Read Saluan ANU PINOTO'I HI YOHANES 15 Bible Online

ANU PINOTO'I HI YOHANES 15 - Saluan bible

ANU PINOTO'I HI YOHANES 15

¹Lapas aijo' aku nontoamo aita' i langit anu okabangangi ka' anu opalias hondo madi' ko gampanyo. Daagi' ko malaikat aha popitu' tiba balaa' anu toka mae i mihinyo. Aiyamo na kamingkotannyo na Tumpu nombee' mae tambuha'-Nyo.

²Lapas aijo' aku nontoamo ndalangon anu sumo mongkitaan ka' apa-apaa anu mogalo-galo' apu. Aku nontoa mule' to mia-mian anu nohungku'imo binatang ka' patongnyo, ka' nohungku'imo mian anu sanggonyo pinokonanmo tanda nomon. To mia-mian anu nohungku'imo aijo' tinuminjo i biwi nu ndalangon anu sumo mongkitaan ka' totoong hi aha na kasapi anu binee' nu Tumpu hi aha.

³ Ka' aha nonyanyiakon nyanyian i Musa, posaihon nu Tumpu Allah, ka' nyanyian nu Anak nu Domba. Sumo uuka na koonyo, “Tumpu, Tumpu Anu Matangkas na kuasanyo. Palias hondo na kodaka'nyo ka' okabangangi na iwi-iwi' anu binaumo nu Belento! Tomundo nu bansa iwi-iwi', palias na ko adinnyo ka' totu'u apaa na anu binaumo nu Belento!

⁴ Ihe na anu madi' mabuhuk hi Kita Tumpu? Te ihe na madi' mongka'oho' mompolele katalasanggoan-To! Olamo Kita na anu susi'. Iwi-iwi' na bansa tokaje mae monsombah Belento kalana apa-apaa na anu binaumo nu Belento mian iwi-iwi' nontoamo.”

⁵ Lapas aijo' aku nontoamo Laigan nu Tumpu i suluga' tinontuhea'mo, ka' Kemah nu Tumpu kiijo' i unonyo.

⁶Lantas popi-popitu' na malaikat tiba popi-popitu' na balaa' aijo' nosabatmo mae lengkat i Laigan nu Tumpu. Baju' nu aha lenan na kina'ut anu belesi' hondo ka' jongkilaban. Ka' aha nompake pongkukubi saha'an mosoni' na binau.

⁷Lapas aijo' sala'sa'angu' na malaikat hi anu opat aijo' nombee'mo hi popitu' na malaikat aijo', popitu' na tampat mosoni' na binau anu pinobuke'anmo nu pusa nu Tumpu — Tumpu anu tumuu' sampe toka sidu-sidutu'.

⁸ Sahingga Laigan nu Tumpu aijo' nobuke'mo nu tibuk nu katalasanggoan ka' kuasa nu Tumpu. Ka' de popitu' na balaa' anu binoa mae nu popi-popitu' na malaikat aijo' ma'isa mingkot, madi' ko samian pe'e na anu timbali minsoop i Laigan nu Tumpu Allah.