Read Saluan TO MIA-MIAN KOPIAN 5 Bible Online

TO MIA-MIAN KOPIAN 5 - Saluan bible

TO MIA-MIAN KOPIAN 5

¹Sinaa aitu nanyanyimo na i Debora tiba i Barak anak i Abinoam. Sumo uuka na koonyo nu aha:

²Opuji' na Tumpu kalana suludadu iwi-iwi' nu aha mian Israel mongka'oho'mo mahampate, ka' mian da'isan suele mongka'oho'mo mamba mahampate.

³Potombihing belemiu to tomu-tomundo ka' to anak-anak nu tomundo aku monyanyiakonmo Tumpu Allah nu aha mian Israel, aijo'mo Tumpu.

⁴Tempo'nyo belento nambamo lengkat mae i Seir, o Tumpu, ka' da'erah nu Edom pinala'ianmo mae nu belento dunia ginayu'anmo, got nu uee anu kiita' i langit nolosutmo, ka' kundom nombulakakonmo ueenyo.

⁵ To bungku-bungkutnyo ginayu'anmo i ahop nu anu mongkuasai Sinai, i ahop nu Tumpu, Tumpu Allah nu aha mian Israel.

⁶Tempo'nyo i Samgar, anak i Anat, ka' tempo'nyo suele i Yael, i lipu' madi'mo ko anu lumambanan sumake' i unta, madi'mo ko anu lumambanan lumajang i jalan daka'.

⁷Iwi-iwi' na kota nu aha Israel madi'mo ko anu jinojoong, i liingmo sahingga belento Debora, tinokamo mae; belento tinoka mae sumomo tina anu okanonongi.

⁸Salatan Israel nonsombahmo pilogot, sinidamo na pahampatean i lipu' nu aha; aha anu 40.000 na suludadu nu bansa, mau pe'e ola samian madi' ko anu nontangkakon pimuhuknyo.

⁹Kona hi aha kapala nu suludadu nu aha Israel anu matangkas hondo na pangkatnyo anu sanang na kinyonyoanyo nompoita mamba mahampate talalo hondo ku angga'i. Opuji' na Tumpu!

¹⁰Obelemiu anu monsilakai keledai mopute', belemiu anu suha-suhang i ampas anu ma'ima', ka' belemiu iwi-iwi' anu lumajang tengke, polelemo na sisikon anu inguntung na nahampate aijo'!

¹¹Koko bubung haha aijo' i hongomo na mian balame-lame', nonsisikmo Tumpu saja' inguntung na nahampate, Israel inguntung na nahampate, mian anu pinalesayamo hi Tumpu. Sahingga aha nojijimo nambamo i sabatan daka' nu kota.

¹²Tinjomo Debora, ka' panyanyimo. Tinjomo Barak, boamo na anu tinalungku'!

¹³Suludadu anu me tuha'nyo tinokamo hi polaya' nu aha, aha tinokamo ka' kahanda'mo mahampate montinjohakon Ia.

¹⁴Aha i lumajangmo lengkat mae i Efraim nambamo i bangka'nyo, nombatuki suludadu, i Benyamin na nojiji i ahop nu aha. Lengkat mae i Makhir tinokamo na to kapa-kapala nu suludadu anu matangkas hondo na pangkatnyo, ka' lengkat mae i Zebulon tinokamo na to pola-polaya' nu suludadu.

¹⁵To tu'a-tu'anyo nu aha Isakhar tinokamo tiba i Debora, suele, i Isakhar tinokamo, ka' i Barak suele i namba aha nombatuki ia nokaiyong i bangka'nyo. Panyo tulunan nu bansa Ruben daagi' lewa' mompotutugakon tanga'an kalana aijo' hi aha tanga'an nu aha ma'isa nosa'angu'.

¹⁶Kadaka' aha ola jojoong i to domba-domba? Pa' ola da mompotombihing polaya' domba molaga potuu'onnyo? Memang tulunan nu bansa Ruben daagi' lewa' mompotutugakon tanga'an, kalana aijo' hi aha tanga'an nu aha ma'isa nosa'angu'.

¹⁷Hau-haunyo aitu i Zebulon tiba i Naftali nongewamo totu-totu'u na nahampate, tulunan nu bansa Dan ola sinumake' i kapan, ka' tulunan nu bansa Gad ola jojoong kiijo' mae i santoa nu Yordan sasu kabete'an, ka' mule' tulunan nu bansa Asyer ola momohokot ka' madi' malai mompala'i kajojoongan nu aha i sonibi nu bone'.

¹⁹Kiijo' i Tanaakh koko kaunyo nu Megido, to tomu-tomundo nahampatemo, To tomu-tomundo nu Kana'an nahampatemo, panyo salaka madi' ko anu binoa mae nu aha salaku anu pinahuhuakon mae.

²⁰to manda-mandala' suele nahampatemo nongewa Sisera, lengkat mae aita' i langa.

²¹Kaunyo nu Kison nosawemo nonganjuhakonmo sampobali' nu aha. Tumbuhimo, tumbuhimo babaani ka' paho-pahoson o kinyonyoangku!

²²Tengke nu ajahan nonggalapakmo kalana nopadeka'mo lia-lia' kalana tinigamo nu aha nonsake'i.

²³“Okutuki na Meros, ka' anu jojoong ikiijo',” na koonyo nu malaekat nu Tumpu “kalana aha madi' tinoka mae nontulungi salaku suludadu anu mahampate bau pompopodaka' Tumpu.”

²⁴Inguntungmo na i Yael, bengkele' i Heber mian nu Keni; aha iwi-iwi' anu jojoong i kemah, iamo na anu talalo mohumpak balakat.

²⁵I Sisera nomoita uee, panyo susu na binee'nyo hi ia, i mangko' anu ko angga'nyo na pinombee'iannyo susu hi to tomu-tomundo.

²⁶Kau' pakakas nu kemah ka' malatelu i limanyo na i Yael nompatei i Sisera sahingga nobiha' na ubaknyo.

²⁷I tengke i Yael na ia notua' madi'mo kino nyawanyo timpa-timpas i tano' sinilakamo.

²⁸I jalaja' nu tolongan na pinonsiligian nu bengkele' i Sisera, ka' notatae, “Kadaka' karetanyo madi'mo tinoka, kadaka' madi'mo i hongo na galupak nu ajahannyo?”

²⁹Aha to posa-posaihon boune anu manonong hondo na kinyonyoanyo nontaamimo sumo anu i hongonyomo i uno nu kinyonyoanyo:

³⁰“Aha hau-haunyo nombagi-bagimo anu pinahuhuakon na to bala-balang toto samian na suludadu, nohumpak samian kabai ua'aha na to lalangkoyang anu ma'isa toho' no'osoa. Kakona hi Sisera, i humpak na baju' anu ko angga'nyo hondo, da obee' hi bengkele' nu tomundo, salendang anu ko suji'nyo manjoo' na ngangahan nu buhitnyo.”

³¹O amalakon da iwi-iwi' na sampobali' nu belento o Tumpu, mate susumo i Sisera, panyo iwi-iwi' na anu mompahasumbu' belento Tumpu talasanggo susumo jingka aita' i langa! Lapas aijo', madi'mo ko anu nompoposia lipu' aijo' pinatompulu' na taun na kinopinnyo.