Read Saluan TO MIA-MIAN KOPIAN 7 Bible Online

TO MIA-MIAN KOPIAN 7 - Saluan bible

TO MIA-MIAN KOPIAN 7

¹Daagi' kino sansinaan i Gideon tiba to sanga-sangalunyo iwi-iwi' nobulamo subu-subu hondo. Aha nambamo ka' nombaumo kemah koko bulakan nu uee Harod. Pinombauan kemah nu mian Midian i sasu utara i tampat nu aha aijo', i bangka'nyo koko Bungkutnyo nu More.

²Tumpu notataemo hi Gideon, “Anu monsangalui beleyum talalo manjoo'. Aku madi' mombee'i ka'untungan mahampate hi aha mongewa mian nu Midian, kalana dumo nusangka' nu aha tukoonyo aha inguntung na nahampate kalana posi kahosonan nu aha, sahingga aha madi'mo mompuji' Aku.

³ Jadi, poto'i hi to sanga-sangalu nu beleyum, 'Ihe na mongoa'i mabuhuk sampa malia-lia' pala'i na Bungkutnyo nu Gilead aiya ka' pinsusule' i laigannyo.’ ” Sahingga 22.000 na mian anu ninsusule'mo; ka' ola 10.000 na mian anu jinojoong.

⁴Lantas Tumpu po'ule' mule' notatae hi Gideon, “Anu monsangalui beleyum daagi' talalo manjoo'. Boa na aha i kaunyo. Ikiijo' mae ku pile'i na aha ihe na anu monsangalui beleyum. De Ku poto'i hi beleyum, 'Mian aijo' tionyo ahi' mamba tiba beleyum,' ia tionyo ahi' mamba. Panyo de Ku poto'i, 'Mian aijo' madi' timbali mamba tiba beleyum,' ia madi' timbali mamba,”

⁵sahingga binoamo i Gideon na mian haha aijo' i kaunyo, lantas Tumpu notataemo hi Gideon, “Mian anu monjila' uee susumo dedeng, tionyo ahi' nu posi po'iwi' boli opogalum hi mian anu natijengket na monginum.”

⁶Sahingga aha 300 na mian anu nonjila'i uee anu tinauknyo nu limanyo; iwi-iwi' sangga'at natijengket na nonginum.

⁷Lapas aijo' pinoto'imo nu Tumpu hi Gideon, “Aha tolu'atu na mian anu nonjila'i uee aijo', Ku pobebasmo na belemiu, ka' mombee'imo ka'untungan mahampate na belemiu mongewa aha mian nu Midian. Saimo na sangga'at da minsusule'mo.”

⁸Kalana aijo' i Gideon nonsaimo iwi-iwi' mian nu Israel sangga'at da minsusule'mo, panyo aha tolu'atu aijo' na jojoong. Mantu iwi-iwi' ka' tolompet ingalamo hi mian haha aijo' anu minsusule'mo. Mian nu Midian kiijo' i bangka'nyo i aluk nu tampat anu pinombauan kemah nu aha mian Israel.

⁹Pihi-pihi aitu Tumpu notataemo hi Gideon, “Pobulamo, Gideon! Lako'mo tumbuhi na kemah nu aha mian Midian. Ku bee'mo na ka'untungan mahampate hi belemiu mongewa aha.

¹⁰Panyo de beleyum mabuhuk, ende na i Pura posaihon nu beleyum aijo', mamba hingga-hinggat i pinombauan kemah nu aha sampobali'.

¹¹Nu hongoje apaa na anu nusale'akon nu sampobali' ka' han aijo' na mompotimbali beleyum baanimo na montumbuhi.” Lantas nambamo na i Gideon tiba i Pura, kiijo' i potempasan pinombauan kemah nu aha sampobali'.

¹²Mian nu Midian, Amalek tiba mian haha aijo' sangga'at anu nolengkat mae i padang bone' nonsongkohimo bangka'nyo aijo' iyaya mae. Sumomo kihi-kihi' anu nodumpukmo na otoa. To unta-unta nu aha manjoo' hondo sumomo bone' i sonibi nu ambai.

¹³Salatan i Gideon tinokamo ikiijo', ia nohongomo samian hau-haunyo monsisik anu ingipinyo hi sangalunyo. Mian aijo' notatae sumo uuka, “Aku nongipi sa'angu' na batuan nu roti noluntun ninsoop i pinombauanto kemah lantas nontumpak sa'angu' na kemah. Kemah aijo' nohobo' sahingga nahatamo susumo tano'.”

¹⁴Sangalunyo nontaami, “Ibeh, itina' na ugat ahi' bajak i Gideon anak i Yoas, mian nu Israel aijo'! Aijo' alati'nyo Tumpu Allah nombee'mo ka'untungan hi ia mahampate mongewa mian nu Midian tiba iwi-iwi' na suludadunto!”

¹⁵Salatan i Gideon nohongomo anu ingipi nu mian aijo' tiba mule' alati'nyo, ia tinolodadupumo nonsombah Tumpu Allah. Lapas aijo' ia ninsusule'mo i pinombauan kemah nu aha Israel ka' notatae, “Pahapotoukamo! Tumpu mombee'imo ka'untungan mahampate mongewa suludadu nu aha Midian!”

¹⁶Lantas i Gideon nombagimo aha tolu'atu na sangalunyo aijo' tinimbali totolu' na tompukannyo. Toto samian binee'an sa'angu' na tolompet ka' sa'angu' na tampat anu ko isinyo pansona'.

¹⁷Koonyo i Gideon hi aha, “De aku tokamo i potempasan pinombauan kemah nu aha mian Midian, palahatikan ima-ima' ka' obau apaa na anu binaungkumo.

¹⁸De aku tiba suludadungku mompuhimo tolompet belemiu suelemo ahi' mompuhimo tolompet miu. Lantas belemiu tionyo ahi' molobo'mo aijo' titikub i pinombauan nu aha kemah nu aha aijo', 'Baumo bagi nu Tumpu ka' bagi i Gideon!’ ”

¹⁹Mongohanimo tonga' pahu, i Gideon tiba to mia-miannyo tinokamo i potempasan pinombauan kemah nu aha sampobali'. Tempo'nyo aitu mian anu monjagai kemah haha aijo', sala'je nobolos na nonjagai. Lantas i Gideon ka' suludadunyo nompuhimo tolompet ka' nompahamposo'akonmo tampat pongisian pansona' nu aha.

²⁰Tompukan ko ohua'nyo sangga'at nombaumo suele sumo aijo'. Lantas aha iwi-iwi' nohangkatmo to panso-pansona' nu aha i kowi nu aha ka' nompuhimo tolompet anu i koanan nu aha. Aha nolobo'mo, “Bajak opake bau bagi' nu Tumpu ka' bau bagi i Gideon!”

²¹Aha iwi-iwi' satinjonyo i katinjoan nu aha toto samian montikubi kemah nu aha aijo'. Sahingga iwi-iwi' na suludadu nu aha sampobali' aijo' nompala'imo ka' madi'mo nompaha sumbu-sumbu' sangalu ka' lewa'mo naha loobo'an.

²²Salatan i Gideon tiba to mia-mian sangalunyo nompuhimo tolompet nu aha, Tumpu nompotimbalimo suludadu nu sampobali' haha aijo' nompaha taba-tabasmo samian ka' samian nu bajak. Aha nalaimo i sasu Zerera kojo'onnyo tinoka-toka i Bet-Sita tiba i kota Abel-Mehola koko Tabat.

²³Sahingga aha tulunan nu bansa Naftali, Asyer, tiba tulunan nu bansa Manasye anu i sasu kabete'an kabai anu i sasu kinsoban Kaunyo nu Yordan suele i lagamo. Lantas aha nololoi'mo suludadu nu Midian.

²⁴Ka' mule' nambamo hi iwi-iwi' na bungkutnyo da'erah nu Efraim i Gideon nompotuunmo lele polaga sumo uuka, “Imbo' pintudun mae mompahampateakonmo aha mian nu Midian. Po'ago ka' boli obee' na Kaunyo nu Yordan tiba iwi-iwi' na panga'nyo nu kaunyo kojo'onnyo toka-toka i Bet-Bara. Boli opobee' na aha mian nu Midian motaap kiijo' mae.” Sahingga suele aha mian nu Efraim pinalentahmo, lantas aha nompo'agomo da boli o ala na Kaunyo nu Yordan tiba iwi-iwi' na panga'nyo nu kaunyo toka-toka i Bet-Bara na kojo'onnyo.

²⁵Ua'aha na polaya' nu bansa Midian aijo'mo i Oreb tiba i Zeep i hakopmo nu aha. I Oreb pinateanmo kiijo' i Batu Oreb ka' i Zeep pinateanmo kiijo' i tampat pompao'an anggur i Zeep. Mian nu Efraim haha aijo' sabole-bolemo nololoi' aha mian nu Midian lantas nomboamo mae ubak i Oreb tiba i Zeep hi Gideon i santoa nu Kaunyo Yordan sasu kabete'an.