Read Saluan 1 SAMUEL 13 Bible Online

1 SAMUEL 13 - Saluan bible

1 SAMUEL 13

¹Daagi kino sansinaan, salatan i Saul tinimbalimo tomundo'

²ia nompile'imo aha 3.000 na mian nu Israel; 2.000 na mian anu jinojoong tiba ia kiijo' i Mikhmas tiba i daerah nu bungkutnyo Betel, panyo anu aha 1.000 na mian namba tiba i Yonatan anaknyo anu momo'ane kiijo' mae i Gibea daerah tulunan nu aha bansa Benyamin. Labinyo sangga'at na mian da'isan sinaimo da minsusule'mo i laigan nu aha toto samian.

³Lantas i Yonatan nompateimo kapala nu suludadu nu aha Filistin anu matangkas na pangkatnyo kiijo' i Gibea, ka' ihongomo nu aha bansa Filistin na han aijo'. Lantas pinalentahmo i Saul da opo onyi'mo na tolompet i songko-songko na lipu' bau polaga aha mian nu Ibrani da mamba mahampate.

⁴Aha iwi-iwi' na bansa Israel pinoto'imo tukoonyo nu ahahi i Saul nompateimo kapala nu suludadu nu aha Filistin anu matangkas na pangkatnyo jadi aha mian nu Filistin nongka'idek imo hondo mian nu Israel. Kalana aijo' mian da'isan nohongo-hongomo polaga da mosa'angu'mo tiba i Saul i kiijo' i Gilgal.

⁵Tempo'nyo aijo' aha mian nu Filistin nosa'angu'mo suele kahanda'mo montumbuhi aha mian nu Israel; aha ko kaleta anu bau pahampate 30.000, ka' 6.000 na mian anu monsake'i ajahan, tiba to sulu-suludadu konjoo'nyo sumomo bone' ibiwi nu ambai. Aha binakemahmo i kiijo' i Mikhmas sasu kabete'an Bet-Awen.

⁶Lapas aijo' aha nontumbuhimo ma'i-ma'idek mian nu Israel sahingga mian nu Israel i nabuhukmo hondo, madi'mo noko ala nombau apa-apaa. Kanjoo'annyo na aha mian nu Israel natisulukmo i liang nu batu tiba iliang nu bungkutnyo kabai i olot nu batu gahanggan kabai i uno nu bubung ka' bolo' nu tano',

⁷ka' mule' daagi ko anu notaapmo i kaunyo nu Yordan ka' nambamo i daerah nu aha Gad tiba Gilead. I Saul daagi kiijo' mae i Gilgal ka' mian da'isan anu nombatuki ia nabuhukmo ka' ilakatnyomo.

⁸ I Saul nontanda'i i Samuel pinitunsinaa na kinopinnyo susumo anu pinotuunmo i Samuel hi ia, panyo i Samuel ma'isa ahi' tinoka kiijo' i Gilgal, sahingga i Saul pinala'ianmo nu mian anu mombatuki ia.

⁹Kalana aitu pinoto'inyomo hi aha, “Boa mae na koloban anu opotunu tiba koloban anu bau pompodame.” Lantas ia posi sausanyo nonsombahkonmo koloban anu opotunu aijo'.

¹⁰Panyo noko bau na ia aijo' ma'isa pinin tinokamo na i Samuel. I Saul nolabotmo ia kahanda'mo monsalando'ai,

¹¹panyo i Samuel nompokilawamo, “Apaa na anu binaumo nu belento tomundo'?” Tinaaman i Saul, “Tinoangku na mian da'isan montampu'unimo mompala'i aku ka'mule' belento Tuuma ma'isa tinoka i sanang anu tinantukanmo nu belento Tuuma. Ka' mule' aha mian nu Filistin nosa'angu'mo kiijo i Mikhmas.

¹²Jadi tinutuganku boli-boli suludadu nu aha Filistin montumbuhimo mule' aku aiya i Gilgal, yo aitu aku ma'isa nongkakase kalibosan nu Tumpu. Mokonyo aijo' aku nongalamo katantuan da monsombahkonmo koloban aijo'.”

¹³Nohongo potatae aijo' i Samuel notataemo hi Saul, “Anu binaumo nu belento Tomundo', aijo' sala' hondo. Debelento Tomundo' montuluti palentah nu Tumpu Allah anu pinotokamo hi belento Tomundo' tantu Tumpu mompotatapmo belento Tomundo' tiba lee' nubelento Tomundo' da timbali tomundo' hi aha mian nu Israel sampe toka sidu-sidutu'.

¹⁴ Panyo uuka aiya belento Tomundo' mompalentah madi' pin. Kalana belento Tomundo' madi' mombatuki palentah nu Tumpu, sahingga Tumpu mompile'imo sangga'at mian anu nu ka'i ma'i na timbali tomundo' hi aha mian anu pinalesayamo hi ia.”

¹⁵Lapas aijo' i Samuel nompala'imo Gilgal ka' nambamo lau-laus i Gibea i daerah nu aha mian Benyamin. Tempo'nyo aijo' i Saul nambamo nontoa suludadunyo, konjoo'nyo kila-kila aha 600 na mian.

¹⁶Sumo aijo' na i Saul tiba i Yonatan anaknyo momo'ane tiba suludadu nu aha binakemah i Geba i daerah Benyamin ka' suele aha mian nu Filistin binakemahmo i Mikhmas.

¹⁷Tempo'nyo aijo' totolu' na gombuan nu tololang nu aha mian Filistin lengkat mae i kemah nu aha mian Filistin tinokamo mae montomang; gombuan sa'angu' namba i sasu Ofra i daerah Syual,

¹⁸gombuan ko ohua'nyo namba i Bet-Horon, ka' gombuan sa'angu' mule' namba i potempasan anu mo ahop mokiijo' i Bangka'nyo Zeboim ka' i padang anu mateges.

¹⁹Songko-songko na aha mian nu Israel madi' ko anu monsumbu' montutuk besak, kalana aha mian nu Filistin madi'mo nompobee' aha mian nu Ibrani mombau bajak tiba talombo'.

²⁰Jadi aha mian nu Israel tionyo ahi' mamba hi aha mian nu Filistin de kahanda' mongodoi bajaknyo, pisonnyo, bobolo'nyo ka' bangko'nyo;

²¹tambonyo sa'angu' na doi ise' de moki odoi bobolo' ka' moki pokopiani sapatu nu sapi' ka' ohua' na doi ise' de moki odoi bajak kabai piso.

²²Mokonyo aijo' i sinaa pinahampateanmo kiijo' i Mikhmas aha mian nu Israel mau ola samian madi'mo kinobajak kabai talombo', olamo i Saul tiba i Yonatan anaknyo momo'ane na ko bajak tiba talombo'.

²³Aha mian nu Filistin nombaumo ponjaga'an da boli o agoi na sa'angu' na olotnyo nu bungkutnyo anu kiijo' i Mikhmas.