Read Saluan ANU PINOTO'I HI YOHANES 13 Bible Online

ANU PINOTO'I HI YOHANES 13 - Saluan bible

ANU PINOTO'I HI YOHANES 13

¹ Lapas aitu aku nontoamo sa'angu' na binatang i lubat lengkat mae i uno nu ambai. Ia ko tanduknyo sampulu' ka' popitu' na ubaknyo. Toto sa'angu' na tanduknyo ko makotanyo sa'angu', ka' toto sa'angu' na ubaknyo ko tulisannyo sa'angu' na sanggo anu mompopo'ise' Tumpu.

² Binatang anu tinoangku aijo' sumo harimau, ka' tengkenyo sumomo tengke nu beruang, ka' nganga'nyo sumomo nganga' nu singa. Lantas binatang aijo' binee'an nu ulo anu talalo hondo daka' aijo' kahosonannyo, ka' kasuhangannyo, tiba mule' ahi' kakuasa'annyo anu daka'.

³Sala' sa'angu' i anu popitu' na ubak nu binatang aijo' otoa sumo anu ko belanyo daka' hondo, panyo belanyo aijo' na'alinmo. Songko-songko na dunia mombatuki binatang aijo' ka' bangang hi ia.

⁴Ka' aha nonsombahmo ulo anu talalo hondo daka' aijo' kalana ia nombee'mo kakuasa'annyo hi binatang aijo'. Ka' aha suele nonsombahmo binatang aijo'. Aha notatae, “Madi' ko anu pokakana tiba binatang aiya! Madi' ko anu moko ala mahampate mongewa ia!”

⁵ Binatang aijo' pinobee'mo na montaeakon to hahan anu talalo molabi ka' mompopo'ise' Tumpu. Ia timbali mompalentah patompulu' ka' ohua' na bitu'on na kopinnyo.

⁶Lantas ia montampu'unimo mompopo'ise' Tumpu, ka' sanggo nu Tumpu. Sumo aitu mule' tampat kajojoongan nu Tumpu Allah, ka' iwi-iwi' na anu jojoong i suluga' suele pinopo'ise'nyomo.

⁷ Ia opobee' suele mongewa mian anu pinalesayamo hi Tumpu ka' mohungku'i aha. Ka' mongkuasai iwi-iwi' na tulunan, negara, basa', ka' bansa anu binee'mo hi ia.

⁸ Binatang aijo' na nu sombah nu iwi-iwi' mian anu tumuu' i uno nu dunia, sambiha'nyo to mia-mian anu sanggonyo noko daputanakonmo ma'isa pe'e dunia pinotimbali, i uno nu kitab nu mian anu tumuu', tumpu'nyo aijo'mo Anak nu Domba anu ki kinolotmo.

⁹Mokonyo aijo', de belemiu moko ala mohongo, hongomo na lele aiya:

¹⁰ “Mian anu tionyo o hakop, memang tionyo o hakopmo. Ka' mian anu tionyo o patei nu bajak, memang o pateimo nu bajak. Mokonyo aijo' mian anu palesayamo hi Tumpu tionyo sabaan ka' tulu-tulutan.”

¹¹Lantas aku nontoa sa'angu' na binatang sangga'at i lubat mae i uno nu dunia. Ia nintanduk ohua' sumo tanduk nu Anak nu Domba. Potataenyo sumo potatae nu ulo anu talalo hondo daka' aijo'.

¹²I ahop nu binatang anu momona aijo', ia mompake kakuasa'an anu daka', anu i humpaknyo hi binatang aijo' suele. Songko-songko na dunia, ka' iwi-iwi' na anu jojoong i unonyo, pinakisanyomo monsombah binatang anu i momona aijo', anu talalo daka' hondo na belanyo panyo na'alinmo.

¹³Binatang anu ko ohua'nyo aijo' nombaumo hahan anu talalo hondo okabangangi. I ahop nu mian iwi-iwi' ia nombaumo apu lengkat mae i langit nokaiyong i dunia.

¹⁴Ka' iwi-iwi' mian anu tumuu' i dunia ingakalannyomo nu hahan anu okabangangi anu nupoko ala nubau i ahop nu binatang anu i momona aijo'. Ka' aha iwi-iwi' pinokaunyomo nompotinjo sa'angu' na patong nu binatang anu binelanmo nu bajak, panyo tataap tumuu'.

¹⁵Binatang anu ko ohua'nyo aijo' pinobee' na mombee' nyawanyo hi patong aijo', sahingga patong aijo' moko ala motatae ka' mompatei iwi-iwi' mian anu madi' mongka'oho' monsombah ia.

¹⁶Iwi-iwi' na mian tu'anyo kabai to ana-anak, anu kaya kabai anu kasiasi, posaihon kabai mian anu bebas, pinakisamo nu binatang aijo' da mongala tanda ka' opokona i lima koanan nu aha kabai i siakan nu aha.

¹⁷Madi' ko samian pe'e na timbali mongoli kabai mompobaluk to apa-apaa, de ia madi' ko tanda aijo', aijo'mo sanggo nu binatang aijo', kabai nomon anu momponyata' sanggo aijo'.

¹⁸I aiya palalu daagi' ko kapandean. Mian anu pande moko ala molekeng alati'nyo nu nomon nu binatang aijo', kalana nomon aijo' atina'mo na sanggo nu samian na mian. Nomonnyo aijo'mo, 666.