Read Saluan ANU PINOTO'I HI YOHANES 18 Bible Online

ANU PINOTO'I HI YOHANES 18 - Saluan bible

ANU PINOTO'I HI YOHANES 18

¹Lapas na aijo', aku nontoamo samian na malaikat sangga'at nintau' mae lengkat i suluga'. Ia ko kuasa anu daka' hondo, ka' jingkanyo nonjingkaimo songko-songko na dunia tinimbalimo majingka.

² Potataenyo daka' hondo ia noloboo'mo, “Nahungku'mo! Babel anu daka' nahungku'mo! Tempo' uuka ia tinimbalimo tampat nu to setan-setan ka' roh-roh ma'idek. I unonyo daagi' ko tomonsi' anu manjoo' na ngahanannyo anu mahenyu ka' anu nuka'ideki nu mian.

³ Kalana iwi-iwi na bansa nonginummo anggur napisu anu binaunyo nasala'. To tomu-tomundo nu dunia nasala'mo tiba ia, ka' to daga-dagang i dunia kinayamo nu napisu anu madi'mo opoko bali'i aijo'.”

⁴ Lantas aku nohongo potatae sangga'at lengkat mae i suluga' nontaloakon, “Posabatmo mae, na mian-Ku anu pinalesayamo hi Beleng-Ku! Posabatmo mae lengkat i unonyo! Bolimo belemiu mombatuki to dosa-dosa'nyo, ka' manintuangmo montanggung hukumannyo!

⁵ Kalana dosa'nyo notambunmo sinawe'mo i langit, ka' Tumpu madi'mo mongkolilimi ka'idekannyo nu aha.

⁶ Obau na ia sumo pinombaunyomo belemiu; obalosi na ia pinduan lipat han iwi-iwi' na anu binaunyomo. Isi na mangko'nyo nu inumon pinduan lipat nu anu lebe molangui anu pinosadiakonnyomo hi belemiu.

⁷ Bee'mo hi ia na kasansala'an ka' kasusa'an anu pokakana na konjoo'nyo tiba katalasanggoan ka' kasanangan anu binee'nyomo hi posi butongnyo. Kalana ia ola saja' motatae hi posi butongnyo, ‘Aku aiya tomundo boune anu mompalentah! Aku misa' balu; aku madi' mongoa'i kasusa'an!’

⁸Kalana han aijo' sahingga ola i uno nu sansinaa, na ia nukona nu balaa', — panyakit, kasusa'an, ka' kasusa'an i anu o kaan. Ka' ia nutoyo'ije nu apu, kalana Tumpu Mahakuasa anu momputusi ia aijo'.”

⁹ To tomu-tomundo i dunia anu suele nombaumo han masala' aijo' ka' napisu nu boune aijo' mohangije ka' montando'imo kota aijo' de aha montoamo tibuk ko puha-puha lengkat i apu anu montoyo'ije ia.

¹⁰Aha tuminjoje aijo' mae jo'o-jo'on, kalana aha mabuhuk na nukona nu kasansala'an anu saidi' mae nu oa'i. Aha notatae, “Ibeh, palias na balaa' nu kota anu talasanggo aijo' — kota Babel anu mahoson! I uno nu ola sajam hukuman pinokonamo!”

¹¹ To daga-dagang i dunia suele i humaangmo ka' sinusa'mo kalana boune aijo', kalana madi' ko samian pe'e na mongoli to langke-langke' anu nu podagang nu aha.

¹² Madi' ko anu mongoli mosoni', salaka, batu mainan, ka' mutiara nu aha; ka' suele hude lenan, hude mingkamumu', sutala', ka' hude anu momea' hondo; iwi-iwi na ngangahan nu kau' anu madi' toho' o humpak, to langke-langke' anu sae nu gajah na binau, ka' kau' anu toto maha-mahan na olinyo na binau, tambaga na binau, besak, ka' batu tilon, anu mokuut jongkilaban;

¹³kilit kayu manis, to lampa-lampa, dupa, mur, ka' kamangian; anggur ka' lanya', labu ka' gandum, sapi' ka' domba, ajahan ka' kereta, to posa-posaihon ka' suele mule' nyawa nu mian.

¹⁴To daga-dagang notataemo hi boune aijo', “Iwi-iwi' anu nuka'ima'i madi'mo ko anu daagi', ka' iwi-iwi' na kasanangan, ka' tumuu' molabi madi'mo daagi'. Madi'mo daagi' nu humpak nu beleyum!”

¹⁵ To daga-dagang anu kinayamo kalana badagang i kota aijo', tuminjoje aijo' mae jo'o-jo'on, kalana aha mabuhuk nukona nu kasansala'annyo. Aha saidi' mae lewa'mo humaang ka' lewa'mo mongoa'i kasusa'an.

¹⁶Lantas notatae, “Ibeh, palias na balaa' nu kota anu talasanggo aiya! Biasanyo ia mompake baju' lenan, hude mingkamumu' ka' hude momea' hondo; biasanyo me saja' mosoni' na nu pake, batu nu mainan ka' mutiara!

¹⁷ Panyo ola i uno nu sajam, iwi-iwi' na kakaya'annyo madi'mo daagi'!” Iwi-iwi' na julagang ka' anu naninsake, ka' to pega-pegawe nu kapan, ka' iwi-iwi' na mian anu polioannyo i ambai, tuminjomo aijo' mae jo'o-jo'on.

¹⁸ Ka' moloboo'mo salatan aha montoamo tibuk ko puha-puhamo lengkat i apu anu nompapumo kota aijo'. Aha notataemo hoso-hoson, “Madi' toho' ko kota sangga'at sumo kota anu daka' hondo aiya!”

¹⁹ Sahingga aha nongkakambuhakonmo abu' i ubak nu aha salaku tanda lewa'mo mongoa'i kasusa'an, lantas i humaang ka' lewa'mo noloboo', “Ibeh, palias na kota anu daka' hondo aiya i na'idekmo! Kakaya'annyo nonsaduakonmo iwi-iwi' na mian anu daagi' ko kapan i ambai kinayamo! Panyo ola i uno nu sajam, iwi-iwi' na anu daagi' hi ia madi'mo daagi'!”

²⁰ O suluga', lame'akonmo na kota aijo' anu na'idekmo! O mian anu pinalesayamo hi Tumpu, to rasul-rasul, ka' to nabi-nabi balame-lame'mo! Kalana Tumpu nohukumo ia salaku pombalosi apaa na anu binaunyomo hi belemiu!

²¹ Ilapas na aijo', samian na malaikat anu baani nohangkatmo sa'angu' na batu — sumo kodaka' nu batu ponggiling anu daka' — , lantas i lumbu'akonnyomo i uno nu ambai ka' notatae, “Sumo aiya na balu-balu'nyo nu kota Babel anu talasanggo aijo' o'alinje hoso-hoson sahingga madi'mo daagi' o humpak.

²² Onyi' nu musiik anu mahaik kasapi, anu topo manyanyi, anu mompuhi puloit ka' anu mompuhi tolompet, madi'mo daagi' o hongo kiijo' i unonyo! Madi'mo daagi' o humpak mau samian pe'e na anu pande na mokalaja i kiijo', ka' onyi' nu batu ponggilingan madi'mo daagi' ko anu ohongo.

²³Mian madi'mo daagi' montoa jingka nu sulu' anu i unonyo; ka' madi'mo daagi' kahongoan na kalame'an nu bau-bauon po'osoan i kiijo'. To daga-dagang miu atina'mo to mia-mian anu talalo tongkoimona i dunia, ka' tiba to ili-ilimu' ka' ajimat miu, belemiu nongakalimo iwi-iwi' na bansa i dunia!”

²⁴ Babel i hukummo kalana i uno nu kota aijo' i humpakmo na baso' nu to nabi-nabi, baso' nu mian anu pinalesayamo hi Tumpu Allah — osain sanggo-sanggomo baso' nu iwi-iwi' mian anu pinateannyo i dunia aiya.