Read Saluan ANU PINOTO'I HI YOHANES 5 Bible Online

ANU PINOTO'I HI YOHANES 5 - Saluan bible

ANU PINOTO'I HI YOHANES 5

¹ Lapas aijo' aku nontoamo sa'angu' na lulunan nu kitab i lima-Nyo anu suha-suhang i kasuhangan aijo'. Kitab aijo' kaho tulisan poti-potimbiha' ka' pinonsap popitu' na segen.

²Lantas tinoangku samian na malaikat anu baani ka' mahoson lewa' moloboo' ka' potataenyo daka' hondo, “Ihe na pantas mombeak segen haha aiya ka' mombuka' kitab aiya?”

³Panyo mau anu i suluga' mau pe'e anu i dunia, kabai i aluk nu dunia madi' ko samian na anu moko ala mombuka' kitab aijo', ka' montoa unonyo.

⁴Sahingga aku lewa'mo i humaang kalana madi' ko samian na pantas mombuka' kitab aijo', ka' montoa unonyo.

⁵ Lantas sala' samian na to pola-polaya' haha aijo' notatae hi belengku, “Boli humaang! Toa! Singa anu nolengkat mae i bansa Yehuda, lee' i Daud anu talasanggo; nohungku'imo. Ia na noko ala nombeak popitu' na segen ka' nombuka' kitab aijo'.”

⁶ Lapas aijo', aku nontoa sa'angu' na Anak nu Domba tinuminjo aijo' i totonga' nu kasuhangan aijo', tinikubanmo nu malaikat opat ka' iwi-iwi' na to pola-polaya' haha aijo'. Anak nu Domba aijo', otoa sumo anu kinolotmo. Ia ko tanduknyo popitu' ka' popitu' na matanyo: Aijo'mo popitu' na Roh lengkat mae hi Tumpu anu sinaimo mae mamba i songko-songko na dunia.

⁷Lapas aijo' Anak nu Domba aijo' nalalangkasmo nokiijo' ka' nongala lulunan nu kitab aijo' anu i lima koanan nu mian anu suha-suhang i suhangan aijo'.

⁸ Hau-haunyo Anak nu Domba aijo' nombaumo sumo aijo', opa-opat na malaikat ka' uampulu' ka' opat na to pola-polaya' haha aijo' dinumaladupumo i ahopnyo. Aha toto samian montoongi kasapi ka' mangko' mosoni' anu ko isinyo kamangian, aijo'mo iwi-iwi' na do'a nu mian anu pinalesayamo hi Tumpu.

⁹ Aha nonyanyiakonmo sa'angu' na nyanyian anu sala'je aitu na i nyanyi: “Belento pantas mongala kitab aijo' ka' mombeak segen haha aijo'. Kalana Belento pinateanmo, ka' kalana Beleyum sinilakamo, mian i iwi-iwi' na tulunan, sisik, negara, ka' bansa ingolimo nu Belento da timbalimo anu nu Tumpu.

¹⁰ Beleyum nompotimbalimo aha sa'angu' na bansa da timbali samata-mata bau to ima-imam, da aha mompojalan palentah nu Tumpunto, ka' mompalentah dunia aiya.”

¹¹ Lapas aijo' aku nontoa mule'. Aku nohongo potatae nu malaikat i mada-madalannyo ka' mojuta-juta na konjoo'nyo. Aha tinuminjomo nontikubi kasuhangan aijo', ka' opa-opat na malaikat tiba to pola-polaya' haha aijo'.

¹²Ka' dinaka-daka'an nu aha na nanyanyi, “Anak nu domba anu kinolotmo aijo', pantas na montalima kuasa, kakaya'an, kapandean, ka' kahosonan; Ia pantas o adati, opopodaka' ka' o puji-puji'!”

¹³Lantas aku nohongomo iwi-iwi' na malaikat i langit, i dunia, i aluk nu dunia ka' i uno nu ambai — pende'nyo iwi-iwi' na malaikat i songko-songko na dunia aiya — nanyanyimo, “Ia anu sinumuhang i kasuhangan aijo', ka' Anak nu Domba anu Opopodaka' aijo', atina'mo na o puji', ka' o adati ka' anu talasanggo ka' mongkuasai sampe toka sidu-sidutu'!”

¹⁴Sahingga opa-opat na malaikat haha aijo' nontaami, “Amin!” Ka' to pola-polaya' haha aijo' suele dinumaladupumo ka' nonsombah.