Read Saluan ANU PINOTO'I HI YOHANES 17 Bible Online

ANU PINOTO'I HI YOHANES 17 - Saluan bible

ANU PINOTO'I HI YOHANES 17

¹ Lapas aijo' sala'samian na malaikat anu aha popitu' aijo' nontoongimo popitu' na tampat nu anggurnyo tinoka mae hi belengku ka' notatae, “Imbo', ku potiju'je hi belemiu mosia na anu talalo hondo masala' aijo' o hukum, aijo'mo kota daka' aijo', anu pinotinjo koko kaunyo haha aijo'.

² To tomu-tomundo i dunia nasala'mo tiba ia, ka' anu jojoong i dunia nalangumo kalana nonginummo anggur nu anu lewa' masala'.”

³ Lantas Roh nu Tumpu nongkuasaimo aku, ka' malaikat nomboamo aku i padang mateges. I kiijo' mae aku nontoa samian na boune suha-suhang aita' i sa'angu' na binatang anu bulunyo momea' hondo, ka' anu kaho tulisan nu to sanggo-sanggo anu mompopo'ise' Tumpu. Binatang aijo' ko ubaknyo popitu' ka' tanduknyo sampulu'.

⁴ Boune aijo' nompusok baju' mingkamumu' ka' momea' hondo ka' binunga-bungan nu mainan mosoni', mata nu to mai-mainan, ka' mutiara. I limanyo totoong sa'angu' na mangko' mosoni' anu nobuke'mo nu hahan anu oka'ideki ka' mahenyu, anu i humpaknyo nasala'.

⁵I siakannyo tuli-tulis sa'angu' na sanggo anu madi' osumbu-sumbu' na alati'nyo. Sanggo aijo', aijo'mo Babel Anu Daka'; tina nu iwi-iwi' mian masala' ka' mian anu palaganta i dunia.

⁶Lantas tinoangkumo taalu' boune aijo' nalangumo nu baso' nu mian anu pinalesayamo hi Tumpu ka' baso' nu to mia-mian anu pinateanmo kalana tulu-tulutan hi Yesus. Salatan aku nontoamo boune aijo', aku kino banga-bangangmo.

⁷Lantas malaikat aijo' notataemo mae hi belengku, “Apaa na sababnyo beleyum kino banga-bangangmo? Da ku poto'i hi beleyum na lahasia nu boune aijo' ka' lahasia nu binatang anu sinake'annyo, aijo'mo binatang anu ko tanduknyo popitu', ka' ubaknyo sampulu'.

⁸ Binatang aijo' naipuan mae toho'mo tinumuu', panyo uuka aiya madi'mo daagi' tinumuu'. Madi'mo pin na ia mosabatmo mae lengkat i keles kapatean ka' mambamo monsolok kapatean. To mia-mian anu tumuu' i dunia, anu sanggonyo madi' tinulis i uno nu Kitab nu Mian Tumuu' ma'isa pe'e dunia pinotimbali, tantu bangangmo de montoamo binatang aijo'. Kalana binatang aijo' naipuan mae toho'mo tinumuu'. Tempo' uuka aiya ia madi'mo daagi' tinumuu', panyo ia po'ule'je lubat.

⁹I uno nu han aiya palalu ko kapandean ka' mangalati'. Popitu' na ubak aijo', aijo'mo popitu' na bungkutnyo; aijo'mo to bungku-bungkutnyo tampat kinasuhangan nu boune aijo'. Ka' popitu' na ubak aijo' atina'mo suele popitu' na tomundo:

¹⁰Olima' anu aijo' hi aha i nanabu'mo, sa'angu' daagi' mompalentah, ka' anu sa'angu' mule' ma'isa tinoka.

¹¹Ka' binatang anu naipuan mae toho'mo tinumuu', panyo uuka aiya madi'mo daagi' tinumuu', atina'mo na tomundo anu ko uwalu'nyo. Ia atina'mo na sala'samian anu aha popi-popitu' na tomundo aijo', anu tempo' uuka aiya hau-haunyo mambamo mompanjolongi kapatean.

¹² Sampulu' na tanduk anu tinoa nu beleyum aijo', atina'mo sampulu' na tomundo anu ma'isaje nontampu'uni nompalentah. Panyo aha obee'ije kuasa da mompalentah salaku tomundo mohingga-hinggat tiba binatang aijo', kopinnyo sajam.

¹³Sampu-sampulu' na tomundo aijo', iwi-iwi' ko patuju anu pokakana; aha iwi-iwi' mombee'mo kahosonannyo ka' kakuasa'an nu aha i binatang aijo'.

¹⁴Aha mahampateje mongewa Anak nu Domba aijo'. Panyo Anak nu Domba aijo' tiba anu saja' mombatuki Ia, anu tulu-tulutan hondo ka' anu ilaga-Nyomo ka' pinile'an-Nyomo aijo' na mompatundu' tomundo haha aijo', kalana Iamo na Tumpu nu iwi-iwi na Tuan, ka' Tomundo nu iwi-iwi na to tomu-tomundo.”

¹⁵Malaikat aijo' po'ule' notatae, “Uee anu tinoa nu beleyum aijo', tampat kinasuhangan nu to mia-mian masala' aijo', aijo'mo to bansa-bansa, to laya-layat, to nega-negara, ka' to basa-basa'.

¹⁶Sampulu' na tanduk anu tinoa nu beleyum ka' binatang aijo' mongka' idekije mian masala' aijo'. Iwi-iwi' na apaa nu agoimo nu aha na anu daagi' hi ia, ka' nu langgo'imo na ia. Antoknyo nu kaanmo nu aha ka' apuje na bau pompateinyo.

¹⁷Kalana Tumpu na nompotuka'mo i kinyonyoa nu aha da mombaumo tanga'an nu Tumpu. Tumpu nomposa'angu'mo tanga'an nu aha da mombee'mo kakuasa'an nu aha hi binatang aijo', da binatang aijo' mompalentahmo sahingga timbalimo apaa na anu tinaloakonmo nu Tumpu.

¹⁸Boune anu tinoa nu beleyum aijo', atina'mo na kota daka', anu mompalentah to tomu-tomundo i dunia.”