Read Saluan ANU PINOTO'I HI YOHANES 14 Bible Online

ANU PINOTO'I HI YOHANES 14 - Saluan bible

ANU PINOTO'I HI YOHANES 14

¹ Lapas aijo' aku nontoamo, Anak nu Domba aijo' tinjo-tinjo aita' i Bungkutnyo nu Sion. Tiba Ia, daagi' mule' ko 144.000 na mian ka' i siakan nu aha toto samian bubu' tinulis na sanggo-Nyo ka' sanggo nu Tuuma-Nyo.

²Lantas i hongongku na potatae lengkat mae i langit buungan sumo onyi' nu ombu'an anu ueenyo mabohos ka' sumo gohung dolu-dolundungan daka' hondo. Potatae aijo' o hongo sumo onyi' nu musiik mian mongkuti' kasapi anu hau-haunyo mompahaikakon kasapinyo.

³I ahop nu kasuhangan ka' opat na malaikat tiba to pola-polaya' anu nontikubi kasuhangan aijo', 144.000 na mian aijo' nonyanyiakonmo sa'angu' na nyanyian anu sala'je i nyanyi. Nyanyian aijo' madi' opoko ala ogulu'i mau mule' pa' ihe de misa' aha anu 144.000 na mian aijo' anu pinobebasmo mae i dunia.

⁴Aha aijo' to mia-mian anu saja' belesi' sumo langkoyang anu tumimpasje, kalana ma'isa toho' noduhus tiba boune. Aha mombatuki Anak nu Domba mau mule' pa' moya na Ia mamba. Iwi-iwi' na mian, olamo aha na anu pinobebas salaku anu sinombahkonmo momonanyo hi Tumpu ka' hi Anak nu Domba.

⁵ Madi' toho' aha baleko'; ka' madi' ko anu opisala'i sangkiding pe'e hi aha.

⁶Lantas aku nontoa samian na malaikat sangga'at anu i lumahap tangka-tangkas aita' i langit. Malaikat aijo' momboa lele mongkona Lele Ma'ima' anu sampe toka sidu-sidutu' da opotokakon hi mian i dunia aijo'mo, toka hi iwi-iwi' na bansa, tulunan, basa', ka' negara.

⁷Malaikat aijo' notatae daka-daka', “Pabuhukmo hi Tumpu Allah ka' o puji' na katalasanggoan-Nyo! Kalana tempo'nyomo na Tumpu momputusimo mian. O sombah na Ia anu nompotimbalimo langit, tano', ambai ka' iwi-iwi' na mata nu uee!”

⁸ Malaikat anu ko ohua'nyo nompayuntunmo mae malaikat anu momonanyo ka' notatae daka-daka', “I nanabu'mo! Kota Babel anu daka' aijo' nanabu'mo! Ia nompotimbalimo iwi-iwi' na bansa da nalangu nu anggur — aijo'mo anggur nu napisu sahingga nasala'mo!”

⁹Samian na malaikat ko totolu'nyo nompayuntun mule' mae anu ohu-ohua' na malaikat aijo', ka' notatae daka-daka', “Mian anu monsombah binatang aijo' tiba patongnyo, ka' anu ko tandanyo nu binatang aijo' i siakannyo kabai i limanyo,

¹⁰ mian aijo' na monginum anggur nu Tumpu, aijo'mo anggur nu tambuha'-Nyo anu i lambe'-Nyomo i tampat pongisiannyo anggur anu madi' o ga'ai sangkiding pe'e! Iwi-iwi' na mian aijo' osakisamo i uno nu apu ka' belelang i ahop nu to mala-malaikat anu susi', ka' i ahop nu Anak nu Domba aijo'.

¹¹ Tibuk nu apu anu monsakisa mian haha aijo' saja' ko puha-puha sampe toka sidu-sidutu'. Sinaa ka' malom madi' ko kamingkotannyo na aha osakisa, aijo'mo aha anu monsombah binatang aijo' ka' patongnyo, iwi-iwi' na mian anu ko tandanyo sanggo nu binatang aijo'.”

¹²I uno nu han aiya mian anu pinalesayamo hi Tumpu anu tulu-tulutanmo i to pale-palentah nu Tumpu, ka' anu tulu-tulutanmo hi Yesus, palalu ahi' sabaan.

¹³Lantas aku nohongo potatae lengkat mae i suluga' nontaloakon, “O tulis na aiya: Otampu'uni uuka aiya, mohumpakmo ka'ima'an na to mia-mian anu sinilakamo tempo'nyo saja' nombau anu pinalentahkonmo nu Tumpu!” “Totu'u!” tinaaman nu Roh nu Tumpu. “Aha madi'mo pagala mokalaja, kalana hasin nu kalaja nu aha aijo'mo na nomboa aha nohumpak ka'ima'an.”

¹⁴ Lapas aijo' aku nontoamo sa'angu' na kundom anu mopute'. Aita' i kundom aijo' suha-suhang na samian anu otoa sumo mian. I ubak-Nyo daagi' ko sa'angu' na makota mosoni', ka' i lima-Nyo daagi' ko sa'angu' na sabit anu matajom.

¹⁵ Lapas aijo' samian na malaikat sangga'at nosabatmo mae i uno nu Laigan nu Tumpu. Ka' notatae daka-daka' hi Ia anu suha-suhang aita' i kundom aijo'? “Pewakonmo na sabit nu Beleyum atina' ka' alamo na hasinnyo uuka aiya, kalana tempo'nyomo o'ala na bua'nyo; dunia talalomo i naha hondo timbalimo o'ala na bua'nyo!”

¹⁶Lantas Ia anu suha-suhang aita' i kundom aijo' nompewakonmo sabit-Nyo nokaiyong i dunia, sahingga dunia ingalamo na bua'nyo.

¹⁷Lapas aijo' aku nontoa mule' samian na malaikat sangga'at nosabat mae lengkat i Laigan nu Tumpu i suluga'. Ia mule' nontoongi sa'angu' na sabit anu matajom.

¹⁸Lapas aijo', samian na malaikat sangga'at anu mongkuasai apu, lengkat mae i mezbah. Ka' ia notatae daka-daka' hi malaikat anu totoong sabit anu matajom aijo', “Pewakonmo na sabit nu Beleyum atina' ka' pahansabitakonmo na bua' nu anggur haha aijo' i dunia, kalana bua'nyo haha aijo' i nahamo!”

¹⁹Sahingga malaikat aijo' nompewakonmo sabitnyo nokaiyong i dunia ka' nonsabit bua' nu anggur haha aijo' i batangnyo, lantas i lumbu'akonnyomo i uno nu pompao'ian anggur aijo'mo tampat tambuha' nu Tumpu anu talalomo hondo.

²⁰ Bua' nu anggur haha aijo' pinao'an i sambiha' nu kota, ka' lengkat i pompao'ian nu anggur haha aijo' no'ilimo na baso' sumo kaunyo, kojo'onnyo tolu atu' na kilometen, ka' ko leengnyo mongohani ohua' na meten.