Read Saluan ANU PINOTO'I HI YOHANES 10 Bible Online

ANU PINOTO'I HI YOHANES 10 - Saluan bible

ANU PINOTO'I HI YOHANES 10

¹Lantas aku nontoamo samian na malaikat anu baani sangga'at nintau' mae lengkat i suluga'. Ia sinaput mae nu kundom, ka' sa'angu' na tandalo' nongkalekodi ubaknyo. Ohupnyo mangkunining sumo batu nu sinaa ka' tengkenyo tinjo-tinjo moak sumo apu.

²I limanyo daagi' ko sa'angu' na lulunan nu kitab ise' anu tinabuka'mo. Tengkenyo koanan peja-peja' i ambai, ka' tengkenyo kowi peja-peja' i katano'an.

³Lantas ia noloboo'mo daka-daka' sumo to singa-singa nolohuu'mo. Ilapas na malaikat aijo' noloboo', popitu' na gohung nontaami mae anu onyi'nyo dolu-dolundungan.

⁴Salatan popi-popitu' na gohung ingumonyi'mo, aku kahanda'mo montulis, panyo ihongongku na potatae lengkat mae i suluga', koonyo, “Opohowini apaa na anu tinaloakon nu popitu' na gohung aijo': Boli montulis!”

⁵ Lantas malaikat anu tinoangku nanimpeja' i ambai ka' i katano'an aijo' nohangkat limanyo koanan nokiita' i langit.

⁶Ia binasumpa' tiba sanggo nu Tumpu anu tumuu' sampe toka sidu-sidutu', anu nompotimbalimo langit, dunia ka' ambai tiba batu-batu anu daagi' i unonyo. Malaikat aijo' notatae, “Tempo'nyo madi'mo daagi' o tunda!

⁷Panyo de malaikat ko popitu'nyo mompuuhimo tolompetnyo, Tumpu mombaumo anu tinanga'an-Nyomo, anu pinohowini-Nyomo aijo'. Sumo anu pinoto'i-Nyomo hi to posa-posaihon-Nyo, aijo'mo to nabi-nabi.”

⁸ Lapas aijo' potatae anu i hongongku lengkat mae i suluga' aijo', notatae mule' hi belengku. Ia notatae, “Lako'mo ala na lulunan nu kitab anu tinabuka'mo i lima nu malaikat anu peja-peja' i ambai ka' i katano'an aijo'.”

⁹Sahingga aku mule' nambamo hi malaikat aijo' ka' nomoita da ia mombee' mae lulunan ise-ise' aijo' hi belengku. Ia notatae, “Alamo ka' kaanmo na aiya. I uno nu kompongum ia timbalije mapakat, panyo i uno nu nganga'um ia matami' sumo juu' nu uani'.”

¹⁰Aku nongala lulunan ise-ise' aijo' i limanyo lantas kinaankumo. I nganga'ku nyamitnyo sumo juu' nu uani', panyo salatan i lonyomkumo i uno nu kompong ia napakatmo.

¹¹Lapas aijo' aku pinalentahmo, “Po'ule' mule' bebakon na lele lengkat mae hi Tumpu mongkona to bansa-bansa, nega-negara, basa-basa', ka' to tomu-tomundo.”