Read Saluan ANU PINOTO'I HI YOHANES 22 Bible Online

ANU PINOTO'I HI YOHANES 22 - Saluan bible

ANU PINOTO'I HI YOHANES 22

¹ Malaikat aijo' suele nompotoa hi belengku kaunyo anu ueenyo mombee'i kantumuu'an. Uee nu kaunyo aijo' jongkilaban sumo intan ka' mo'ili lengkat mae i kasungan nu Tumpu ka' Anak nu Domba aijo',

² i totonga' nu jalan i kota aijo'. I sonibi nu kaunyo aijo', poti-potimbiha'nyo daagi' ko kau' pinolengkatan mae nu kantumuu'an, anu mimbua' pinsampulu' ka' ohua' sataun, aijo'mo minsan sambitu'on. Honnyo o'ala bau pakuli' pompa'alin sakit nu to bansa-bansa.

³ I uno nu kota aijo' madi' ko apa-apaa anu kinonamo nu kutuk nu Tumpu. Kasuhangan nu Tumpu ka' Anak nu Domba aijo' tokamo saidi' mae i uno nu kota aijo'. To posa-posaihon-Nyo saidi' mae monsombahje Aha,

⁴ka' montoamo ohup-Nyo. Sanggo-Nyo saidi' mae o tulisje i siakan nu Aha.

⁵ Aha madi'mo mompalalui sulu' kabai jingka nu batu nu sinaa, kalana madi'mo daagi' pihi, ka' Tumpuje na monjingkai aha. Sahingga aha saidi' mae mompalentahmo susumo tomundo sampe toka sidu-sidutu'.

⁶Lantas malaikat aijo' notatae mae hi belengku, “Potatae haha aiya totu'u ka' timbali opalesaya. Tumpu na mombee' Roh-Nyo aijo' hi to nabi-nabi, nompokaumo malaikat-Nyo da mompoto'iakon hi to posa-posaihon-Nyo apaa na anu malia'mo timbali.”

⁷“Opalahatikan na aiya!” na koo-Nyo i Yesus, “Aku malia'mo toka. Mohumpak ka'ima'an na mian anu tulu-tulutan i potatae, apaa na anu saidi' mae jadi anu pinoto'imo i kitab aiya!”

⁸Aku, i Yohanes nohongomo ka' nontoamo iwi-iwi' aiya. Salatan aku nohongomo ka' nontoamo, aku dinumaladupumo i ahop nu malaikat anu nompoto'imo iwi-iwi' aijo' hi belengku, ka' aku kahanda' monsombahmo ia,

⁹panyo ia notatae hi belengku, “Boli! Boli monsombah aku! Sombahmo na Tumpu! Kalana aku suele posaihon sumomo beleyum, ka' sumo to utu-utusum to nabi-nabi, ka' iwi-iwi' na mian anu tinulu-tulutanmo i potuunon anu i uno nu kitab aiya!”

¹⁰Lantas ia notatae mule', “Boli mompohowini potatae anu pinoto'imo, apaa na anu timbali saidi' mae anu tinulismo i uno nu kitab aiya, kalana ohanimo na tempo'nyo iwi-iwi' aiya timbalimo.

¹¹ Mian anu ma'idek, bakasmo da saja' mombau anu ma'idek; mian anu mahenyu, bakasmo da mahenyu na butongnyo; mian anu mombatuki pongka'oho' nu Tumpu, bakasmo da saja' mombatuki pongka'oho' nu Tumpu, ka' mian anu tumuu' samata-mata hi Tumpu, bakasmo da saja' tumuu' hi Tumpu.”

¹² “Opalahatikan na aiya!” na koo-Nyo i Yesus, “Madi'mo daagi' pin Aku tokamo ka' momboamo mae tamboonyo hi batu-batu mian bau pombalosi apaa na anu binaunyomo.

¹³ Akumo na anu momonanyo ka' anu imihinyo mae; Akumo na Tumpu lengkat pe'e mae i Momonanyo toka-toka i Kahimpusannyo.”

¹⁴ Mohumpak ka'ima'an na mian anu nombaso'imo juba'nyo sampe belesi', ka' sahingga aha ko hakmo mongkaan bua' nu kau' kantumuu'an ka' minsoopmo i uno nu kota aijo' montului sabatan daka' aijo'.

¹⁵Panyo to mia-mian anu mombau han anu mahumimi', anu mompake to aji-ajimat, to mia-mian anu mombau to kala-kalakuan masala'; anu mompatei, anu monsombah pilogot, ka' to mia-mian anu baleko', mau anu otaloakon, mau apa-apaa na palabuatan ma'idek, iwi-iwi' na mian aijo' tampatnyo i sambiha' nu kota aijo'.

¹⁶ “Aku, i Yesus, nonsaimo malaikat-Ku namba hi belemiu da ia mompoto'iakon hahan aiya bau kapalaluan nu to jama-jama'at. Aku aiya lee' mae i Daud; Akumo na mandala' nu Kabete'an anu majingka hondo aijo'.”

¹⁷ Roh nu Tumpu ka' Boting Boune aijo' notatae, “Imbo'mo!” Ihe na mian anu mohongo aiya, tionyo suele motatae, “Imbo'mo!” Ihe na anu megot, tionyo ia toka! Ka' ihe na anu mongkamilui, tionyo ia mongala uee anu mombee'i kantumuu'an aijo' madi' opai oli.

¹⁸ Toka hi batu-batu mian anu nohongomo potatae haha aiya anu pinoto'imo apaa na anu timbali saidi' mae anu tinulismo i kitab aiya, aku, i Yohanes, mombee'i pokinde' sumo uuka: de mian montuangi apa-apaa i potatae haha aiya, anu pinoto'imo nu Tumpu Allah; saba' nu tuangi nu Tumpu na hukuman nu mian aijo', nu to bala-balaa' anu tinulismo i uno nu kitab aiya.

¹⁹Ka' de mian mongga'ai apa-apaa na potatae haha aiya anu saidi' mae jadi, apaa na anu pinoto'imo nu Tumpu, saba' Tumpu Allah suele mongga'aije bahagiannyo anu tinulismo i uno nu kitab aiya — aijo'mo bahagian lengkat i kau' kantumuu'an, ka' lengkat i Kota Susi' aijo'.

²⁰Ia anu nompotokamo mae lele aiya iwi-iwi' notatae, “Totu'u, Aku malia'mo toka!” Amin! Tokamo mae o Tumpu Yesus!

²¹O'amalakon da i Tumpu Yesus mombalakati iwi-iwi' mian anu pinalesayamo hi Tumpu! 53