a-tu'anyo anu sinihuk i Betel aijo' notataemo hi to mia-mian nu Benyamin anu daagi tinontuha' aijo', “Lako mamba pintatampung kiijo' mae i ale' nu anggur haha kiijo' i Silo,

²¹ka' otanda'i ikiijo'. Saidi' mae de to lalangkoyang nu aha Silo mosabatmo mae mamba monsalelei i lamean anu obau sataun toka sataun monsombah Tumpu, belemiu mosabatmo mae i ale' nu anggur haha aijo' lantas toto samian mohakopmo samian na langkoyang nu aha ka' opalaihakon mamba i daerah Benyamin da baumo bengkele' nu belemiu.

²²De tuumanyo kabai utusnyo mo ane toka mae montuntut ia, tionyo ahi' otaloakon miu, 'O kakase mami pobee'mo mae na aha hi kami. Kami madi' nompahuhuakon aha i unonu pahampatean. Sahingga kalana aijo' belemiu madi'mo mompobee' mae aha hi kami, belemiu madi nolanggai janji jadi madi' ko sala'nyo.’ ”

²³Jadi mian nu Benyamin haha aijo' nombaumo apaa na anu pinoto'imo hi aha. Aha toto samian nompopalaihakonmo samian na langkoyang anu tinoka mae monsalelei kiijo' i Silo. Lapas aijo' aha ninsusule'mo i posi daerah nu aha ka' po ule'mo nombau kota nu aha iwi-iwi' ka' tinataapmo na aha kiijo' mae.

²⁴Mian nu Israel haha aijo' sangga'at suele nambamo. Aha ninsusule'mo i tano' nu aha i daerah nu aha toto samian, hi posi-posi aha mae sa'anakan ka' hi tulunan mae nu bansanyo.

²⁵ Tempo'nyo aitu ma'isa kino Tomundo'nyo hi aha Israel. Batu-batu mian mombau apa-apaa asan anu nu tutugi totu'u. 70