Read Saluan ANU PINOTO'I HI YOHANES 2 Bible Online

ANU PINOTO'I HI YOHANES 2 - Saluan bible

ANU PINOTO'I HI YOHANES 2

¹“Toka hi malaikat anu kiijo' i jama'at nu Efesus, tulismo sumo uuka: Aiyamo na potuunon lengkat mae hi Ia anu montoongi popi-popitu' na mandala' i lima koanan-Nyo, ka' i lumajang i olot nu popi-popitu' na tengke nu sulu' mosoni' aijo'.

²Ku sumbu' apaa na anu binaumo miu: Belemiu mokalaja makeke ka' sabaan hondo na belemiu. Ku sumbu' saba' belemiu madi' sanang na kinyonyoa hi mian anu ma'idek. Ka' hi to mia-mian anu mongakui butongnyo rasul padahan misa', inguji'mo miu, ka' i humpakmo miu taalu' aha baleko'.

³Komiu sabaan, ka' komiu nongoa'imo sansala kalana Aku, ka' komiu madi' mongoa'i mompele-pele.

⁴Panyo aiya na Ku poto'i toka hi belemiu: Komiu madi'mo daagi' nongkalibosi Aku sumo imoonanyo.

⁵Kalana aijo' o inau', sangkeheng na komiu talalomo nanabu'! Balatobatmo i to dosa-dosa' miu, ka' obau na anu binaumo miu imoonanyo. De madi' saba' Aku tokamo mae hi belemiu, ka' mombubut tengke nu sulu' miu aijo' i tampatnyo.

⁶Mau pe'e daagi' ko apa-apaa anu ma'ima' hi belemiu, aijo'mo: Komiu nongka'idekimo apaa na anu binaumo nu to mia-mian anu nombatukimo i Nikolaus, anu suele Ku ka'ideki.

⁷ Ihe na mohongo, tionyo ahi' mompalahatikan apaa na anu nutaloakon nu Roh nu Tumpu hi to jama-jama'at! Aha anu noko alamo sinabaan ka' nontahan soba'an, Ku pobee'je mongkaan bua' nu kau' kantumuu'an anu tinumuu' i Kalaja'an Suluga' nu Tumpu.”

⁸ “Toka hi malaikat anu kiijo' i jama'at nu Smirna, tulismo sumo uuka: Aiyamo na potuunon lengkat mae hi Ia anu i momona ka' anu imihinyo — anu sinilakamo ka' po'ule'mo tinumuu'.

⁹Ku sumbu' na kasusa'an-kasusa'an miu; Ku sumbu' na komiu kasiasi panyo anu sahondo-hondonyo ahi' komiu kaya! Ku sumbu' na to pita-pitana' anu pompitana'i komiu nu to mia-mian anu mongakui butongnyo mian nu Yahudi, padahan misa'; aha atina'mo na mian nu Ibilis!

¹⁰Boli mabuhuk i kasansala'an anu madi'mo daagi' pin tionyo o'oa'imo miu. O inau', Ibilis momposoopje sambahagian anu atina' hi komiu i uno nu talungku' monsobai miu. Komiu mongoa'ije sansala sampulu' na sinaa na kopinnyo. Tionyo ahi' komiu tulu-tulutan hi beleng-Ku sampe mate, sahingga aku mombee'ije hi beleyum kantumuu'an kopian ka' sampe toka sidu-sidutu' salaku tamboo inguntungmo, i uno nu kasabalan.

¹¹ Ihe na mohongo, tionyo ahi' mompalahatikan apaa na anu tinaloakon nu Roh nu Tumpu toka hi to jama-jama'at! Aha anu inguntungmo i uno nu kasabalan madi'mo sahondo-hondonyo mongoa'i kasansala'an apa-apaa nu kapatean anu kopinduannyo.”

¹²“Toka hi malaikat anu kiijo' hi jama'at nu Pergamus, tulismo sumo uuka: Aiyamo na potuunon lengkat mae hi Ia anu montoongi bajak matajom poti-potimbiha'.

¹³Ku sumbu' iya na kajongan miu, aijo'mo i tampat kajojoongan nu Ibilis. Komiu nohongo-hongomo Aku. Aitu pe'e tempo'nyo i Antipas, sakising-Ku anu mohongo-hongo aijo', pinateanmo i ahop miu i tampat nu Ibilis, belemiu madi' nompojalo aku, panyo belemiu palesaya ahi' hi beleng-Ku.

¹⁴ Mau mule' sumo aitu daagi' ko to pia-piangkuka na han anu madi' Ku ka'ima'i hi belemiu: Daagi' ko sambahagian na mian atina' hi belemiu anu nontulutimo apaa na anu ingajanakonmo i Bileam. I Bileam nompogulu'mo i Balak mosia na monabu'akon mian nu Israel i uno nu dosa'; aijo'mo pagala monsale'i aha mongkaan kaanon anu sinombahkonmo hi pilogot ka' mombau hahan masala'.

¹⁵Sumo aitu mule' daagi' ko anu itina' hi belemiu na to mia-mian anu mintoong i pangajalan nu to mia-mian anu montuluti i Nikolaus.

¹⁶Kalana aijo', balatobatmo i to dosa-dosa' miu! De madi' saidi' mae Aku po'ule'je toka hi belemiu ka' mompahampateakon mian haha aijo' nu bajak anu aiya i nganga'-Ku.

¹⁷ Ihe na mohongo, tionyo ahi' mompalahatikan apaa na anu nutaloakon nu Roh nu Tumpu toka hi to jama-jama'at! Aha anu inguntungmo i uno nu kasabalan, Ku pobee'je na mongkaan manna anu ma'isa nusumbu' nu aha, ka' toto samian mohumpakje hi beleng-Ku sambatu na batu mopute'. I batu aijo' tinulis sa'angu' na sanggo anu sala'je, anu madi' nu sumbu' nu mian mau pe'e pa' ihe, de misa' mian anu memang mohumpak.”

¹⁸“Toka hi malaikat anu kiijo' hi jama'at nu Tiatira, tulismo sumo uuka: Aiyamo na potuunon lengkat mae hi Anak nu Tumpu, anu mata-Nyo moak sumo apu ka' tengke-Nyo mimboyai' sumo tambaga pinapuan.

¹⁹Ku sumbu' iwi-iwi' na anu binaumo miu — Ku sumbu' komiu mongkalibosi sangko gampa miu, belemiu mohongo-hongo, belemiu nokalajamo ka' belemiu sabaan na mongoa'i sansala. Ku sumbu' belemiu tempo' uuka aiya nokalajamo lebe manjoo' molingkudui naipuan mae.

²⁰Panyo aiya na Ku poto'i hi belemiu: Belemiu nongkanonongimo i Izebel, boune anu mongakui butongnyo pokauhon nu Tumpu aijo'. Manjoo'mo na to posa-posaihon-Ku anu ingakalannyomo ka' ingajannyo da masala', da mongkaan kaanon anu sinombahkonmo hi pilogot.

²¹Binee'-Kumo na ia na kasampatan da balatobatmo i to dosa-dosa'nyo, panyo ia madi' mongka'ima'i montibahakon hahan masala' aijo'.

²²Jaga! Ku sapahakonje na ia sampe masakit i tampat kamale'annyo. I kiijo' ia ka' to mia-mian anu masala' tiba ia mongoa'ije kasansala'an hondo-hondo. Iwi-iwi' aijo' Ku baumo uuka aiya madi'je Ku bau — de aha madi'mo mombau hahan anu ma'idek hingga-hinggat tiba ia.

²³ Anu mombatuki ia Kupatei suele da iwi-iwi' na jama'at sinsumbu' saba' Akumo na Ia anu mompangalati'i pikilan ka' kinyonyoa nu mian. Komiu Ku balosije sumo apaa na anu binaumo miu i toto samian.

²⁴Panyo belemiu anu sansangga'atannyo i Tiatira madi' nontuluti pangajalan anu ma'idek aijo', ka' madi' monggulu'i to panga-pangatahuan nu Ibilis. Aku notataemo tukoongku, Aku madi' montuangi hi belemiu kolonon anu mompatikoboati.

²⁵Panyo de tokamo i tempo'nyo Aku tokamo mae, tionyo ahi' belemiu saja' mombatuki apaa na anu daagi'mo hi belemiu.

²⁶ Aha anu inguntungmo, i uno nu kasabalan ka' anu sampe toka imihinyo na mombau apaa na anu Ku kahanda'i, Kubee'ije kuasa anu pokakana sumo anu i humpak-Kumo hi Tuumang-Ku. Aha montalimaje kakuasa'an hi beleng-Ku da mompalentah to bansa-bansa nu tokon besak, da bau pohopu'i to bansa-bansa aijo' sumo kuhon tano'.

²⁸Aha montalimaje mandala' nu kabete'an hi beleng-Ku.

²⁹Ihe na mohongo, tionyo ahi' mompalahatikan apaa na anu nutaloakon nu Roh nu Tumpu toka hi to jama-jama'at!”