Read Saluan I RUT 3 Bible Online

I RUT 3 - Saluan bible

I RUT 3

¹Lapas aijo' madi' pinin, i Na'omi notataemo hi Rut, “Ku lioakonmo jalan na beleyum da po'ule'mo mo'osoa ka' da mohumpakmo ka'ima'an.

²Beleyum mokalajamo hingga-hinggat tiba to bou-boune haha aijo' anu mokalaja hi ale' i Boas? Kalana, i Boas aijo' daagi' mongkona mae sampoto'utusanto. Jadi, hongo mae! Pihi uuka saidi' ia mambamo mongutut gandum i ale'nyo.

³Pindi'mo uuka aiya ka' pinsapumo nu minya-minya' ka' pusokmo na baju' nu beleyum anu ma'ima' hondo. Lantas lako'mo hi Boas kiijo' na ia hau-haunyo mongutut gandum. Tandongi na ia ikiijo' sampe ia moko kaanmo ka' moko inumo, panyo boli sampe nu sumbu' na beleyum daagi' ko anu itina'.

⁴Ka' opotomatakon pa' iya na kahoyotannyo. De ia kahoyotanmo, pokiijo'mo ka' sukemo na sabutnyo lantas panimale'mo koko tengkenyo. Nu poto'ije hi beleyum apaa na anu tionyo ahi' nubau nu beleyum.”

⁵“Ma'ima'mo na itina', Tinangku,” tinaaman i Rut, “ku baumo na aijo' iwi-iwi' anu pinoto'imo nu belento Tinangku.”

⁶Sahingga nambamo na i Rut i tampat nu mian anu mongutut gandum. Ikiijo' mae binaunyomo iwi-iwi' na anu pinokauhakonmo nu moniannyo.

⁷Noko kaan ka' nonginum na i Boas sinanangmo na kinyonyoanyo. Lantas ia lako'mo i hoyot koko tambunan nu gandum aijo'. Lantas jinolomo mae i Rut ka' sinukenyo na sabut i Boas lapas aijo' nale' mo na ia koko tengkenyo.

⁸Tonga'pahumo i Boas monti-montiik tinolo i otosmo. Ia tinolokengkengmo nontoa daagi' ko samian na boune hoyo-hoyot koko tengkenyo.

⁹“Ihe na beleyum?” na koonyo. “Aku i Rut, kita Tuumangku!” tinaaman i Rut. “Belento Tuumangku daagi' mongkona sampoto'utusan mami mae anu daagi' ohani mae, ka' anu tionyo ahi' montoa kasusa'an nu kantumuu'anku. Ku poita da belento Tuumangku mongosoaimo aku, baumo bengkele' nu belento Tuumangku.”

¹⁰“Ku amalakon da Tumpu mombalakati beleyum, anak ku”, na koonyo i Boas. “De opokakanakon tiba apaa na anu binaumo nu beleyum hi monian nu beleyum, saba' anu binaumo nu beleyum uuka aiya nomponyata'mo mae saba' beleyum lebe daka-daka' mongka'ima'i mule'. Sabenannyo beleyum timbali molio anu bau langkai' ka' anu daagi' olitau hi mian anu kaya kabai mule' hi mian anu kasiasi, panyo aijo' madi' binau nu beleyum.

¹¹Kalana aijo', boli bata-bata, Rut. Iwi-iwi' na anu pinoitamo nu beleyum aijo' ku sidahimo; kalana iwi-iwi' na mian i kota aiya nonsumbu'mo beleyum taalu' samian na boune anu manonong hondo.

¹² Memang totu'umo, aku tionyo ahi' montoakon kantumuu'an nu beleyum, kalana aku daagi' mae ohani sampoto'utusan nu beleyum. Panyo daagi' ko mian sangga'at na tionyo ahi' montoa kantumuu'an nu beleyum. Ka' ia ahi' na sampoto'utusan anu lebe ohani molingkudui aku.

¹³Pihi uuka jojoong pe'e na beleyum i aiya. Dodop daagi' subu ku pokilawaje pa' ia mongka'oho' montoakon apaa na anu nu palalui nu beleyum aijo' kabai madi'. De ia mongka'oho', yo ma'ima'mo; panyo de ia madi' mongka'oho, saba' ku janji'mo tiba sanggo nu Tumpu Allah anu tumuu' akumo na montoakon kantumuu'an nu beleyum aijo'. Uuka aiya hoyotmo i aiya sampe toka dodop subu.”

¹⁴Sahingga i hoyotmo na i Rut ikiijo' koko tengke i Boas. Dodododopnyo subu-subu daagi' pikat, i Rut nobulamo da madi' nutoa nu mian. Kalana i Boas madi' mongka'oho' mau ola samian na monsumbu' i Rut tinokamo i tempat aijo'.

¹⁵I Boas notataemo hi Rut, “Ukatakon na salendang nu beleyum ka' boka i aiya.” I Rut nongukatakonmo salendangnyo ka' binokanyomo. I Boas nombulokakonmo i salendang aijo' ohani uampulu' na kilogram na gandum. Lantas pinosombungnyomo hi bikoang i Rut. Lapas aijo' i Boas nambamo i kota.

¹⁶Salatan i Rut tinokamo i laigan, pinokilawamo nu moniannyo, “Mosiamo na belento anaku?” Sahingga, sinisikmo i Rut iwi-iwi' apaa na anu binaumo i Boas hi ia.

¹⁷“Ka' mule',” i Rut notatae, “aitu pe'e pinaka bee'annyo mae gandum aiya iwi-iwi' hi belengku, kalana ia notatae hi belengku madi' timbali minsusule' hi belento Tinangku, ola lima sampulu'.'”

¹⁸Lantas notataemo na i Na'omi, “Tanda'imo, anaku, sahingga nutoa nu beleyum pa' mosia na ka'ahenannyo aiya saidi' mae. I Boas madi' ola momohokot de ma'isa pe'e nu sidahakon na han aiya i sinaa uukamo aiya.”