Read Saluan ANU PINOTO'I HI YOHANES 20 Bible Online

ANU PINOTO'I HI YOHANES 20 - Saluan bible

ANU PINOTO'I HI YOHANES 20

¹Lapas aijo', aku nontoamo samian na malaikat nintatau' mae lengkat i suluga'. I limanyo totoong na gunsing nu keles kapatean ka' sa'angu' na pompungu besak anu daka'.

² Lantas ia nohakop ulo anu daka' hondo aijo', ulo aijo' pininmo hondo — aijo'mo Ibilis kabai Roh anu Ma'idek aijo' — ka' nompungumo ia samadala na taun na kopinnyo.

³Lapas mae malaikat aijo' nongalinmo ulo anu daka' hondo aijo' i uno nu keles kapatean, lantas nonggunsingmo keles kapatean aijo' ka' sinegennyomo na ulo anu daka' hondo aijo' da madi'mo daagi' moko ala mongakali to bansa-bansa i uno nu tempo' samadala na taun na kopinnyo aijo'. Lapas aijo', ia opolapasmo ka' tempo'nyo madi'mo pin.

⁴ Lantas tinoangkumo na to kasu-kasuhangan, ka' to mia-mian anu sinumuhang i to kasu-kasuhangan haha aijo' binee'anmo kuasa da momputusi hukuman. Aku nontoa suele santuu' nu to mia-mian anu kinolongmo na ubaknyo kalana aha nompototu'umo i Yesus, ka' nompolelemo potuunon lengkat mae hi Tumpu. Mian haha aijo' madi' monsombah binatang kabai patongnyo. Aha mule' madi' toho' nontalima tanda nu binatang aijo' i siakan kabai i lima nu aha. Sahingga aha po'ule'mo tinumuu' ka' po'ule'mo nompalentah salaku tomundo tiba i Kristus kopinnyo samadala na taun.

⁵Aiyamo na anu momonanyo to mia-mian anu sinilakamo po'ule'mo opotumuu'. (Panyo to mia-mian anu sinilakamo sangga'at madi'mo po'ule' opotumuu' i tempo' anu kopinnyo samadala na taun aijo'.)

⁶Mohumpakmo ka'ima'an na to mia-mian anu po'ule'mo o potumuu' i bahagian anu momonanyo aijo'. Aha konanyomo na timbali anumo nu Tumpu. Kasilakan anu kopinduannyo madi'mo mongkuasai aha. Aha timbalimo to ima-imam nu Tumpu, ka' to ima-imam i Kristus; ka' aha mompalentahje tiba Ia kopinnyo samadala na taun.

⁷De lapasmo na tempo'nyo samadala na taun aijo', Ibilis o lapasakonmo i pinontalungku'an,

⁸ ka' ia mambamo mongakali to bansa-bansa anu nololomo i songko-songko na dunia, atina'mo i Gog ka' i Magog. Ibilis momposihukmo aha da mahampatemo, manjoo' hondo, sumo konjoo'nyo nu bone' i ambai.

⁹Sahingga aha mule' nobagi-bagimo i songko-songko na dunia, lantas nontumbuhimo kemah nu mian anu pinalesayamo hi Tumpu ka' kota anu nu kalibosi nu Tumpu. Panyo apu tinudunmo lengkat mae i langit ka' mohopu'imo aha.

¹⁰Lapas aijo' Ibilis anu nongakalimo aha aijo', i lumbu'akonmo i uno nu apu anu sumo ndalangon ka' belelang. I kiijo'mo na tampatnyo nu binatang ka' nabi anu madi' totu'u aijo' ingalin momonanyo. Aha sinakisamo sinaa ka' malom sampe toka sidu-sidutu'.

¹¹ Lapas aijo', aku nontoamo sa'angu' na kasuhangan mopute' ka' daka', ka' Ia anu sinumuhang aita'. Langit ka' tano' i madi'mo ko anu i ahop-Nyo, sahingga madi'mo daagi' tinoa.

¹²Ka' aku nontoamo to mia-mian anu sinilakamo, anu daka'mo ka' anu daagi' ise', tinuminjo i ahop nu kasuhangan aijo'. Sahingga to kita-kitab suele pinaha buka'mo. Lantas sa'angu' na kitab sangga'at binuka'mo, atina'mo Kitab nu Mian anu Tumuu'. Lapas aijo' hukuman inabu'akonmo hi mian anu sinilakamo, sitimbang tiba anu binaumo nu aha susumo anu tinulismo i uno nu kitab haha aijo'.

¹³Lantas ambai nombee'mo to mia-mian anu sinilakamo, anu kiijo' i unonyo. Kapatean ka' Dunia Kapatean suele nombee'mo to mia-mian anu sinilakamo anu daagi' kiijo' hi ia. Ka' mian haha aijo' anu sinilakamo iwi-iwi' pinokonanmo hukuman anu sinitimbangmo tiba anu binaumo nu aha.

¹⁴Lapas aijo' Kapatean ka' Dunia Kapatean i lumbu'akonmo i uno nu apu anu sumo ndalangon. (Apu anu sumo ndalangon aiya, atina'mo na kapatean anu kopinduannyomo.)

¹⁵To mia-mian anu madi' tinulis na sanggonyo i uno nu Kitab nu Mian anu Tumuu', o'alinmo i uno nu apu anu sumo ndalangon.