Read Saluan ANU PINOTO'I HI YOHANES 3 Bible Online

ANU PINOTO'I HI YOHANES 3 - Saluan bible

ANU PINOTO'I HI YOHANES 3

¹“Toka hi malaikat anu kiijo' hi jama'at nu Sardis, tulismo sumo uuka: Aiyamo na potuunon lengkat mae hi Ia anu montumpui popitu' na Roh lengkat mae hi Tumpu, ka' popitu' na mandala' aijo'. Kusumbu' apaa na anu obau miu. Koonyo belemiu daagi' tumuu', padahan belemiu i natemo!

²Kalana aijo', pobulamo ka' opohoson apaa na anu daagi' hi belemiu, da ma'isa pe'e aijo' mate totu-totu'u. Kalana i humpakumo apaa na anu binaumo miu, sa'angu' pe'e ma'isa ko anu na'ima' i ahop nu Tumpu.

³ Jadi, po'ule' o inau' apaa na anu ingajanakonmo hi belemiu u'utu mae, ka' apaa na anu i hongomo miu. Pojalanmo na aijo' ka' balatobatmo i to dosa-dosa' miu. De belemiu madi' mobula, Akuje na toka hi belemiu sumo anu montomang; ka' madi' osumbu' miu hipian na tempo'nyo Aku tokamo mae.

⁴Panyo daagi' ko anu itina' hi belemiu i Sardis mian anu mompimpali da baju'nyo saja' belesi'. Aha aijo' lumajangje mohingga-hinggat tiba Aku mompusok baju' mopute', kalana aha pantasnyomo na sumo aijo'.

⁵ Hi aha anu inguntungmo i uno nu kasabalan opopakeje na juba' mopute'. Sanggo nu aha madi'mo ohapus i Kitab nu Mian Tumuu'. Ka' i ahop nu Tuumang-Ku ka' to mala-malaikat-Nyo Ku Akuije na aha atina', Akumo na tumpu-Nyo.

⁶De ihe na mohongo, tionyo ahi' mompalahatikan apaa na anu nutaloakon nu Roh nu Tumpu toka hi to jama-jama'at!”

⁷ “Toka hi malaikat anu kiijo' hi jama'at nu Filadelfia, tulismo sumo uuka: Aiyamo na potuunon lengkat mae hi Ia anu susi', ka' anu tumuu' kopian. Gunsing i Daud Ia na montoongi; de Ia na montuhea'akon madi' ko samian pe'e na timbali montumban, ka' de Ia na montumban, madi' ko samian pe'e na timbali montuhea'akon.

⁸Ku sumbu' apaa na anu binaumo miu. Ku sumbu' saba' belemiu madi' talalo mahoson; belemiu nombatukimo pangajalan-Ku ka' nohongo-hongomo Aku. Kona hi belemiu tinuhea'akon-Kumo na sa'angu' na tumban anu madi' daagi' opoko tumban nu mau mule' pa' ihe.

⁹ O inau' na aiya: To mia-mian anu tinimbalimo mian nu Ibilis aijo', to bale-baleko' anu mangaku butongnyo Yahudi padahan misa', Ku bauje sahingga aha toka tolodadupu i ahop miu. Ka' nu sumbu'je nu aha na Aku taalu' mongkalibosi belemiu.

¹⁰Kalana belemiu nontulutimo palentah-ngKu da totu-totu'u na kinyonyoa, Aku suele monjagaije komiu i tempo' nu kasusa'an anu mongkona songko-songko na dunia. Han aijo' saidi' mae timbali da monsobai iwi-iwi' na mian i dunia.

¹¹Aku malia-lia' toka! Jagaimo ma'i-ma'ima' apaa na anu daagi'mo hi belemiu, da madi' ko samian pe'e na anu mongagoi tamboonyo nu ka'untungan miu, i uno nu kasabalan.

¹² Mian anu inguntungmo, Ku potimbali sumo ahi' i uno nu Laigan Susi' nu TumpungKu, ka' ia jojongje i tampat aijo' sampe toka sidu-sidutu'. Sanggo nu TumpungKu, ka' sanggo nu kota nu TumpungKu — aijo'mo Yerusalem bu'ou anu mintatau'je mae lengkat i suluga', lengkat hi TumpungKu — Ku tulisje i butong nu mian aijo'. Suele sanggong-Ku anu bu'ou Ku tulisje i butongnyo.

¹³De ihe na mohongo, tionyo ahi' mompalahatikan apaa na anu nutaloakon nu Roh nu Tumpu toka hi to jama-jama'at!”

¹⁴ “Toka hi malaikat anu kiijo' hi jama'at nu Laodikia; tulismo sumo uuka: Aiyamo na potuunon lengkat mae hi Sang, Amin, sakisi anu mohongo-hongo ka' anu totu'u, pinolengkatan mae nu iwi-iwi' apaa anu pinotimbalimo nu Tumpu.

¹⁵Ku sumbu' apaa na anu binaumo miu; Ku sumbu' belemiu madi' lop ka' mule' madi' mapanas. Tionyo ahi' komiu montoongi sala'sa'angu'!

¹⁶Panyo belemiu ola susumo anu moloolap madi' mapanas, ka' lop mule' madi'. Mokonyo aijo' belemiu Ku lua'je mosabat lengkat mae i nganga'-Ku.

¹⁷Belemiu notatae, ‘Kami kaya ka' sukup; kami madi' kakulangan apa-apaa.’ Panyo madi' osumbu' miu, palias na ko kasiasinyo ka' ko susa'nyo na ka'ada'an miu! Belemiu kasiasi, to langgo-langgo' ka' mapisok.

¹⁸Mokonyo aijo' Aku mompokinde'i belemiu, da mongoli hi beleng-Ku mosoni', aijo'mo mosoni' anu madi' kogalo'nyo, da komiu timbali kaya. Oli mule' suele na baju' mopute' hi beleng-Ku, da belemiu mipake ka' mongkulubi kantumuu'an miu anu langgo-langgo' ka' mongambangi. Ka' olimo na pakuli' anu o gegesakon i mata miu da belemiu timbali montoa.

¹⁹ To mia-mian anu Ku ku kalibosi, ahamo na anu Ku tewa' ka' Ku pohos. Kalana aijo' tionyo ahi' belemiu bikas ka' balatobatmo i to dosa-dosa' miu.

²⁰Toa! Aku tuminjo i ahop nu tumban ka' mongkutetek. De daagi' ko anu mohongo potataeng-Ku, ka' montuhea'akon tumban, Aku minsoopmo monsingkaboti ia; Aku mongkaanmo hingga-hinggat tiba ia ka' ia mongkaanmo hingga-hinggat tiba aku.

²¹Aha anu inguntungmo i uno nu kasabalan, Ku pobee'je sumuhang i kasuhangan-Ku tiba Aku, pokakana sumo Aku suele inguntungmo i uno nu kasabalan ka' uuka aiya sinumuhangmo tiba Tuumang-Ku i kasuhangannyo.

²²De ihe na mohongo, tionyo ahi' mompalahatikan apaa na anu nutaloakon nu Roh nu Tumpu toka hi to jama-jama'at!”