Read Saluan ANU PINOTO'I HI YOHANES 12 Bible Online

ANU PINOTO'I HI YOHANES 12 - Saluan bible

ANU PINOTO'I HI YOHANES 12

¹Lantas tinoa i langit na apa-apaa anu okabangangi ka' anu opalias hondo. Samian na boune anu nompusokmo batu nu sinaa salaku baju'nyo, hau-haunyo tinjo-tinjo aita' i bitu'on. I ubaknyo daagi' ko sa'angu' na makota, sampulu' ka' ohua' na mandala' na binau.

²Boune aijo' hau-haunyo poboa, ka' kalana tempo'nyomo mompohampe, sahingga ia noloboo'mo mongadede'akon sakit.

³ Lantas kinantoaan mule' i langit na apa-apaa anu okabangangi. Daagi' ko sa'angu' mule' na ulo momea' anu daka' hondo, ko ubaknyo popitu', ka' sampulu' na tanduknyo. Toto sa'angu' na ubaknyo nomposongko'mo sa'angu' na makota.

⁴ Ikunyo aijo' na pohela'nyo to manda-mandala' i langit o bagi totolu', sambahagian na nu hela' ka' nu alin mokaiyong i dunia. Ulo anu talalo hondo daka' aijo' tinuminjo hi ahop nu boune anu mongka'oho'mo mompohampe, aijo' kahanda'nyo da molonyomo anaknyo salatan ia hampemo.

⁵ Lantas boune aijo' nohampeakonmo samian na anak mo'ane anu mompalentahje iwi-iwi' na bansa nu tokonnyo besak. Panyo anak aijo' ingagoanmo hi boune aijo', lantas binoanyomo hi Tumpu nokiijo' i ahop nu kasuhangan-Nyo.

⁶Sahingga boune aijo' nopadeka'mo nokiijo'mo i padang anu mateges, i tampat anu pinosadiakonmo nu Tumpu hi ia. I tampat aijo' ia pinotuu'mo kinopinnyo 1.260 na sinaa.

⁷ Lantas kiita' i suluga' nahampatemo. I Mikhael tiba to mala-malaikatnyo nahampatemo nongewa' ulo anu talalo hondo daka' aijo'. Ka' ulo anu talalo hondo daka' aijo' mule' tinulunganmo nu to mala-malaikatnyo mongewa mule' i Mikhael.

⁸Panyo ulo anu talalo hondo daka' aijo' i hungku'anmo. Ia ka' to mala-malaikatnyo madi' daagi' pinobee' jojoong i suluga'.

⁹ Ulo anu talalo hondo daka' aijo' ingalin i sambiha'nyo! Iamo na ulo anu ilangkai'mo anu o sanggohi Ibilis kabai Roh Ma'idek, anu mongakalimo songko-songko na dunia. Ia ingalinmo nokaiyong i dunia tiba iwi-iwi' na malaikatnyo.

¹⁰ Lantas aku nohongo potatae anu daka', i suluga' nontaloakon, “Uukamo aiya na tempo'nyo Tumpu momposalamatmo mian anu pinalesayamo hi Ia! Uuka aiya Tumpu mompotoamo kuasa-Nyo salaku Tomundo! Uuka aiya Tomundo anu Momposalamat anu jinanji'mo aijo' suele mompotoamo kakuasa'an-Nyo! Kalana anu mompisala'i to Utu-utusto i ahop nu Tumpu sinaa ka' malom, sinabatakonmo lengkat mae i suluga'.

¹¹To Utu-utusto nompokalamo ia tiba baso' nu Anak nu Domba aijo', ka' tiba lele anu totu'u lengkat mae hi Tumpu anu pinolelemo nu aha. Aha sanang na nongkulubanakonmo nyawa nu aha sampe inate.

¹²Kalana aijo', tionyo ahi' suluga' ka' iwi-iwi' anu jojoong i unonyo, balame-lame'mo! Panyo silaka na dunia ka' ambai, kalana Ibilis nintatau'mo hi komiu ka' pinusamo hondo, kalana nusumbu' saba' tempo'nyo madi'mo daagi' pin.”

¹³Salatan ulo anu talalo hondo daka' aijo' nonsumbu'mo saba' ia ingalinmo nokaiyong i dunia, ia nololoi'mo boune aijo' anu nompohampemo anak mo'ane aijo'.

¹⁴ Panyo boune aijo' binee'anmo ohua' na polipik nu tomonsi' bonyia' anu daka' hondo, da ia lumahap mamba i tampatnyo i padang mateges, da ia opotumuu' sampe totolu' mintonga' na taun da boli nusa'u nu ulo anu talalo hondo daka' aijo'.

¹⁵Sahingga ulo anu talalo hondo daka' aijo' nonsumbu'akonmo lengkat i nganga'nyo manjoo' hondo na uee nokiijo' i boune aijo'; da monganjuhakon ia.

¹⁶Panyo dunia nontulungi boune aijo' dunia nonganga'akon nganga'nyo ka' nongegat uee anu nosabat mae i nganga'nyo nu ulo anu talalo hondo daka' aijo'.

¹⁷Ulo anu talalo hondo daka' aijo' pinusamo hondo hi boune aijo', sahingga ia nambamo nontumbuhi lee'nyo sangga'at nu boune aijo', aijo'mo iwi-iwi' mian anu tulu-tulutan i to pale-palentah nu Tumpu Allah, ka' anu tinimbalimo sakisi mongkona i Yesus ka' kakuasa'an-Nyo.

¹⁸Lantas ulo anu talalo hondo daka' aijo' tinuminjomo i biwi nu bone'.