Read Saluan ANU PINOTO'I HI YOHANES 8 Bible Online

ANU PINOTO'I HI YOHANES 8 - Saluan bible

ANU PINOTO'I HI YOHANES 8

¹Salatan Anak nu Domba aijo' nombeakmo segen anu ko popitu'nyo, suluga' i liingmo kinopinnyo kila-kila mintonga' na jam.

²Lantas aku nontoa malaikat ko popitu'nyo tinuminjomo i ahop nu Tumpu, ka' aha binee'anmo popitu' na tolompet.

³ Samian na malaikat sangga'at, anu nomboa sa'angu' na tampat pompapuan kamangian, mosoni' na tinutuk, tinoka ka' tinuminjo i ahop nu mezbah. Ia binee'an manjoo' hondo na kamangian da okakambuhakon i anu osombahkon aijo' i mezbah anu mosoni' na tinutuk ka' iwi-iwi' na do'a nu mian anu pinalesayamo hi Tumpu Allah suele nu kona nu kamangian aijo' anu o sombahkon i mezbah mosoni' na tinutuk anu aijo' i ahop nu kasuhangan.

⁴Hingga-hinggat tiba iwi-iwi' na do'a nu to mia-mian anu pinalesayamo hi Tumpu, tibuk nu kamangian anu hau-haunyo moak aijo' ko puha-puha moliba' lengkat i lima nu malaikat anu tinuminjo i ahop nu Tumpu aijo'.

⁵ Lapas aijo', malaikat aijo' nongalamo pompapuan kamangian aijo' ka' ingisiannyo nu apu lengkat i mezbah aijo', lantas i lumbu'akonnyo i dunia. Sahingga gohung mule' i lumontupmo ka' kilat mule' noto-nototaamanmo, ka' mule' luulu'.

⁶Lapas aijo', popitu' na malaikat anu montoongi popitu' na tolompet aijo' kahanda'mo da mompuuhimo.

⁷ Malaikat momona nompuuhi tolompetnyo, sahingga ujan es ka' apu nogogalo'anmo baso' mabohos hondo na tinudun i tano'. O bagi totolu' na dunia sambahagian ningkot nopapu; sumo aitu mule' o bagi totolu' na to kau-kau' sambahagian na nopapu, ka' batu-batu hemput anu molumba'.

⁸Lantas malaikat ko ohua'nyo nompuuhimo tolompetnyo, sahingga apa-apaa na anu talalo daka' anu otoa sumo bungkutnyo anu lewa' moak ingalinmo nokaiyong i uno nu ambai. O bagi totolu' na ndalangon sambagian na tinimbalimo baso',

⁹ka' binatang i ambai o bagi totolu' sambahagian na i natemo; sumo aitu mule' o bagi totolu' na to kapa-kapan sambahagian na nohopu'.

¹⁰ Lapas aijo' malaikat ko totolu'nyo nompuuhimo tolompetnyo, sahingga sa'angu' na mandala' anu daka', anu saja' moak sumo potong, nanabu'mo lengkat mae i langit, lantas to kau-kaunyo ka' to mata-mata nu uee o bagi totolu' sambahagian na tinuda'nyo.

¹¹ (Sanggo nu mandala' aijo' “Mapakat”.) Sahingga uee o bagi totolu' sambahagian na tinimbalimo napakat, ka' manjoo' na mian anu nate kalana nonginummo uee anu napakatmo aijo'.

¹² Lantas malaikat ko opatnyo nompuuhimo tolompetnyo. Sahingga o bagi totolu' na batu nu sinaa sambahagian na madi'mo najingka, bitu'on o bagi totolu', sambahagian na madi'mo najingka, ka' to manda-mandala' o bagi totolu' sambahagian na madi'mo najingka sahingga aha anu pinaha bagimo totolu' sambahagian na madi'mo ko jingkanyo. Sumo aitu mule' o bagi totolu' na sinaa, sambahagian na anu madi'mo majingka, ka' sumo aitu mule' o bagi totolu' na pihi sambahagian na madi'mo pinihi.

¹³Lantas aku nontoa, ka' aku nohongo sa'angu' na bonyia' anu hau-haunyo laha-lahap matangkas aita' i langa, nontaloakon, “Silakamo! Silakamo! Silakamo iwi-iwi' na mian i dunia de mohongomo totolu' na malaikat sangga'at mompuuhimo tolompetnyo saidi' mae!”