Read Saluan 1 SAMUEL 11 Bible Online

1 SAMUEL 11 - Saluan bible

1 SAMUEL 11

¹Lapas aijo' i Nahas tomundo' nu aha mian nu Amon nompalentahmo suludadunyo ka' nontumbuhimo kota Yabesh idaerah Gilead. Mian anu jojoong i Yabesh nompoitamo hi Nahas, de timbali, “Pombau mae palajanjian tiba kami da kami tulu-tulutan hi palentah nu belento.”

²Tinaaman i Nahas, “Sumo uuka na ku bau de aku mojanji'mo, 'Mata nu belemiu i koanan toto samian ku kubetakon salaku bau pongambangi bansa nu aha mian Israel iwi-iwi'!’ ”

³Lapas aijo' aha to pola-polaya' nu kota Yabesh nontaamimo, “Kami momoita tempo pitunsinaa na kopinnyo, da kami monsaipe'e mian anu mamba isongko-songko na daerah nu Israel. De madi' ko anu mongka oho' montulungi mae kami, yo kami tokamo mae ta'aluk hi belento.”

⁴Sumo aijo' na to mia-mian anu sinai tinoka i Gibea kajojoongan i Saul. Salatan pinotokamo nu aha na lele aijo', ihumangmo na aha mian da'isan kalana madi'mo nu poko ala nu aha.

⁵Tempo'nyo aijo' i Saul salaje tinoka lengkat mae i ale' nomboa mae sapi'nyo. Ia nompokilawamo, “Apaamo uuka? Kadaka' iwi-iwi' na mian lewa'mo i humang?” Lantas pinoto'imo nu aha hi ia na lele anu binoa mae nu mian anu sinai mae lengkat i Yabesh.

⁶Nohongo aijo' i Saul kinuasanmo nu Roh nu Tumpu Allah.

⁷Kalana ia pinusamo hondo ingalanyomo na sapi' ohua' lantas kinolotnyomo ka' pinado-padotnyomo tinimbali nanjoo' na padotannyo. Lantas padotan haha aijo' pinakatunyomo hi aha mian anu isongko-songko na daerah nu aha Israel, ka' pinalentahnyomo sumo uuka, “Ihe na anu madi' mamba mombatuki i Saul tiba i Samuel mamba mahampate, sapi'nyo iwi-iwi' okolotmo ka' opado-padotmo susumo aiya suele!”

⁸Bansa Israel mongkabuhuk apaa na anu saidi mae nu bau nu Tumpu, sahingga iwi-iwi' na mian madi' ko samiannyo, nogogaumo, mamba mahampate hingga-hinggat. Aha pinosihukmo ka' binilangmo kiijo' i Bezek: Aha 300.000 na mian nu Israel, ka' 30.000 na aha mian nu Yehuda.

⁹Lapas aijo' pinoto'imo hi mian anu sinai mae lengkat i Yabesh sumo uuka, “Poto'i hi aha mian nu Yabesh, dodop daagi subu-subu ma'isa pe'e sonsu'un na sinaa ko anumo montulungi aha.” Salatan aha mian nu Yabesh nohumpakmo potuunon aijo' aha sinanangmo hondo.

¹⁰Pinoto'imo nu aha hi Nahas, “Dodop kami ta'alukmo ka' timbalimo nu bau yayamo pongka oho' nu kinyonyoa nu beleyum.”

¹¹Dodododopnyo subu-subu, i Saul nombagimo mian binaunyo totolu' na gombuannyo. Ka' salatan binete'mo nasina aha nontumbuhimo nokiijo' itotonga' nu binakemah'an nu aha mian Amon aijo' ka' nompahampateakonmo aha. Ma'isa pe'e sinonsu'un suludadu i Saul nompatundu'mo sampo bali' nu aha. Mian nu Amon haha aijo' anu noko popalai nosungkehetmo sahingga mau ola ua aha madi' noko ala nojajalan na nopalai.

¹²Lapas aijo' pinokilawamo nu bansa Israel hi Samuel, “Iyamo na mian haha uuka anu binaanimo na notatae tukoonyo nu aha i Saul madi' pantas na timbali tomundo'to? Tionyo ahi' belento Tuuma mombee'mo mae hi kami da opateimo mami.”

¹³Panyo i Saul notatae, “Mau ola samian madi' timbali opatei sinaa iya, kalana Tumpu sinaa aiya nomposalamatmo mian nu Israel.”

¹⁴Lantas notataemo na i Samuel hi aha, “Imbo' da kita iwi-iwi' mambamo i Gilgal ka' mompatantumo i Saul da baumo ahi' tomundo'to.”

¹⁵Jadi nambamo na aha iwi-iwi' i Gilgal, ka' kiijo' i tampat ponsomban, i Saul pinotantumo salakumo tomundo'. Aha nonsombahkonmo koloban anu bau pompodame, ka' mule' i Saul tiba iwi-iwi' na bansa Israel nolame'akonmo apaa na anu jinadimo aijo'.