Read Saluan TO MIA-MIAN KOPIAN 4 Bible Online

TO MIA-MIAN KOPIAN 4 - Saluan bible

TO MIA-MIAN KOPIAN 4

¹Salatan i Ehud sinilakamo, bansa Israel po'ule' mule' binaladosa' hi Tumpu.

²Sahingga Tumpu nompojohokmo aha da i hungku'an i Yabin tomundo nu aha Kana'an anu jojoong i kota Hazor. Kapala nu suludadu anu matangkas hondo na pangkatnyo aijo'mo i Sisera anu jojoong i Harose-Hagoyim.

³I Yabin daagi' ko kareta 900 anu opake mahampate besak na binau. Inguampulu' na taun na kinopinnyo ia nompalentah aha mian nu Israel ka' talalo hondo masigo. Lapas aijo' aha nomoitamo tulung hi Tumpu.

⁴Tempo'nyo aitu polaya' nu aha mian Israel samian na nabi boune sanggonyo i Debora, bengkele' i Lapidot.

⁵I Debora toto minsan mongka'ima'i lewa' sumuhang i patu nu kau' kurma, olotnyo nu Rama tiba Betel, i da'erah nu bungkutnyo Efraim. Ka' ikiijo'mo na to mia-mian nu aha Israel toka mompoita pokinde' hi ia.

⁶Daagi' kino sansinaan ia nompokaumo mian molaga i Barak, anak i Abinoam anu kiijo' mae i kota Kedes i da'erah Naftali. Lantas pinoto'inyomo hi Barak, “Sumo uuka na palentah nu Tumpu, Tumpu Allah nu Israel toka hi beleyum; 'Posihuk na to momo'ane 10.000 na mian anu hi aha tulunan i Naftali tiba hi Zebulon, ka' oboa na aha i Bungkutnyo nu Tabor.

⁷Ku potimbalije na i Sisera anu mongkapalai suludadu i Yabin, anu matangkas hondo na pangkatnyo aijo' montumbuhi mae belemiu kiijo' i Kaunyo nu Kison tiba to sulu-suludadunyo ka' to kare-kareta anu bau pahampate mongewa belemiu. Panyo Ku po'untungje na belemiu i pahampatean aijo'.’ ”

⁸I Barak notataemo hi Debora, “De belento mamba, aku suele mamba. Panyo de madi', aku suele madi' mamba.”

⁹Tinaaman i Debora, “Ii', aku mamba! Panyo soba tutugi, misa' beleyum na saidi' mae o angga'i. Panyo samian na boune na anu bau pohungku'i nu Tumpu i Sisera.” Sahingga nambamo na i Debora hingga-hinggat tiba i Barak i Kedes.

¹⁰Ka' i Barak nomboamo tulunan nu bansa Zebulon tiba Naftali namba i Kedes. Anu nombatuki i Barak tiba i Debora tempo'nyo aitu 10.000 na mian.

¹¹Tempo'nyo aitu i Heber, mian nu Keni, madi'mo natigalum i bansanyo. (Bansa Keni lee' mae i Hobab, dawok i Musa.) I Heber nambamo nompotinjo to kemah-kemahnyo koko kau' terpentin kiijo' i Zaanaim, madi' majo'on lengkat i Kedes.

¹²Salatan i Sisera nohongomo taalu' i Barak nambamo i Bungkutnyo nu Tabor,

¹³ia nomposihukmo sio'atu na karetanyo anu bau pahampate besak na binau, hingga-hinggat tiba iwi-iwi' na suludadunyo lantas nomboamo aha lengkat mae i Haroset-Hagoyim nokiijo' i Kaunyo nu Kison.

¹⁴Lantas notataemo na i Debora hi Barak, “Donganmo, tumbuhi! Tumpu na molaya' belemiu. Sinaa aiya Ia mompo'untungmo belemiu mahampate mongewa i Sisera.” Sahingga nintatau'mo mae na i Barak lengkat mae i Bungkutnyo nu Tabor hingga-hinggat tiba aha sampulu' na madala na miannyo.

¹⁵Lapas aijo' nontumbuhimo i Sisera. Ka' Tumpu nomposungkehetmo iwi-iwi' na gombuan nu suludadu i Sisera ka' to kare-kareta anu bau pahampatenyo sahingga i Sisera nintatau'mo madi'mo naninsake' i karetanyo, lantas nopalaimo i lumajang tengke.

¹⁶I Barak nololoi'mo to kare-kareta anu bau pahampate tiba suludadu nu sampobali'nyo haha aijo' tinoka-toka i Haroset-Hogayim lantas iwi-iwi' na suludadu i Sisera aijo' pinateannyomo; maupe'e ola samian madi' ko anu pinotumuu'.

¹⁷Hau-haunyo aijo' i Sisera nopalaimo namba i kemah hi Yael, bengkele' i Heber, mian nu Keni aijo'. Kalana i Tomundo Yabin anu kiijo' i Hazor mobela' tiba to utu-utus i Heber aijo'.

¹⁸Salatan i Sisera tinokamo, i Yael nolabotmo ia ka' nompoto'i, “Imbo' Tuan, pinsoopmo mae i kemah-ku, boli mabuhuk.” Sahingga i Sisera ninsoopmo i kemah aijo' kinulubanmo i Yael nu hude lalanse' da ia madi' otoa-toa.

¹⁹Koonyo i Sisera hi Yael, “Tulungi bee'iakon mae uee sangkiding na aku da ku inum; aku negotmo.” Sahingga i Yael nongukap kolop nu anu pinongisian susu ka' pino'inum hi Sisera, lapas aijo' po'ule'mo kinulubannyo nu hude lalanse'.

²⁰Lantas i Sisera notataemo hi Yael, “Lako' tinjo i ahop nu sabatan nu kemah. De mian toka mompokilawa hi beleyum pa' daagi' ko mian i uuka, opoto'i madi' ko anu aiya.”

²¹I Sisera tahahumo nalawe, sahingga ia natatundu'mo lantas kinahoyotanmo. I Yael nongalamo sa'angu' na malatelu ka' sangkau na kau' pakakas nu kemah, lantas jinolonyomo nokiijo' na i Sisera. Lapas aijo' pinopasoknyomo na kau' aijo' i buan nu ajenyo sahingga i lampasan tinoka-toka i tano'. Sumo aijo' na i Yael nompatei i Sisera.

²²Salatan i Barak tinokamo nolio i Sisera i Yael nolabotmo i Barak ka' notatae hi ia, “Imbo' da ku potiju' hi belento na mian anu olio nu belento aijo'.” I Barak ninsoopmo tiba i Yael lantas tinoanyo na i Sisera ainilakamo timpa-timpas i tano' ka' kau' pakakas nu kemah paso-pasok i buan nu ajenyo.

²³Sinaa aijo' Tumpu nompo'untungmo nahampate na mian nu Israel nongewa i Yabin, tomundo nu Kana'an.

²⁴Tomundo aijo' saja'mo otumbuhi nu aha mian Israel sahingga ahennyo ia sinilakamo.