Read Saluan ANU PINOTO'I HI YOHANES 7 Bible Online

ANU PINOTO'I HI YOHANES 7 - Saluan bible

ANU PINOTO'I HI YOHANES 7

¹ Lapas aitu, aku nontoamo opat na malaikat tinuminjo i opa-opat na pasu'nyo nu dunia. Aha nontahanmo opa-opat na pasu'nyo nu mombun i dunia da bolimo ko mombunnyo anu tobung i katano'an, kabai i ambai, kabai mule' i to kau-kau'.

²Lantas aku nontoa samian na malaikat sangga'at nasasuba lengkat mae i sasu Kabete'an. Ia nomboa mae segen lengkat hi Tumpu anu tumuu'. Malaikat aijo' notatae daka-daka' na nolaga opa-opat na malaikat anu nohumpakmo kuasa lengkat mae hi Tumpu, da o ideimo na katano'an ka' ambai.

³ Malaikat haha aijo' notatae, “Bolimo pe'e mongidei katano'an ka' ambai kabai to kau-kau' de kami ma'isa mombee'i tanda segen i siakan hi to posa-posaihon nu Tumpunto.”

⁴Lantas pinoto'imo mae hi belengku tukoonyo konjoo'nyo 144.000 na mian anu binee'anmo tanda segen lengkat mae hi Tumpu i siakan nu aha. Mian haha aijo' ingala i anu sampulu' ka' ohua' na tulunan nu bansa Israel;

⁵lengkat i toto sa'angu' na tulunan 12.000 na mian. Aijo'mo lengkat mae i tulunan: Yehuda, Ruben, Gad,

⁶Asyer, Naftali, Manasye,

⁷Simeon, Lewi, Isakhar,

⁸Zebulon, Yusuf, ka' i Benyamin.

⁹Lapas aijo' aku nontoa mule', ka' nondin mian manjoo' hondo — madi' ko samian pe'e na moko ala molekeng konjoo'nyo. Aha to mia-mian anu lengkat mae i toto sa'angu' na bansa, tulunan, negara, ka' basa'. Aha nompusok juba' anu to pute-pute' ka' i lima nu aha paha-paha totoong na to panga-panga' nu kau' palem, mian da'isan haha aijo' tinuminjoo' nongahopi suhangan aijo', ka' mo'ahop hi Anak nu Domba aijo'.

¹⁰Lantas aha notatae daka-daka', “Kasalamatanto nolengkat mae hi Tumpunto, anu suha-suhang i kasuhangan aijo', ka' lengkat mae hi Anak nu Domba aijo'!”

¹¹Iwi-iwi' na malaikat haha aijo' tinuminjomo nontikubi kasuhangan aijo' ka' to pola-polaya' tiba aha opa-opat na malaikat haha aijo'. Malaikat haha aijo' dinumaladupumo i ahop nu kasuhangan aijo' lantas nonsombahmo Tumpu.

¹²Aha notatae, “Amin! O puji' na Tumpunto anu talasanggo ka' anu pande hondo. Ia patut saja' otaloakon talima kase, ka' o'adati. Ia matangkas na kuasanyo ka' mahoson sampe toka sidu-sidutu'! Amin.”

¹³Sala'samian na polaya' haha aijo' nompokilawamo hi belengku, “Mian haha aiya anu nompusokmo juba' mopute', ihe na aha, ka' lengkat mae iya na aha?”

¹⁴ “Aku madi' monsumbu', Tuan. Posi i Tuanmo na monsumbu',” tinaamanku. Sahingga ia notatae hi belengku, “Aiyamo na to mia-mian anu sinalamatmo anu noko lapasmo na nongoa'i kasansala'an anu daka' hondo. Aha nombaso'imo juba' nu aha nu baso' nu Anak nu Domba aijo' da mopute'.

¹⁵Aijo'mo na sababnyo aha tinuminjomo i ahop nu kasuhangan nu Tumpu, ka' monsombah hi Ia sinaa ka' pihi i uno nu Laigan nu Tumpu. Ka' Ia anu sinumuhang i kasuhangan aijo' tokaje mae tiba aha da monjagai aha.

¹⁶ Aha madi'mo daagi' mongoa'i mo'ohop kabai megot; batu nu sinaa kabai singit anu mapanas hondo madi'mo daagi' montoyo'i aha,

¹⁷ kalana Anak nu Domba anu sinumuhang i totonga'nyo aijo' timbalimo bau polaya' nu aha. Ia na molaya' aha mokiijo' i mata nu uee anu mombee'i kantumuu'an. Ka' Tumpu na mongambu'ije iwi-iwi' na lolu' nu aha.”