Read Saluan ANU PINOTO'I HI YOHANES 4 Bible Online

ANU PINOTO'I HI YOHANES 4 - Saluan bible

ANU PINOTO'I HI YOHANES 4

¹Lapas aijo' aku po'ule' mule' nontoa anu pinotoa mae. Aku nontoa sa'angu' na pontumban tinontuhea'mo i suluga'. Lapas aijo' kinahongoan mule' na potatae anu momonanyo noko basisikmo hi belengku sumo onyi' nu tolompet. Potatae aijo' tukoonyo, “Imbo' poliba' mae i aiya. Ku poto'ije hi beleyum apaa na anu timbali saidi' mae.”

² Balomo aku kinuasan nu Roh nu Tumpu. Lantas aku nontoa aita' i suluga' daagi' ko sa'angu' na kasuhangan, ka' daagi' ko samian na anu sinumuhang i kasuhangan aijo'.

³Ohup nu mian aijo' jongkilaban sumo mainan anu jongkilaban mobilu' ka' sumo mainan dalima. Ka' sa'angu' na tandalo' sumo batu nu mainan anu ko angga'nyo, buhitnyo mobilu' montikubi kasuhangan aijo'.

⁴Anu montikubi kasuhangan aijo', uampulu' ka' opat na kasuhangan sangga'at. I kiijo' sinumuhang aha uampulu' ka' opat na to pola-polaya' anu nibaju'mo mopute', ka' nompakemo makota mosoni'.

⁵ I kasuhangan aijo' tinolopinjitmo mae na jingkalap nu kilat ka' lontup nu gohung anu pinode-podeledekmo. Ka' i ahop nu kasuhangan aijo' popitu' na pansona' anu moak, aijo'mo popitu' na Roh nu Tumpu Allah.

⁶ Daagi' ko anu suele i ahop nu kasuhangan aijo' anu otoa sumomo ambai na mongkitaan, talalo hondo lonsinoan sumo kristal. Titikub na kasuhangan aijo', batu-batu sohipi'nyo ko malaikat opat, anu i sasu ahopnyo ka' i hikunyo kaho ko matanyo.

⁷Malaikat anu momona otoa sumo singa. Aku ko ohua'nyo sumo sapi' lakinyo. Anu ko totolu'nyo sumo ohup nu mian. Anu ko opatnyo otoa sumo bonyia' hau-haunyo laha-lahap.

⁸ Opa-opat na malaikat aijo' toto sa'angu' ko polipiknyo anom, ka' i titikubnyo ka' i sasu unonyo kaho matanyo. Sinaa ka' pihi malaikat haha aijo' madi' momohokot na manyanyi, “Susi', susi' na Tumpu Anu Matangkas na kuasanyo; anu daagi', ka' anu daagi'mo, ka' anu saja' daagi' sidu-sidutu'.”

⁹Opa-opat na malaikat aijo' monyanyiakon to elo-elok mompuji', pongadati, ka' pontalima kase hi Ia anu suha-suhang i kasuhangan aijo', aijo'mo Ia anu tumuu' sampe toka sidu-sidutu'. Ka' de malaikat haha aijo' manyanyimo,

¹⁰ua-uampulu' ka' opat na to pola-polaya' haha aijo' tolodadupumo i ahop nu mian anu suha-suhang i kasuhangan aijo', lantas monsombahmo Ia anu tumuu' sampe toka sidu-sidutu'. Lapas aijo' aha molumbu'akonmo makota nu aha haha aijo' i ahop nu kasuhangan aijo' ka' notatae,

¹¹“O Tumpu, o Tumpu mami! Ola Belento na pantas montalima pompuji', pongadati ka' kuasa. Kalana Belento na nompotimbali iwi-iwi' na apaa, ka' kalana pongka'oho' nu Belento suele iwi-iwi' apaa tinimbalimo, ka' tinumuu'mo.”