Read Saluan ANU PINOTO'I HI YOHANES 19 Bible Online

ANU PINOTO'I HI YOHANES 19 - Saluan bible

ANU PINOTO'I HI YOHANES 19

¹Lapas aijo', aku nohongomo apa-apaa, sumo potatae nu mian onyi'nyo sumo gohung lengkat mae i suluga' anu lewa' moloboo' daka-daka', “O puji' na Tumpu! Tumpunto atina'mo na Tumpu anu momposalamat; Iamo na Tumpu anu talasanggo ka' matangkas na kuasanyo!

² Pomputusi-Nyo palakala adin ka' pande hondo! Ia nomputusimo hukuman hi anu talalo hondo masala', anu nongideimo dunia kalana ia lewa' masala'. Tumpu nohukumo anu masala' aijo', kalana ia nompateimo to posa-posaihon nu Tumpu.”

³ Lantas potatae nu mian da'isan aijo' lewa' mule' noloboo' daka-daka', “O puji' na Tumpu! Tibuk nu apu anu montoyo'i kota daka' aijo' ko puha-puhaje madi' ko kamingkotannyo!”

⁴Sahingga ua-uampulu' opat na polaya' ka' opat na binatang anu montikubi kasuhangan aijo' dinumaladupumo ka' nonsombah Tumpu Allah anu suha-suhang i kasuhangan aijo'. Aha notatae, “Amin! O puji' na Tumpu!”

⁵ Lantas i hongo lengkat mae i kasuhangan aijo', potatae anu nontaloakon, “O puji' na Tumpu, o belemiu iwi-iwi' posaihon nu Tumpu, ka' iwi-iwi' mian — daka' ise' — anu nonsombah Tumpu!”

⁶ Lapas aijo' aku nohongomo apa-apaa sumo potatae nu anu sanggombu na mian da'isan hondo; lewo'nyo sumo bokon anu mingkalulun ka' sumo gohung poli-polintup. Ku hongo aha notatae, “O puji' na Tumpu! Kalana Tumpu, Tumpunto anu Matangkas na kuasanyo aijo' tempo' uuka nompalentahmo!

⁷Imbo' da kita balame-lame' ka' bilahi; imbo'mo da kita mompuji' katalasanggoan-Nyo! Kalana tinokamo i sinaa ponika'an anu montoongi sanggo Anak nu Domba aijo', ka' boting-Nyo sinadiamo da oponika'mo.

⁸Baju'nyo lenan anu jongkilaban binee'mo hi ia da o pusok.” (Baju' lenan aijo' atina'mo na kala-kalakuan ma'ima' anu binaumo nu mian anu pinalesayamo hi Tumpu.)

⁹ Lantas malaikat aijo' notataemo hi belengku, “O tulis na aiya: ‘Mohumpak ka'ima'an na anu i lagamo mamba i bau-bauon pinonika'an Anak nu Domba aijo'.’ ” Lapas mule' malaikat aijo' nompaka potatae mule', “Aiyamo na lele anu totu'u lengkat mae hi Tumpu.”

¹⁰Aku dinumaladupu i ahop nu malaikat aijo' kahanda' monsombah ia, panyo ia notatae mae hi belengku, “Boli! Boli monsombah aku, sombahmo na Tumpu! Kalana aku mule' posaihon sumo beleyum ka' sumo to utu-utusum iwi-iwi' anu nintoongmo dodo-dodo i potatae anu sinisikmo i Yesus!” Kalana apaa na anu pinoto'imo i Yesus aijo'mo na anu mombee'i to mia-mian da moko ala monsisikakon hahan anu tokaje mae.

¹¹ Lapas aijo' aku nontoamo suluga' tinabuka'mo, lantas nontoamo sa'angu' na ajahan mopute'. Anu nonsake'i sanggo-Nyo Anu Mohongo-hongo hondo ka' Anu Totu'u hondo. Ia adin na momputusi hukuman ka' i uno nu pahampatean anu binau-Nyomo.

¹² Mata-Nyo moak sumo apu ka' aita' i ubak-Nyo pinosongko'-Nyo manjoo' na makota. I butong-Nyo tuli-tulis sa'angu' na sanggo; ka' ola posi Ia na monsumbu' sanggonyo aijo'.

¹³Juba' anu pinusok-Nyo i lobongnyomo i uno nu baso'. Ka' Ia osanggohi, “Potatae nu Tumpu.”

¹⁴Suludadu nu suluga' anu bau pahampate mombatuki Ia monsake'i to aja-ajahan mopute', ka' nompusok lenan anu mopute' ka' belesi'.

¹⁵ Lengkat mae i nganga'nyo nosabatmo samata na bajak anu matajom, ka' tiba bajaknyo aijo' nu hungku'ije saidi' mae na to bansa-bansa, ka' nu palentahje saidi' mae na aha nu tokon-Nyo besak. Ia mompao'je anggur i uno nu tampat pompao'an anggur tambuha' nu Tumpu Anu Matangkas na kuasanyo.

¹⁶I juba'-Nyo ka' i pa'anyo tuli-tulis na sanggo sumo uuka, “Tomundo nu tomundo iwi-iwi', ka' Tumpu nu tuan iwi-iwi'.”

¹⁷ Lantas aku nontoamo samian na malaikat tinjo-tinjo aita' i batu nu sinaa. Ia notatae daka-daka' ka' noloboo'akon hi tomonsi' iwi-iwi' anu laha-lahap i langa, “Imbo'mo sihuk mae da mongatuhimo bau-bauon anu daka', anu i lame'akonmo nu Tumpu!

¹⁸Imbo'mo da mongkaan antoknyo nu to tomu-tomundo, antoknyo nu to kapa-kapala nu suludadu anu matangkas na pangkatnyo, ka' antoknyo nu to sulu-suludadu anu baani; imbo'mo da mongkaanmo antoknyo nu to mia-mian anu monsake'i ajahan, tiba antoknyo nu to aja-ajahannyo ka' antoknyo nu iwi-iwi' mian, anu daka' ka' anu ise', posaihon ka' mian anu bebas!”

¹⁹Lapas aitu aku nontoamo binatang aijo', ka' to tomu-tomundo i dunia, ka' to sulu-suludadu nu aha nosa'angu'mo da montumbuhimo ka' mongewamo Ia anu nonsake'i ajahan mopute' aijo' ka' suludadu-Nyo.

²⁰ Sahingga binatang aijo' i hakopmo hingga-hinggat tiba to nabi-nabi anu madi' totu'u anu nombaumo hahan anu okabangangi i ahop nu binatang aijo'. (Anu okabangangi haha aijo' atina'mo na binatang haha aijo' anu nongakalimo to mia-mian anu ko tandanyo binatang aijo', ka' to mia-mian anu monsombah patong nu binatang aijo'.) Lantas binatang aijo' ka' to nabi-nabi anu madi' totu'u aijo' ingalinmo tumu-tumuu' i uno nu ndalangon apu anu banyela-nyelak ka' ko belelangnyo.

²¹Ka' suludadu nu aha pinateanmo nu bajak anu nosabat lengkat mae i nganga' nu anu nonsake'i ajahan mopute' aijo'. Sahingga to tomo-tomonsi' suele tinokamo ka' nongkaanmo majoko' hondo i antoknyo nu aha anu pinateanmo aijo'.