Read Saluan ANU PINOTO'I HI YOHANES 9 Bible Online

ANU PINOTO'I HI YOHANES 9 - Saluan bible

ANU PINOTO'I HI YOHANES 9

¹Lantas malaikat ko olima'nyo nompuuhimo tolompetnyo, ka' aku nontoamo sa'angu' na mandala' nanabu' lengkat mae i langit tinudun i tano'. Mandala' aijo' binee'an gunsing bau pombukai tumban kapatean.

² Jadi mandala' aijo' nombukaimo tumban nu kapatean aijo', lantas tibuk nosabat mae lengkat i unonyo sumo tibuk lengkat mae i polu' anu daka'. Batu nu sinaa ka' langa pinintungmo nu tibuk anu nolengkat mae i tumban nu kapatean aijo'.

³ Lantas lengkat i uno nu tibuk aijo' nosabatmo mae na kihi-kihi' anu mintau'mo mokaiyong i dunia. Kihi-kihi' haha aijo' binee'anmo kuasa anu pokakana sumo anu binee'mo hi beyua'.

⁴ Aha madi' opobee' na mongidei hemput, kabai to kau-kau', kabai sangga'at anu tumuu' i tano'. Aha ola timbali mombosik to mia-mian anu madi' ko tanda segen i siakannyo anu pinokona nu Tumpu.

⁵Kihi-kihi' haha aijo' madi' opoloas na mompatei mian haha aijo', panyo ola ahi' mongkabisa'i aha kopinnyo olima' na bitu'on. Bisa'nyo kalana sinakisamo nu kihi-kihi' haha aijo' pokakana sumo bisa'nyo tempo'nyo aha binosik nu beyua'.

⁶ Olima' na bitu'on na kopinnyo mian mongkahanda'imo da sahanyo matemo, panyo aha madi' mate; aha mongka'oho'mo mate, panyo kapatean majo'on hi aha.

⁷ Balu-balu'nyo nu kihi-kihi' haha aijo' sumo ajahan anu oposadiamo i pahampatean. I ubak nu aha daagi' ko apa-apaa anu otoa sumo makota mosoni'. Ohup nu aha sumo ohup nu mian.

⁸ Hambahan nu ubak nu aha sumo hambahan nu ubak nu boune, ka' bese' nu aha sumo bese' nu singa.

⁹ Saha'an nu aha pinopusokan anu moho-moho' sumo montiho baju' besak. Onyi' nu polipik nu aha sumo onyi' nu to kale-kaleta anu manjoo' hondo anu nu hela' nu ajahan anu hau-haunyo i uno nu pahampatean.

¹⁰Aha ko ikunyo ka' bisa'nyo sumo beyua'. Ka' i uno nu ikunyo nu aha daagi' ko kahosonan nu aha bau ponsakisa mian kopinnyo olima' na bitu'on.

¹¹Aha daagi' ko tomundo'nyo anu mompalentah aha, ka' tomundo aijo' atina'mo na malaikat anu monjagai tumban nu kapatean aijo'. Sanggonyo i uno basa' Ibrani aijo'mo i Abadon; ka' i uno nu basa' Yunani Apolion (anu alati'nyo “Pongidei”).

¹²Balaa' anu nongkona momona i lapasmo. Lapas aijo' daagi' ohua' mule' na balaa' na anu tionyo toka.

¹³ Lapas aijo' malaikat anu ko anomnyo nompuuhimo tolompetnyo. Sahingga aku nohongo potatae anu nolengkat mae i opat na pasu'nyo nu mezbah mosoni' i ahop nu Tumpu.

¹⁴Potatae aijo' notatae hi malaikat ko anomnyo, “Lapasakonmo opa-opat na malaikat anu sego-segot i Kaunyo nu Efrat aijo'!”

¹⁵Opa-opat na malaikat aijo' i lapasakon. Aha pinosadiamo samata-mata kona i jam, sinaa, bitu'on ka' taun aijo', da anu o bagi totolu' na mian iwi-iwi' sambahagian na opateimo.

¹⁶Ku poto'iakon saba' konjoo'nyo nu gombu-gombuan anu monsake'i ajahan haha aijo', konjoo'nyo ua'atu na juta.

¹⁷Ka' anu nyata'mo tinoangkumo, ajahan haha aijo' ka' batu-batu anu nonsake'i. Batu-batu anu nonsake'i nompake baju' besak anu buhitnyo momea' sumo anu moak, mobilu' sumo batu nu mainan, ka' mokini sumo belelang. Ubak nu ajahan haha aijo' sumo ubak nu singa, ka' apu mosabat mae i nganga'nyo, sumo aitu mule' tibuk ka' belelang.

¹⁸Totolu' na bahagian na mian anu mosabat mae sambahagian na i nate nu balaa' aijo'; aijo'mo apu, tibuk, ka' belelang anu mosabat mae i nganga' nu ajahan haha aijo'.

¹⁹Kahosonan nu ajahan haha aijo' aijo'mo, i nganga'nyo ka' suele i ikunyo. Ikunyo haha aijo' sumo ulo ko ubaknyo. Ikunyomo aijo' na nu pake nu ajahan haha aijo' mongkabisa'i mian.

²⁰ Panyo tuha' nu mian anu madi' pinatean nu balaa' haha aijo' suele madi' ahi' mompala'i pakalaja'an nu lima nu aha. Aha sabole-bole ahi' monsombah to roh-roh ma'idek, ka' to pilo-pilogot mosoni', salaka, tambaga, batu ka' kau' anu madi' moko ala montoa kabai mohongo, kabai pe'e lumajang.

²¹Aha mule' madi' mompala'i to hahan anu ma'idek, aijo'mo lewa' mompatei, to panga-pangatahuan, masala' ka' lewa' montomang.