Read Saluan 3 YOHANES 1 Bible Online

3 YOHANES 1 - Saluan bible

3 YOHANES 1

¹ Kita utus Gayus anu okanonongi! Aku, polaya' nu jama'at, anu totu-totu'u mongkalibosi beleyum,

²balado'a mongamalakon da beleyum Utus boli masakit ka' iwi-iwi' mompaha ima' beleyum, pokakana sumo kinyonyoaum saja' ma'ima'.

³Aku sanang hondo salatan tino pia-piangkuka na Utusto mian Kristen tinoka mae ka' nompoto'i hi belengku tukoonyo nu aha palias na ko tulu-tulutannyo na kita Utus hi Tumpu anu totu'u, kalana memang kita Utus saja' tumuu' mombatuki pangajalan nu Tumpu.

⁴Anu moko ala mompotimbali aku da lebe lame', aijo'mo samata-mata ola de aku mohongomo to ana-anakku i uno nu kantumuu'annyo montulutimo pangajalan nu Tumpu.

⁵Kita utus! Kita utus saja'mo nombau pakalaja'an anu binaumo nu kita utus kona hi to sanga-sangalu sangko mian Kristen; ka' hi mian Kristen anu ma'isa pe'e mompahasumbu' tiba kita utus, kita utus montoa kapalaluan nu aha.

⁶Aha nompoto'imo hi jama'at i tampat mami mongkona kalibosan nu beleyum. Otulungi na aha da timbali molausakon lumambanan nu aha ka' tiba jalan anu sumo aijo' momposanangmo kinyonyoa nu Tumpu Allah,

⁷kalana i uno nu lumambanan mompolajang palentah i Kristus, aha madi' mohumpak apa-apaa pontulungi mae nu aha, mau mule' pa' apaa, de hi aha to mia-mian anu madi' monsumbu' Tumpu.

⁸Kalana aijo', kita to mia-mian Kristen tionyo ahi' montulungi to sanga-sangalu sangko mau Kristen anu sumo aijo', da kita timbali hingga-hinggat i usaha nu aha mompolele pangajalan anu totu'u lengkat mae hi Tumpu.

⁹Aku nontulismo sulat anu ola kodo-kodo' toka hi jama'at, panyo i Diotrefes anu mongka'oho' da timbali polaya' nu jama'at, madi' mongka'oho' montuluti aku.

¹⁰Bakas, aku po'ule'je toka, ku sisikje iwi-iwi' na anu binaunyomo, aijo'mo hahan anu ma'idek, ka' anu madi' totu'u na anu tinaloakonnyomo mongkona kami! Panyo iwi-iwi' aijo' ma'isa sukup hi ia. Tempo'nyo to sanga-sangalu sangko mian Kristen aijo' tinoka mae, ia madi' mongka'oho' montalima aha. Panyo ola mule' ahi' ia nontewa' to mia-mian anu mongka'oho' montalima to Utu-utus haha aijo', ka' ia nonsaimo mian haha aijo' da mosabatmo bolimo jojoong i jama'at!

¹¹Kita Utus anu okanonongi, boli montiho sifat anu ma'idek. O tiho apaa na anu ma'ima'. Mian anu mombau anu ma'ima', ia anumo nu Tumpu. Ka' mian anu mombau anu ma'idek, ma'isa monsumbu' Tumpu.

¹²Iwi-iwi' na mian mompuji' i Demetrius. Maumo Tumpu suele mompuji' ia. Kami suele mompuji' ia, ka' osumbu' nu kita Utus saba' apaa na anu pinotokakonmo mami timbali opalesaya.

¹³Manjoo' hondo na anu palalu ku poto'i hi belemiu, panyo ku oa'i lebe ma'ima' bolimo mompakatu sulat.

¹⁴Kalana ku tutugi madi'mo pin po'ule'mo singkabot tiba komiu, ka' kita lewa'je basisik.

¹⁵O'amalakon da Tumpu mombalakati kita utus. To sanga-sangalu nu belemiu i kajojoonganku aiya nompakatu salan do'a hi belemiu. Potokakon na salan do'angku hi iwi-iwi' na to sanga-sangalunto toto samian. 1