Read Saluan YUDAS 1 Bible Online

YUDAS 1 - Saluan bible

YUDAS 1

¹ To Utu-utus anu i lagamo ka' anu talalo hondo nu kalibosi nu Tumpu Tuuma, ka' mule' anu o jagai da palesaya hi Yesus Kristus. Salaku posaihon i Yesus Kristus, aku — i Yudas — utus i Yakobus,

²monginde'i: Da Tumpu mombee'i balakat, kalibosan ka' ka'ima'an hi belemiu molabi-labi.

³To Utu-utus anu okanonongi! Aku totu-totu'u ko kahanda' nontulis sulat toka hi belemiu mongkona kasalamatan anu bubuu'mo ingoa'anto. Panyo uuka aiya aku palalu hondo mompokinde'i komiu nu sulat aiya da komiu saja' bala usaha da iman anu minsanmo na binee' nu Tumpu sampemo ahi' toka sidu-sidutu' hi mian anu palesayamo hi Ia.

⁴Kalana madi' opoko ala osumbu-sumbu'to, daagi' ko to mia-mian anu madi' osumbu'to minsasuluk minsoop hi kita. Aha to mia-mian palaganta anu monggeo-geo'akon lele mongkona balakat nu Tumpunto, da mohumpak kasampatan pompotudunan nu aha napisu. Ka' aha madi' mongakui i Yesus Kristus, aijo'mo na anu Mongkuasai ka' Tumpunto. Salatanmo pe'e naipuan mae hukuman nu aha sinisikakonmo i uno nu Kitab nu Tumpu.

⁵ Iwi-iwi' aijo' sinumbu'mo miu. Panyo aku kahanda' mompotuka' hi komiu mosia na Tumpu nomposalamatmo mian nu Israel lengkat mae i lipu' Mesir, panyo lapas mae nonsilakaimo to mia-mian anu madi' palesaya, anu aijo' hi bubuu' aha.

⁶Singkona o inau' na to mala-malaikat anu nolingkuduimo kakuasa'an anu binee'mo hi aha, sahingga namba nompala'imo tampat kajojoongan nu aha. Tumpu nompungumo malaikat haha aijo' nu lante' anu sampe toka sidu-sidutu' i uno nu tampat anu pintung i aluknyo nu dunia. I kiijo' mae na aha o talungku'mo sampe hukuman onabu'akonmo hi aha i Sinaa anu opalias aijo' saidi' mae.

⁷ O inau' singkona na kota nu Sodom ka' Gomora tiba to kota-kota anu mompaha ohani, mian anu jojoong i kiijo' nombaumo sumo hahan anu binaumo nu malaikat haha aijo'. Aha nombaumo hahan masala' ka' anu palaganta, sahingga aha sinakisamo nu hukuman apu, anu sampe toka sidu-sidutu', da bau pompokinde'i hi iwi-iwi' na mian.

⁸Sumo aitu mule' na mian haha aijo' ola lewa' mompopikilakon anu santo misa-misa' sampe aha mombau dosa' i posi butong nu aha. Aha monte kuasa nu Tumpu ka' mompopo'ise' malaikat anu talasanggo kiita' i suluga'.

⁹ I Mikhael pe'e, anu mongkapalai to mala-malaikat, madi' toho' nombau sumo aijo'. Tempo'nyo ia pinainggaga tiba Ibilis i uno nu pahantuda'an mompo'ago pa' ihe na anu mongala bangke' i Musa, i Mikhael madi' baani nompisala'i Ibilis nu potatae anu mompopo'ise'. I Mikhael ola notatae, “Nusegaije nu Tumpu na beleyum!”

¹⁰Panyo pinompopo'ise' nu mian haha aijo' nongkonamo iwi-iwi' apaa na anu madi' nu sumbu' nu aha. Aha pokakanamo sumo to bina-binatang anu madi' ko pikilannyo, anu ola monsumbu' hahan kalana kabiasa'annyo. Panyo hahan aijo'mo na nonsaduakon aha matemo.

¹¹ Silaka na aha! Kalana aha nombatukimo jalan anu tinuluanmo i Kain. Da mohumpak doi, aha nontuamo butong nu aha i uno nu kasala'an, pokakana sumo i Bileam. Ka' aha mule' pinateanmo kalana notomuhukmo susumo i Korah.

¹²Tempo'nyo komiu nombau bau-bauon nongkakaan, kalakuan nu mian haha aijo' nonsaduakonmo komiu to'ua. Kalana aha mongkaan mabebes madi' ko ambangnyo, ka' ola mosi tutugi posi butong. Aha sumo sehu' anu nu puhakon nu mombuun, panyo madi' montudunakon ujan. Aha mule' suele sumo kau' anu madi' mimbua' mau mule' lonunyomo nu pimbua'an nu kau'; to kau-kau' anu ginautakonmo na bakatnyo ka' i nanggasmo hondo-hondo.

¹³Pokakana sumo bokon anu mabohos hondo i ambai sinumelembua'mo sumo aitu mule' na anu nubau nu aha sinumelembua'mo na anu moko ambang. Aha sumomo to manda-mandala' anu madi' tataap na kajojoongannyo ka' anu tinoukanmo na tampat nu Tumpu i uno nu kapintungan anu talalo okabuhuk sampe toka sidu-sidutu'.

¹⁴ I Henokh, lee'mo ko popitu'nyo lengkat mae hi Adam, naipuan mae toho'mo nonsisikakon kantumuu'an nu mian haha aijo'. I Henokh notatae, “Toa, Tumpu tokaje mae tiba to mala-malaikatnyo anu susi' i mada-madalannyo

¹⁵kalana kahanda'mo momputusi mian iwi-iwi'. Tumpu mohukumo to mia-mian anu mombau anu ma'idek kalana hahan anu binaumo nu aha mian anu palaganta. Ka' Ia mohukumje mian anu baladosa' ka' anu uesan kalana iwi-iwi' na potatae anu mompopo ambang tinaloakonnyomo.”

¹⁶Mian haha aijo' ola saja' motusa' ka' mompisala'i to mia-mian sangga'at. Aha tumuu' montuluti apaa na anu nukamilui nu aha anu moko baladosa'. Aha mombuulakon posi butong ka' mongakali mian da mohumpak ka'untungan.

¹⁷Panyo to utu-utusku anu okanonongi, o inau' apaa na anu naipuan mae tinaloakonmo nu to rasul-rasul nu Tumpunto i Yesus Kristus.

¹⁸ Aha nompoto'imo momona hi komiu tukoonyo de malia'mo toka na sinaa kakiamatan lubatmo na to mia-mian anu monjojoa komiu, aijo'mo to mia-mian anu tumuu' montuluti apaa na anu nu kamilui nu aha sahingga monsaduakonmo anu moko baladosa'.

¹⁹Ahamo haha aijo' na to mia-mian anu monsaduakon da madi' ko posa'angu'an. Aha madi' nu kuasai nu Roh nu Tumpu, panyo ola mombatuki pongka'oho' nu kalakuan nu dunia.

²⁰Panyo komiu, to Utu-utusku, saja' ahi' opokopiani na kantumuu'an miu mintoong i kapalesaya'an miu hi Yesus Kristus. Iman nu belemiu atina' talalo hondo susi'. Ka' suele balado'a ahi' i uno nu kuasa nu Roh nu Tumpu,

²¹ka' saja' ahi' tumuu' i uno nu kakuasa'an nu kalibosan nu Tumpu, hau-haunyo komiu montanda'i balakat i Yesus Kristus Tumpunto, anu mombee'ije kantumuu'an kopian hi komiu sampe toka sidu-sidutu'.

²²Kona hi to mia-mian anu bata-bata na kinyonyoanyo, tionyo ahi' komiu mompotoa kalibosan.

²³O hela' mae na mian aijo' i uno nu apu ka' osabatakon da oposalamat na aha. Kona hi to mia-mian sangga'at tionyo ahi' komiu mompotoa kalibosan ka' okabuhuk ahi', panyo oka'ideki ahi' mau pe'e ola baju' nu aha anu i henyuanmo nu anu nu nu kamilui nu aha, anu moko baladosa' aijo'.

²⁴Tumpu, na anu moko ala monjagai da komiu madi' manabu', ka' anu moko ala momboa komiu i ahop-Nyo anu talasanggo ka' mongoa'i lame' ka' madi' ko apa-apaa na anu sinala'.

²⁵Olamo Ia sa'a-sa'angu'nyo na Tumpu anu Momposalamat kita nontului jalan hi Yesus Kristus Tumpunto. Iamo na Tumpu anu talasanggo, opopodaka', mongkuasai ka' anu o'angga'i salatanmo pe'e naipuan mae sampe tempo' uuka aiya ka' sampe toka sidu-sidutu'. Amin. 1