Read Saluan TO MIA-MIAN KOPIAN 8 Bible Online

TO MIA-MIAN KOPIAN 8 - Saluan bible

TO MIA-MIAN KOPIAN 8

¹Mian nu Efraim notataemo hi Gideon, “Kadaka' kami madi' ingende tempo'nyo belento namba nahampate nongewa aha mian nu Midian? Apaa na sababnyo binaumo nu belento na kami sumo aijo'?” Sumo aijo' na aha nosonsonmo hi Gideon.

²Panyo tinaaman i Gideon, “Apaa na anu binaungkumo madi' ko sanggonyo de opokakanakon tiba apaa na anu binaumo nu belemiu. Mau mule' anu binaumo nu belemiu aijo' ola sangkiding, panyo anu ola sangkiding aijo' lebe ko angga'nyo molingkudui apaa na anu binaumo iwi-iwi' nu suludadungku.

³ Belemiumo na nohumpak kuasa hi Tumpu Allah sahingga noko alamo nompatei i Oreb tiba i Zeep, ua'aha na polaya' nu Midian aijo'! De opokakanakon tiba aijo' apaa na anu pinoko alamo binaungku?” Noko taloakon na i Gideon sumo aijo' aha madi'mo notambuha'.

⁴Tempo'nyo aijo' i Gideon tiba aha tolu'atu na suludadunyo tinokamo i santoa nu Kaunyo Yordan. Aha nalawemo hondo panyo daagi' saja' mololoi' sampobali'.

⁵Lapas aijo' aha tinokamo i Sukot. Ikiijo' i Gideon notataemo hi anu jojoong i kota aijo', “Tulungi mae bee'i na suludadungku sangkiding na anu okaan. Aha nalawemo hondo panyo kami daagi' sabole-bole mololoi' i Zebah tiba i Salmuna, to tomu-tomundo nu aha Midian haha aijo'.”

⁶To pola-polaya' i Sukot aijo' nontaami, “Ha, belemiu ma'isa nohakop i Zebah tiba i Salmuna, belemiu momoitamo anu okaan! Apaa na gunanyo suludadu nu beleyum obee'i anu okaan?”

⁷Sahingga notataemo na i Gideon, “Sumo itina'mo! Bakas de Tumpu mombee'imo ka'untungan mahampate hi belengku, mongewa i Zebah ka' i Salmuna, belemiu ku dokeje nu hii' tiba unok lengkat mae i padang bone'!”

⁸Lapas aijo' i Gideon pu'ule'mo namba lantas tinokamo i Pnuel. Ikiijo' mae suele ia nomoita anu okaan da obee' hi to sulu-suludadunyo. Panyo pinontaami nu aha mian Pnuel pokakana tiba pinontaami nu aha mian Sukot.

⁹Mokonyo aijo' i Gideon notataemo hi aha, “Minsusule'je mae na aku ka' salamat mae. Ka' tempo' aijo' ku hobo'akonje na laigan tangka-tangkas i kota aiya!”

¹⁰Hau-haunyo aijo' i Zebah ka' i Salmuna tiba iwi-iwi' na suludadu nu aha kiijo'mo i Karkor. Iwi-iwi' na suludadu nu aha mian anu kiijo' i padang bone' ugat ola 15.000 na mian anu daagi' tinontuha'; 120.000 na suludadu sinilakamo.

¹¹I Gideon nontusakonmo potempasan nu padang bone' i sasu kabete'an Nobah tiba Yogbeha lantas pinotolokengkengnyomo na nontumbuhi sampobali'nyo.

¹²I Zebah ka' i Salmuna, ua'aha na tomundo nu Midian aijo' nopalaimo panyo i loloi'mo i Hideon ka' i hakopmo na aha sahingga iwi-iwi' na suludadu nu aha sinusa'mo hondo.

¹³Noko pahampate aha ninsusule'mo mae, i Gideon nontulumo jalan i pindakoan nu Heres.

¹⁴Ikiijo' ia nohakop samian na olitau anu lengkat mae i Sukot, lantas pinokilawanyomo hi mian aijo' na sanggo nu to pola-polaya' kiijo' i Sukot. Sahingga mian aijo' nontulismo sanggo nu aha ka' binee'nyomo hi Gideon — iwi-iwi' 77 na mian.

¹⁵Lapas aijo' i Gideon nambamo hi to pola-polaya' nu kota aijo' ka' notatae, “Tantu daagi' o inau' miu na belemiu madi' nongka'oho' nontulungi aku kalana aku ma'isa nohakop i Zebah ka' i Salmuna, kabai mosia! Belemiu madi' nongka'oho' nombee'i anu okaan hi to sulu-suludadungku; padaham aha nalawemo hondo tempo'nyo aitu. Toa aiyamo na i Zebah tiba i Salmuna.”

¹⁶Lapas aijo' i Gideon nongalamo hii' tiba unok anu lengkat mae i padang bone' lantas nompahandokeakonmo polaya' haha aijo' i kota Sukot aijo'.

¹⁷Ka' suele kiijo' i Pnuel i hobo'akonnyomo na laigan tangka-tangkas ka' nompateimo to momo'ane iwi-iwi' i kota aijo'.

¹⁸Lapas aijo' i Gideon nompokilawamo hi Zebah tiba hi Salmuna “Mosia na to ohu-ohup nu mian anu pinateanmo nu belemiu kiijo' i Tabor?” I Zebah tiba i Salmuna nontaamimo, “Aha iwi-iwi' moho-moho' montiho belento, sumo lee' mae nu to mia-mian daka'.”

¹⁹“Aijo'mo na to utu-utusku — to ana-anak nu tinangku,” na koonyo i Gideon. “Bisuannyo belemiu madi' nompatei aha, mate pe'e na aku, de aku mompatei suele belemiu.”

²⁰Lantas pinoto'imo i Gideon hi Yeter, anaknyo tumpe, “Pateimo na aha!” Panyo i Yeter daagi' olitau ma'isa talalo tu'anyo. Jadi, ia mabuhuk sahingga ia madi' nongkeat bajaknyo ka' nompatei.

²¹Koonyo i Zebah tiba i Salmuna hi Gideon, “Taho' de beleyum mo'ane, pateimo mae na kami nu posi limaum!” Sahingga pinateanmo i Gideon na aha lantas ingalanyomo iwi-iwi' na mainan anu kona-kona i gogohong anu aijo' i unta nu aha.

²²Lapas aijo' notataemo na aha mian nu Israel hi Gideon, “Belento nolapasakonmo kami da madi'mo nukuasai nu aha mian Midian. Kalana aijo' belento na sabole-bole bau polaya' mami — belento ka' lee' mae nu belento.”

²³Tinaaman i Gideon, “Madi'. Aku madi' timbali bau polaya' nu belemiu; anak ku suele madi' timbali. Tumpu ahi' na bau polaya' nu belemiu.”

²⁴Panyo lapas aijo' i Gideon po'ule' mule' notatae, “Ola sa'angu' na ku poita; anti-anting anu pinahuhuakon nu belemiu hi sampobali', na sabole-bole obee' mae miu iwi-iwi' hi belengku.” (Mian nu Midian biasanyo minganti-anting mosoni'; pokakana sumo to mia-mian sangga'at anu jojoong i padang bone'.)

²⁵“Sumo itina'mo,” na pinontaami nu aha, “Sanang na kinyonyoa mami mombee hi belento.” Lantas aha nombokamo hude, lapas aijo' toto samian tinokamo ka' nompotimpas anti-antingnyo anu pinahuhuakon hi sampobali'.

²⁶Iwi-iwi' na anti-anting mosoni' anu binee'mo hi Gideon tempo'nyo aitu koboatnyo mongohanimo uampulu' na kilogram, ma'isa ninsoop na to mai-mainan, olo', hude anu buhitnyo mingkamumu' anu nupusok nu to tomu-tomundo Midian tiba olo' anu i humpak i gogohong nu unta nu aha iwi-iwi'.

²⁷Mosoni' haha aijo', binau i Gideon sa'angu' na patong bapilogotan lantas pino'una'nyomo i kampungnyo, aijo'mo i Ofra. Aha mian nu Israel iwi-iwi' mamba mokiijo' monsombah patong bapilogotan sahingga aha madi'mo daagi' nontapali Tumpu Allah. Ka' aijo' tinimbalimo salaku sumo so'o hi Gideon tiba hi aha sa'anakan.

²⁸Mian nu Midian madi'mo daagi' noko ala nombau apa-apaa; aha pinatundu'mo nu mian Israel. Sahingga madi'mo ko anu nompoposia lipu' aijo' pinatompulu' na taun na kinopinnyo tempo'nyo i Gideon daagi' tutuu'.

²⁹Noko pahampate aijo', i Gideon ninsusule'mo i kampung kinahampeannyo ka' jinojoongmo ikiijo' mae.

³⁰Ia kino anak to momo'ane aha pitumpulu', kalana bengkele'nyo manjoo'.

³¹Ka' suele ko ambahue'nyo jojoong i Sikhem; hi ambahue'nyo aijo' ia nohumpak samian na anak mo'ane anu sinanggohannyomo Abimelekh.

³²Salatan ia i langkai'mo hondo atina'je ka' i Gideon anak i Yoas aijo' sinilakamo. Ia i lamun i pinolamunan i Yoas, tuumanyo. Pinolamunan aijo' kiijo' i Orfa, aijo'mo kota nu aha lee' mae i Abiezer.

³³Salatan i Gideon sinilakamo, aha mian nu Israel madi'mo nohongo-hongo Tumpu Allah. Aha nonsombahmo to pilo-pilogot Baal ka' nompotimbalimo Baal-Berit binaumo pilogot nu aha.

³⁴Aha madi'mo daagi' nonsombah Tumpu Allah, aijo'mo Tumpu nu aha nompolapasmo aha tempo'nyo kinuasan nu sampobali' iwi-iwi' nu aha anu montikubi mae aha.

³⁵Aha mule' madi' monginau' ka' mombalosakon kanonongan nu aha sa'anakan i Gideon mongkona hahan anu ma'ima' anu binaumo i Gideon hi aha mian nu Israel.