Read Saluan ANU PINOTO'I HI YOHANES 6 Bible Online

ANU PINOTO'I HI YOHANES 6 - Saluan bible

ANU PINOTO'I HI YOHANES 6

¹Lapas aijo' aku nontoamo Anak nu Domba aijo' nombeak segen anu momona i sala'sa'angu' na segen anu popitu' aijo'. Lantas aku nohongomo aha opat na malaikat aijo', samian na notatae, “Imbo'!” Onyi' nu potataenyo aijo' sumo onyi' nu gohung.

² Sahingga aku nontoa, lantas aku nondinmo sa'angu' na ajahan mopute'. Anu nonsake'i, nontoongi sa'angu' na pompelet ka' hi ia binee'an sa'angu' makota. Ia nambamo sumo samian anu nohumpakmo ka'untungan nahampate anu mamba nompo'ago da nohumpak ka'untungan mahampate.

³Lapas aijo' Anak nu Domba aijo' nombeakmo segen anu ko'ohua'nyo, ka' aku nohongo malaikat ko'ohua'nyo notatae, “Imbo'!”

⁴ Lapas aijo' sa'angu' na ajahan sangga'at mule' nosabatmo. Ajahan aijo' momea' na bulunyo. Anu nonsake'i binee'an kuasa da mongalini paladamean i uno nu dunia, da mian mompaha pate-patei. Sahingga ia binee'an samata na bajak anu daka'.

⁵ Lantas Anak nu Domba aijo' nombeak segen anu ko totolu'nyo. Ka' aku nohongo malaikat anu ko totolu'nyo notatae, “Imbo'!” Aku nontoa, lantas nondinmo sa'angu' na ajahan mo'itom. Anu nonsake'i nontoongi sa'angu' na timbangan i limanyo.

⁶Ka' aku nohongo apa-apaa onyi'nyo sumo potatae anu moloboo' lengkat aijo' mae hi aha opat na malaikat aijo'. Potatae aijo' tukoonyo, “Saliten na gandum anu ma'ima' olinyo sumo tamboonyo nu sansinaa, ka' totolu' na liten na gandum ngahannyo sangga'at pokakana na olinyo sumo tamboo nu sansinaa suele. Panyo boli mongidei to kau-kau' zaitun ka' ale' nu anggur!”

⁷Lapas aijo' Anak nu Domba aijo' nombeakmo segen ko opatnyo. Lantas aku nohongo malaikat ko opatnyo aijo' notatae, “Imbo'!”

⁸ Aku nontoa, lantas nondinmo sa'angu' na ajahan anu me'es. Anu nonsake'i sanggonyo Kapatean. Aitu mae i hikunyo, batu-batuk, ka' ohani hondo na Dunia Kapatean. Dunia aiya o bagi opat sambagian na obee' hi aha da nukuasai nu aha, da nupatei nu aha i uno nu pahampatean, kasusa'an i anu o kaan, panyakit anu molele, ka' nukaan nu to bina-binatang anu bahangihi'.

⁹Lapas aijo' Anak nu Domba aijo' nombeakmo segen anu ko olima'nyo. Sahingga aku nontoa i aluk nu mezbah daagi' ko santuu' nu to mia-mian anu i natemo pinatean kalana aha nompototu'umo potuunon anu lengkat mae hi Tumpu anu sinakisianmo nu aha.

¹⁰Aha noloboo' daka-daka', “O Tumpu Anu Matangkas na kuasanyo, anu Susi' ka' totu'u! Daagi' hipian na kopinnyo lantas Beleyum momputusimo anu jojoong i dunia ka' mohukummo aha kalana nompateimo kami?”

¹¹Aha toto samian binee'anmo sa'angu' na juba' anu mopute'. Lantas aha pinokaumo milawe sasaingoni', sampe sukupmo na konjoo'nyo nu to sanga-sangalunyo anu tinimbalimo posaihon ka' to Utu-utus nu aha anu saidi' mae opateimo susumo aha.

¹² Lantas aku nontoa Anak nu Domba aijo' nombeak segen ko anomnyo. Sahingga jinadimo na luulu' anu daka' hondo ka' okabuhuk. Sinaa tinimbalimo no'itom sumo hude mo'itom anu makahakas, ka' bitu'on tinimbalimo nomea' sumo baso'.

¹³ To manda-mandala' nohontangmo lengkat mae aitu i langit tinudun i tano' sumo bua' nu ara anu ma'isa naha nohontangmo, salatan ginenggomo nu baleba' anu makansang.

¹⁴ Langit madi'mo tinoa sumomo kalatas anu i lulunmo, ka' iwi-iwi' na bungkutnyo ka' togong ilalinmo nompala'imo tampatnyo.

¹⁵ Lantas to tomu-tomundo i dunia, ka' to mia-mian daka', ka' pangkat-pangkat daka' nu suludadu, to mia-mian anu kaya ka' mian anu ko kuasa, ka' to mia-mian sangga'at, mau posaihon, mau anu misa' posaihon, iwi-iwi' naninsulukmo i uno nu liang ka' i olotnyo nu batu i bungkutnyo.

¹⁶ Hi to bungku-bungkutnyo ka' batu haha aijo', aha noloboo'mo, “Tuda' mae na kami! Posulukakon na kami da boli Nutoa nu anu sumuhang aita' i kasuhangan aijo', ka' da boli mohumpak tambuha' hi Anak nu Domba aijo'!

¹⁷ Sinaa anu okabuk aijo' tinokamo, uuka aiya aha mompobuntumo tambuha' nu aha, ka' madi' ko samian pe'e na moko ala totinjo i ahop nu aha!”