Read Saluan ANU PINOTO'I HI YOHANES 1 Bible Online

ANU PINOTO'I HI YOHANES 1 - Saluan bible

ANU PINOTO'I HI YOHANES 1

¹Isi nu kitab aiya, mongkona apaa na anu pinoyata'mo i Yesus Kristus mongkona to hahan anu saidi' mae jadi. Tumpu nompoto'imo hi Kristus da Ia mompotiju'akon hi to posa-posaihon nu Tumpu apaa na anu malia'mo, tionyo jadi. I Kristus nonsaimo malaikat-Nyo hi Yohanes, posaihon-Nyo aijo' da mompoto'iakon han haha aijo' anu timbali hi ia.

²Sahingga i Yohanes mule' nonsisikakonmo iwi-iwi' na anu tinoanyomo; ka' aiyamo na anu pinotokakonnyo mongkona potuunon lengkat mae hi Tumpu anu pinototu'umo i Yesus Kristus, ka' anu i nyata'mo i kalaja-Nyo.

³Mohumpak ka'ima'an na mian anu mombasa'akon ka' anu mohongo lele sisikon nu kitab aiya tiba mule' tulu-tulutan hi apaa na anu tinulismo i unonyo. Kalana madi'mo pin iwi-iwi' aiya jadimo.

⁴ To utu-utus anu i jama'at popitu' i da'erah Asia! Aku, i Yohanes montaha'imani komiu da nubee'i balakat ka' ka'ima'an lengkat mae hi Tumpu — aitumo Ia anu polo-polo'mo daagi', anu daagi'mo, ka' anu sidu-sidutu' sabole-bole daagi' — ka' suele lengkat mae hi popitu' na roh anu daagi' i ahop nu kasuhangan nu Tumpu,

⁵ ka' lengkat mae hi Yesus Kristus, sakisi anu mohongo-hongo. Iamo na anu sinilaka po'ule' pinotumuu' momona, ka' Iamo na anu mongkuasai to tomu-tomundo nu dunia. I Yesus mongkalibosi kita, ka' kalana Ia sinilakamo aijo' sahingga Ia nompobebasmo kita da madi'mo o hukum kalana dosa'to, haha aijo'.

⁶ Ka' nompotimbalimo kita sa'angu' na bansa to ima-imam anu mompojalan palentah nu Tumpu, Tuuma-Nyo. I Yesus Kristus aijo'mo na anu talasanggo ka' anu mongkuasai sampe toka sidu-sidutu'. Amin!

⁷ Toa, Ia toka mae nu saput nu kundom! Iwi-iwi' na mian montoa Ia, ka' suele aha anu nonjalo'mo Ia. Iwi-iwi' na bansa i dunia mohangi Ia. Memang, totu-totu'u! Amin!

⁸ “Akumo na anu i momona ka' anu i mihinyo,” koonyo nu Tumpu Allah, anu polo-polo'mo daagi', ka' anu daagi'mo, ka' anu sidu-sidutu' sabole-bole daagi', Anu Matangkas na Kuasanyo.

⁹Aku i Yohanes, utus miu anu suele sumo belemiu i uno nu kasansala'an salaku mian anu pinalesayamo hi Kristus. Kita tionyo ahi' sabaan na mongoa'i kasansala'an salaku mian, anu Iamo na tumpu-Nyo. Aku ingalin nokiijo' i togong nu Patmos kalana aku nompolelemo potuunon lengkat mae hi Tumpu, anu pinohosonmo na kinyonyoangku nu han anu binaumo i Yesus.

¹⁰I sinaa nu Tumpu, aku kinuasanmo nu Roh nu Tumpu, lantas aku nohongomo potatae anu daka' hondo — sumo onyi' nu tolompet — binasisik aitu mae i hikungku.

¹¹Lewo' aijo' notatae, “Tulismo apaa na anu tinoaum, ka' pakatumo na kitab aijo' toka i popitu' na jama'at aijo'mo: Efesus, Smirna, Pergamus, Tiatira, Sardis, Filadelfia, ka' Laodikia.”

¹²Aku nosiloi i hiku da montoa pa' ihe na aijo' anu notatae mae hi belengku. Lantas, aku nontoamo popitu' na tengke nu sulu', mosoni' na binau.

¹³ I totonga' nu tengke nu sulu' haha aijo', tinuminjo na samian o toa sumo mian. Ia nompusok juba' anu komantannyo toka i tengke. I saha'annyo, Ia nompake kukup nu saha'an mosoni' na binau.

¹⁴ Ubak-Nyo pute' sumo bulu nu domba, pokakana sumo kopute'nyo nu kapos. Mata-Nyo moak sumo apu;

¹⁵ tengke-Nyo mimboyai' sumo tambaga anu pinapuan. Potatae-Nyo sumo buhok nu uee i ombu'an anu daka'.

¹⁶Lima-Nyo koanan montoongi popitu' na mandala', ka' aijo' i nganga'-Nyo nosabat mae samata na bajak anu matajom poti-potimbiha'. Ohup-Nyo mangkunining sumo batu nu sinaa de sonsu'unmo.

¹⁷ Salatan tinoangkumo na Ia, aku dinumaladupu i ahop-Nyo sumo mian anu sinilakamo. Panyo Ia nompotiik lima-Nyo koanan hi belengku ka' notatae, “Boli mabuhuk! Akumo na anu i momonanyo ka' anu imihinyo.

¹⁸Akumo na Ia anu tinumuu'mo! Aku sinilakamo, panyo toamo, Aku tumuu'mo sampe toka sidu-sidutu'. Aku mongkuasai kapatean, ka' i dunia nu mian anu i natemo.

¹⁹Kalana aijo', o tulis na hahan anu tinoamo nu beleyum, aitumo hahan anu daagi' uuka aiya, ka' hahan anu jadije saidi' mae.

²⁰Aiyamo na lahasia nu popitu' na mandala' anu tinoamo nu beleyum i limang-Ku koanan, ka' i popitu' na tengke nu sulu' mosoni' aijo': Popitu' na mandala' aijo' atina'mo na to mala-malaikat i popitu' na jama'at aijo', ka' popitu' na tengke nu sulu' aijo' atina'mo na jama'at anu popitu' aijo'.”