Read Saluan ANU PINOTO'I HI YOHANES 16 Bible Online

ANU PINOTO'I HI YOHANES 16 - Saluan bible

ANU PINOTO'I HI YOHANES 16

¹Lantas aku nohongo potatae anu daka' lengkat mae i Laigan nu Tumpu potatae hi malaikat anu popi-popitu' aijo', “Lako'mo bubusakon na isi nu popitu' na tampat pinongisian tambuha' nu Tumpu aijo' i bawo nu dunia!”

² Malaikat anu momonanyo nambamo ka' nombubusakon, isi nu tampat aijo' i dunia. Sahingga i lubatmo na to bisu-bisun anu talalo hondo monguntuki iwi-iwi' mian anu ko tanda nu binatang aijo', ka' hi to mia-mian anu monsombah patongnyo.

³Lapas aijo' malaikat anu ko ohua'nyo nombubusakonmo isinyo nu tampat aijo' nokaiyong i ambai. Sahingga ambai suele tinimbalimo sumo baso' nu mian anu natemo, ka' natemo na iwi-iwi na binatang anu tumuu' i uno nu ambai.

⁴ Lapas aijo' malaikat anu ko totolu'nyo nombubusakonmo isi nu tampatnyo aijo' i to kau-kaunyo ka' i to mata-mata nu uee, sahingga songko-songko na uee tinimbalimo baso'.

⁵Aku nohongomo malaikat anu mongkuasai uee notatae, “Hukuman anu binee'mo nu Belento atina' adin, memang Talalo hondo sisi', Tumpu anu daagi' ka' anu polo-polo'mo daagi'!

⁶Aha nombubusakonmo baso' nu mian anu pinalesayamo hi Tumpu Allah ka' baso' nu to nabi-nabi; uuka aiya Belento nompo'inummo aha nu baso'. Memang konanyomo na aijo' hi aha!”

⁷Lantas aku nohongomo potatae lengkat mae i mezbah nontaloakon, “Tumpu, Tumpu Anu Matangkas na kuasanyo, totu'u ka' adin na hukuman iwi-iwi' anu binee'mo nu Belento!”

⁸Lapas na aijo' malaikat ko opatnyo nombubusakonmo isi nu tampatnyo i batu nu sinaa, sahingga batu nu sinaa pinobee'mo mompapui mian nu panasnyo anu talalo hondo aijo'.

⁹Mian pinapuanmo nu anu talalo hondo mapanas aijo' sahingga aha nongkutukimo sanggo nu Tumpu, anu mongkuasai balaa' haha aijo'. Mau mule' sumo aitu, aha madi' mongka'oho' da madi'mo lewa' mombau dosa' nu aha, ka' madi'mo mongka'oho' mompuji' katalasanggoan nu Tumpu.

¹⁰ Lantas malaikat ko olima'nyo nombubusakon isi nu tampat aijo' i kasuhangan nu binatang aijo'. Sahingga iwi-iwi' na anu nu palentah nu binatang aijo' pinintungmo, sahingga mian nombahe'mo jila'nyo kalana talalomo sinansala.

¹¹Lantas aha nongkutukimo Tumpu i suluga' kalana talalomo sinansala na aha ka' kalana bisun haha aijo' anu nongkonamo aha. Panyo aha madi' ahi' mombabali'i kalakuan anu ma'idek anu lewa'mo binau nu aha.

¹² Lapas aijo' malaikat ko anomnyo nombubusakonmo isi nu tampat aijo' i Kaunyo nu Efrat anu daka' aijo'. Jadi kaunyo aijo' noti'imo sahingga to tomu-tomundo anu lengkat mae i sasu kabete'an noko alamo i lumajang nontulu i kiijo'.

¹³Lantas aku nontoamo totolu' na roh anu ma'idek sumo bahangkakak. Toto sa'angu' na bahangkakak haha aijo' nosabatmo mae i nganga' nu ulo anu talalo daka' hondo, lengkat i nganga' nu binatang ka' lengkat i nganga' nu nabi anu madi' totu'u.

¹⁴Aha atina'mo na to roh-roh ma'idek anu nombau manjoo' na anu okabangangi. Toto-totolu' na roh ma'idek aijo' namba hi iwi-iwi' na tomundo i songko-songko na dunia ka' nomposihukmo aha da mahampate i Sinaa daka' anu olame'akon, aijo'mo Sinaa nu Tumpu Allah Anu Matangkas na kuasanyo.

¹⁵ “Potombihing mae! Aku toka mae sumo anu montomang! Mohumpak ka'ima'an na mian anu tataap mosadia ka' monjaga baju'nyo, sahingga ia madi' langgo' na lumajang, ka' ma'ambangmo i ahop nu mian da'isan!”

¹⁶ Lapas aijo' to roh-roh anu ma'idek aijo' nomposihukmo to tomu-tomundo aijo' i tampat anu osanggohi nu basa' Ibrani, Harmagedon.

¹⁷Lapas aijo' malaikat anu ko popitu'nyo nombubusakonmo isi nu tampatnyo aijo' nokiita' i langa. Sahingga i hongomo na potatae anu daka' hondo lengkat mae i kasuhangan kiita' i Laigan nu Tumpu, anu nontaloakon, “Ilapasmo!”

¹⁸ Lantas kinilatonmo moto-mototaaman ka' onyi' nu gohung dolu-dolundungan ka' pinoka-pokalapitmo, ka' mule' luulu' anu daka' hondo. Madi' toho' kino luulu' anu jinadi sumo aijo' salatan pe'e mian pinotimbali. Aiyamo na luulu' anu talalo daka' hondo!

¹⁹ Kota anu daka' aijo' nobagi-bagimo tinimbalimo totolu' na bahagian, ka' i nohopu'mo suele na to kota-kota, iwi-iwi' na negara i dunia aiya. Lantas Tumpu tinonginau'mo hi Babel anu daka' aijo'. Saba' Tumpu nompo'inummo anggur anu aijo' i tampat pinongisian anggur nu Tumpu — aijo'mo anggur pusa-Nyo anu tahahumo hondo.

²⁰ Iwi-iwi' na togong madi'mo daagi' ka' iwi-iwi' na bungkutnyo suele madi'mo ko anu daagi'.

²¹ Ujan eis anu daka' anu toto sambatu ko boatnyo limampulu' na kilogram, nanabu'mo lengkat mae i langit nontuda'mo to mia-mian. Sahingga kinutukanmo nu aha na Tumpu kalana balaa' nu ujan eis anu daka' hondo aijo'.