Read Saluan ANU PINOTO'I HI YOHANES 11 Bible Online

ANU PINOTO'I HI YOHANES 11 - Saluan bible

ANU PINOTO'I HI YOHANES 11

¹ Lapas aijo' aku binee'anmo sangkolong na kau' anu gio-gio' sumo sangkau na tokon bau pombobati, lantas pinalentahmo, “Lako' mamba bobati na Laigan nu Tumpu ka' mezbah. O bilang mae sangkuka na mian anu monsombah kiijo' i unonyo.

² Panyo boli mombobati natannyo i sasu sambiha'nyo nu Laigan nu Tumpu aijo', kalana bahagian aijo' binee'mo hi to mia-mian anu madi' monsumbu' Tumpu. Ahamo na mompahampeja'akon kota anu susi' aijo' patompulu' ka' ohua' na bitu'on na kopinnyo.

³Aku monsaije ua'aha na sakising-Ku anu mompusok baju' monsusa'akon anu silakamo, ka' aha mompoto'ije lele nu Tumpu Allah kopinnyo 1.260 na sinaa.”

⁴ Ua'aha na sakisi aijo' atina'mo ohua' na batang nu kau' zaitun ka' ohua' na sulaan nu sulu' anu daagi' kiijo' i ahop nu Tumpu anu mongkuasai songko-songko na dunia.

⁵De mian mongkahanda'i mombau apa-apaa anu madi' ma'ima' hi aha, saba' lengkat i nganga' nu aha mosabatmo na apu anu mompatei sampo bali' nu aha. Tiba jalan anu sumo aijo', iwi-iwi' na mian anu mongka'oho' monsakiti aha, o pateimo.

⁶ Aha daagi' ko kuasa mongkulubi langit da boli tudun mae na ujan hau-haunyo aha daagi' mombebakon lele lengkat mae hi Tumpu Allah. Aha daagi' suele ko kuasa mongkuasai iwi-iwi' mata nu uee, da mombali'i uee timbali baso'. Ka' aha daagi' mule' ko kuasa mondoke dunia nu iwi-iwi' na ngahan nu balaa', de aha kahanda'mo mombau.

⁷ Salatan lapasmo na aha mompolele lele nu aha, binatang anu nosabat lengkat mae i keles kapatean mongewamo aha.

⁸ Ka' aha anu sinilakamo paha-paha timpasmo i jalan anu ewa i kota daka', anu pinonsalipan nu aha Tumpu. Sanggo anu pinongkantuangakon kota aijo' atina'mo Sodom kabai Mesir.

⁹To mia-mian lengkat mae i iwi-iwi' na negara, tulunan, basa', ka' bansa na montoa aha anu sinilakamo kopinnyo totolu' ka' mintonga' na sinaa, ka' madi' mompobee' anu sinilakamo haha aijo' o lamun.

¹⁰Anu jojoong i dunia lame'mo kalana sinilakamo na ua'aha na sakisi aijo'. Aha molame'akonmo ka' paim paka-pakatuanmo palasen, kalana ua'aha na nabi aijo' nompotokamo mae manjoo' na kasansala'an hi mian iwi-iwi' i dunia.

¹¹ Ilapas totolu' mintonga' na sinaa, tinokamo na napas bau pompotumuu' lengkat mae hi Tumpu ka' ninsoop mule' i uno nu ua-ua'aha na nabi aijo'. Aha mule' nobungkutmo ka' tinuminjomo, sahingga iwi-iwi' na mian anu nontoa aha nabuhukmo hondo.

¹² Ilapas mae ua'aha na nabi aijo' nohongomo potatae daka' anu nolaga aha lengkat mae i suluga', “Imbo'mo poliba' mae i aiya!” Lantas i ahop nu mata nu sampo bali' nu aha, aha suele noliba'mo nokiita' i suluga', sinaputmo nu kundom.

¹³ Sahingga tempo'nyo aijo' jinadimo na luulu' daka' hondo. O bagi sampulu' sambahagian na kota aijo' i hansun, ka' popitu' na madala na mian i natemo nu luulu' aijo'. To mia-mian sangga'atannyo aijo' nabuhukmo hondo, lantas aha nompuji'mo katalasanggoan nu Tumpu i suluga'.

¹⁴Balaa' anu ko ohua'nyo i lapasmo. Panyo toa mule'! Balaa' anu ko totolu'nyo saidi' suele tokamo.

¹⁵ Lantas malaikat ko popitu'nyo nompuuhimo tolompetnyo, sahingga i hongomo i suluga' na potatae anu toto daka-daka' hondo nompoto'i, “Kakuasa'an mompalentah dunia tempo' uuka i limamo nu Tumpu-nto ka' Tomundo anu Momposalamat anu jinanji'-Nyomo. Ia na mompalentah sampe toka sidu-sidutu'!”

¹⁶Sahingga ua-uampulu' ka' opat na polaya' anu suha-suhang i kasuhangan nu aha i ahop nu Tumpu, dinumaladupumo ka' nonsombahmo Tumpu.

¹⁷Aha notatae, “Tumpu, Tumpu Anu Matangkas na kuasanyo, anu daagi'mo, ka' anu polo-polo'mo daagi'! Kami montalima kase hi Kita kalana Kita nompakemo kuasa-nTo anu daka', ka' nontampu'unimo mompalentah!

¹⁸ To mia-mian anu madi' monsumbu' Tumpu, noto'idekmo kalana tinokamo na tempo'nyo na Kita mompobuntumo pusa-nTo, ka' mule' tempo'nyomo na Kita momputusimo palakala nu to mia-mian anu i natemo. Aiyamo na tempo'nyo mombee'imo tamboonyo hi to posa-posaihon-To, aijo'mo to nabi-nabi. Ka' iwi-iwi' na mian-To anu pinalesayamo, aijo'mo iwi-iwi' na mian anu monsombah Kita, daka' maupe'e ise'. Aiyamo na tempo'nyo mohopu'imo to mia-mian anu nongideimo dunia!”

¹⁹ Sahingga tinontuhea'mo na Laigan nu Tumpu i suluga' ka' kinantoaanmo na Peti' Palajanjian kiijo' i unonyo. Lantas tinokamo na kilat moto-moto taaman ka' onyi' nu gohung dolu-dolundungan, ka' pinoka-pokalapitmo, tiba luulu' ka' ujan eis anu mabohos hondo.