Read Saluan ANU PINOTO'I HI YOHANES 21 Bible Online

ANU PINOTO'I HI YOHANES 21 - Saluan bible

ANU PINOTO'I HI YOHANES 21

¹ Lantas aku nontoamo langit bu'ou ka' tano' bu'ou. Langit anu momonanyo ka' tano' anu momonanyo madi'mo daagi', ka' ambai suele madi'mo daagi'.

² Sahingga aku nontoamo kota susi' aijo', aijo'mo Yerusalem nintatau' mae lengkat i suluga' hi Tumpu. Kota aijo' pinosadiakonmo sumo samian na boting boune binaju'anmo da monsingkabotimo boting mo'ane.

³ Lantas aku nohongomo potatae lengkat mae i kasuhangan aijo' notatae mae daka-daka', “Tempo' uuka tampat kajojoongan nu Tumpu tibamo mian! Ia tumuu'mo tiba aha, ka' aha timbalimo mian anu palesayamo hi Ia. Tumpu jojoongmo tiba aha, ka' timbalimo Tumpu nu aha.

⁴ Ia na monsapuimo iwi-iwi' na lolu' i mata nu aha. Madi'mo daagi' ko anu silaka; kasusa'an, mohaangi, kabai kasakitan suele madi'mo daagi'. Hahan anu pininmo madi'mo daagi'.”

⁵Lantas Ia anu sinumuhang aita' i kasuhangan aijo' notataemo, “Tempo' uuka Aku mompotimbalimo iwi-iwi' bu'ou!” Ia notatae mule' hi belengku, “Tulismo na aiya, kalana potatae haha aiya totu'u ka' timbali opalesaya.”

⁶ Lantas Ia notataemo, “Ilapasmo! Akumo na anu momonanyo, ka' anu imihinyo; Akumo na Tumpu lengkat pe'e Momonanyo toka-toka Imihinyo. Batu-batu mian anu megot, Ku po'inumije madi' pilenje o'oli i mata nu uee anu mombee'i kantumuu'an.

⁷ To mia-mian anu inguntungmo i uno nu kasabalan montalimaje hahan aijo' hi Beleng-Ku. Aku timbalimo Tumpunyo, ka' ia timbalimo anak-Ku.

⁸Panyo mian anu madi' sabaan, geguan, mian anu palaganta pampatei, mian masala', mian anu ko ajimat, monsombah pilogot, ka' iwi-iwi' na anu baleko' o'alin i uno nu apu anu sumo ndalangon ka' belelang anu lewa' moak, aijo'mo na kapatean anu kopinduannyo.”

⁹Sala'samian anu aijo' hi aha popitu' na malaikat anu nontoongimo tampat haha aijo' nu anggur anu nobuke'mo nu popitu' na balaa' anu imihinyo aijo', tinokamo hi belengku ka' notatae, “Imbo'! Ku potiju'je hi beleyum na Boting, aijo'mo bengkele' nu Anak nu Domba.”

¹⁰ Sahingga Roh nu Tumpu nongkuasaimo aku, ka' malaikat aijo' nomboamo aku i bawo nu bungkutnyo anu talalo matangkas hondo. Ia nompotoamo hi belengku Yerusalem, kota anu susi' aijo', kota aijo' nintatau' mae lengkat i suluga', lengkat mae hi Tumpu,

¹¹tiba kahandan ka' katalasanggoan nu Tumpu. Kota aijo' jongkilaban sumo batu mainan, sumo batu anu moho-moho' sumo intan anu talalo jongkilaban.

¹² Mesen titikub matangkas ka' daka', ka' mule' sampulu' ka' ohua' na sabatannyo anu daka', ka' nu jagai nu sampulu' ka' ohua' na malaikat. I sabatan daka' haha aijo' tinulismo na to sanggo-sanggo nu sampulu' ka' ohua' na tulunan mae nu bansa Israel.

¹³Totolu' na sabatan daka', anu mo'ahop i batu-batu po'ahopannyo: totolu' sasu Kabete'an, totolu' i sasu Salatan, totolu' i sasu Utara, ka' totolu' mule' i sasu Kinsoban.

¹⁴Mesen nu kota aijo' pinotinjo i bawo nu sampulu' ka' ohua' na batu katinjoannyo. I batu katinjoannyo haha aijo' tinulis na iwi-iwi' na sanggo nu sampulu' ka' ohua' na rasul nu Anak nu Domba aijo'.

¹⁵ Malaikat anu notatae mae hi belengku aijo', ko tokon mosoni' da bau pongukun kota aijo', iwi-iwi' na sabatan anu daka' aijo' ka' mesennyo.

¹⁶Kota aijo' binau simpale' opat — komantannyo pokakana sumo kobolaanyo. Sahingga malaikat aijo' nongukunmo kota aijo' nu tokonnyo anu bau pongukunnyo; lantas komantannyo sinumbu'mo 2.400 kilometen; kobolaanyo ka' kotangkasnyo pokakana sumo komantannyo.

¹⁷Salatan malaikat aijo' nongukunmo mesennyo, sinumbu'mo na kotangkasnyo nu mesen aijo' anompulu' na meten. Ukulan anu pinake nu malaikat aijo' atina'mo na ukulan anu nupake nu mian.

¹⁸ Mesen nu kota aijo' batu mainan na binau buhitnyo mobilu' ka' jongkilaban, panyo kota'nyo mosoni' na binau anu madi' ko galo'nyo, jongkilaban sumo kasa.

¹⁹Iwi-iwi' na batu pinompotinjoan kota aijo' binunga-bungan nu iwi-iwi' na ngahan nu batu mainan. Batu pinompotinjoan anu momona batu mobilu' jongkilaban na binau, anu ko ohua'nyo batu mainan mobilu' na binau, ko totolu'nyo batu mainan na binau, ko opatnyo batu mobilu' na buhitnyo na binau,

²⁰ko olima'nyo anu mopute' ka' i unonyo sumo anu sokolat gio-gio' momea' na binau, ka' ko anomnyo batu dalima na binau, ko popitu'nyo batu buhitnyo mokini sumo mosoni' na binau, ko uwalu'nyo batu buhitnyo talalo mobilu' hondo na binau ka' ko osio'nyo batu anu ko halaga'nyo hondo, buhitnyo mokini na binau, ko sampulu'nyo batu mainan buhitnyo mobilu' gio-gio' sokolat na binau, ka' ko sampulu' sa'angu'nyo batu mainan buhitnyo mobilu' mingkamumu' na binau, ka' anu ko sampulu' ka' ohua'nyo batu buhitnyo mingkamumu' na binau.

²¹Anu sampulu' ka' ohua' na sabatan daka' aijo', anu binau sampulu' ka' ohua' na mutiara, toto sa'angu' na sabatannyo, mutiara na binau. Jalan i kota aijo' mosoni' anu madi' ko galo'nyo na binau sumo kasa anu jongkilaban.

²²Aku madi' nontoa Laigan nu Tumpu i kota aijo', kalana Laigan nu Tumpu-Nyo atina'mo Tumpu, Tumpu Anu Matangkas na kuasanyo ka' Anak nu Domba aijo'.

²³ Kota aijo' madi' palalu nujingkai nu batu nu sinaa kabai bitu'on, kalana katalasanggoan nu Tumpu na monjingkai, ka' Anak nu Domba aijo', atina'mo na sulu'nyo.

²⁴ To bansa-bansa i dunia lumajangje i uno nu jingkanyo, ka' to tomu-tomundo mule' momboaje kakaya'an nu aha i uno nu kota aijo'.

²⁵ To saba-sabatan daka' i kota aijo' tabuka' sansina-sinaa; madi' otumban, kalana madi' nukona nu malom na i kiijo'.

²⁶Katalasanggoan ka' kakaya'an nu to bansa-bansa oboaje i uno nu kota aijo'.

²⁷ Panyo mian anu mombau hahan anu pahengas kabai mian anu baleko' — o ala kodo-kodo' mau mule' apaa na anu mahenyu, madi' hondo-hondo minsoop i unonyo. Anu minsoop ola ahi' mian anu sanggonyo kiijo' tuli-tulis i uno nu Kitab nu Mian anu Tumuu', Kitab Anak nu Domba aijo'.