Read Saluan I RUT 1 Bible Online

I RUT 1 - Saluan bible

I RUT 1

¹Tempo'nyo naipuan mae ma'isa pe'e Israel kino tomundo'nyo, lipu' nu Kana'an tinokanmo nu balaa' kasusa'an i anu okaan. Tempo'nyo aitu daagi' ko samian na mo'ane sanggonyo i Elimelekh. Ia lengkat mae hi aha mian nu Efrata, ka' kajojoongannyo i Betlehem da'erah nu Yehuda. Kalana tinokamo na tempo'nyo kasusa'an i anu okaan, sahingga ia nambamo i lipu' Moab tiba bengkele'nyo, i Na'omi, tiba anaknyo to momo'ane ua'aha: I Mahlon tiba i Kilyon. Lantas aha jinojoongmo ikiijo' mae. Tempo'nyo aha daagi' kiijo' mae, i Elimelekh sinilakamo.

³Sahingga memo ahi' i Na'omi tiba anaknyo ua'aha.

⁴Anaknyo ua-ua'aha aijo' no'osoamo tiba to lalangkoyang nu aha Moab, sanggonyo i Orpa tiba i Rut. Salatan sinampulu'mo na taun,

⁵ua-ua'aha na anak mo'ane i Na'omi aijo' sinilakamo suele, sahingga i Na'omi madi'mo ko langkai'nyo ka' mule' to ana-anaknyo ua'aha aijo'.

⁶Madi' pinin lapas aijo' i Na'omi nohongomo lele tukoonyo nu aha Tumpu nombalakatimo aha mian nu Israel, isi nu ale' nu aha sinidamo. Kalana aijo' i Na'omi tiba ua'aha na moniannyo nogogaumo kahanda' mambamo mompala'imo Moab.

⁷Aha nambamo hingga-hinggat minsusule'mo i Yehuda. Hau-haunyo i jalan,

⁸i Na'omi notataemo hi ua'aha na moniannyo aijo', “Belemiu sahanyo pinsusule'mo i laigan nu tina nu belemiu. Ku amalakon hi Tumpu da mongkanonongi belemiu, susumo belemiu suele nongkanonongimo aku ka' hi aha anu sinilakamo aijo'.

⁹Ku amalakon da Tumpu mombee'ije anu mongosoai belemiu da belemiu po'ule' mule' ko posi au-auwan.” Noko taloakon sumo aijo', i Na'omi siniloloamo hi aha ka' ingokannyomo na aha. Panyo i Orpa ka' i Rut i humangmo hoso-hoson,

¹⁰ka' notataemo hi Na'omi, “Madi', kita Tina! Kami mombatukimo kita Tina mambamo hi bansa nu kita Tina.”

¹¹“Boli, anak!” tinaaman i Na'omi, “belemiu sahanyo pinsusule'mo. Bau apaa na belemiu mombatuki aku? Te misa aku madi'mo daagi' monganak da timbali langkai' nu belemiu?

¹²Pinsusule'mo, na belemiu anak kalana aku talalomo binengkele' madi'mo daagi' mo'osoa. Ka' bisuannyo aku daagi' mo'osoa pihi aiya ka' po'ule' mule' mohumpak anak mo'ane,

¹³te belemiu daagi' mongka'oho' montanda'i sampe aha daka'? Ka' mule' kalana han aijo' belemiu madi'mo timbali mo'osoa tiba mian sangga'at? Madi', anaku, boli sumo aijo'! Aku susa' hondo na montutugi apaa na anu o'oa'i miu saidi' mae kalana hukuman nu Tumpu hi belengku.”

¹⁴I Rut tiba i Orpa i humangmo mule', daka-daka' lapas aijo' i Orpa siniloloamo ka' ingokannyomo na moniannyo lantas ia ninsusule'mo. Panyo i Rut madi' mongka'oho' moga'at tiba moniannyo aijo'.

¹⁵Notataemo na i Na'omi hi ia, “Rut, Toa aijo'! Dawok nu beleyum ninsusule'mo hi bansanyo ka' hi to pilo-pilogotnyo. Lako'mo na beleyum suele, anaku batukimo na ia ninsusule'mo!”

¹⁶Panyo tinaaman i Rut, “O Tinangku, boli belento Tinangku monsai aku da minsusule'mo ka' mompala'imo kita Tinangku. Aku mombatukimo kita Tinangku. Mau mule' pa' moya na belento Tinangku mamba, ku batukimo. Mau mule' pa' iya na kajojoongan nu belento Tinangku, ikiijo'mo suele na kajojoonganku. Bansa nu belento Tinangku, aijo'mo na bansangku. Tumpu Allah anu osombah nu belento Tinangku, aijo'mo suele na ku sombah.

¹⁷Pa' iya mae na kasilakan nu belento Tinangku ikiijo' suele na kasilakanku ka' polamunan aku. Nu hukum nu Tumpu hondo-hondo na aku, de aku mongka'oho' mompala'i belento Tinangku, beilako' silakamo yo moga'atmo na kita!”

¹⁸Tinoa i Na'omi na i Rut totu-totu'umo na mombatuki sahingga madi'mo daagi' ia nontaloakon apa-apaa.

¹⁹Sahingga aha i nambamo ka' tinokamo i Betlehem. Salatan aha tinokamo ikiijo' mae, songko-songko na mian anu i kota aijo' binangangmo. To bou-boune anu ikiijo' mae notataemo, “Pa' aijo'mo totu-totu'u na i Na'omi?”

²⁰“Bolimo olaga na aku i Na'omi,” na koonyo i Na'omi, “Lagamo na aku i Mara, kalana Tumpu Allah Anu Daka' na kuasanyo nompojohokmo aku da saja' nongoa'i kasansala'an.

²¹Tempo'nyo aku nompala'imo aiya, iwi-iwi' daagi' hi belengku, panyo uuka aiya Tumpu nonsule'akonmo mae aku madi'mo ko apa-apaa me lima sampulu'. Mokonyo aijo' bolimo belemiu molaga aku i Na'omi, kalana Tumpu Anu Daka' na kuasanyo nohukumo aku manjoo' hondo na kasala'an!”

²²Sumo aiyamo na sisiknyo mosia na i Na'omi ninsusule'mo mae lengkat i Moab tiba i Rut moniannyo mian nu Moab aijo'. Aha tinoka i Betlehem tempo'nyo montampu'unimo mompadak gandum.