Read Saluan 1 SAMUEL 15 Bible Online

1 SAMUEL 15 - Saluan bible

1 SAMUEL 15

¹ Daagi kinosansinaan i Samuel notataemo hi Saul, “Tumpu na nonsai aku nohangkat belento binau Tomundo' nu aha Israel mian anu pinalesayamo hi Ia. Mokonyo aijo' belento Tomundo' tionyo ahi' mohongo palentah nu Tumpu Anu Daka' na kuasanyo.

² Ia mohukumo mian nu aha Amalek, kalana mompolee'mae nu aha nongewamo mian nu aha Israel tempo'nyo aha nambamo mae lengkat i Mesir.

³Jadi lako'mo ka' tumbuhimo na aha mian nu Amalek ka' o idei na apa-apaa na anu nu aha iwi-iwi'. Boli opotuha' maumo pa' apa-apaa; patei iwi-iwi' na to momo'ane, to bou-boune tiba to ana-anak, ka' mule' to bunga-bungamea'; ka'suele sapi', domba, unta tiba keledai.”

⁴Lantas pinosadiamo i Saul na suludadunyo ka' i lekengnyomo ikiijo' i Telaim; aha 200.000 na suludadu lengkat hi aha Israel, ka' 10.000 na mian lengkat hi aha Yehuda.

⁵Lapas aijo' nambamo na i Saul hingga-hinggat tiba suludadunyo no kiijo' i kota' Amalek, ka' nontumbuhimo sampo bali' nu aha itotonga' nu kaunyo anu no otimo.

⁶Ia mule' nompotuunmo pokinde'nyo hi aha mian nu Keni, tukoonyo, “Lako'mo ka' pala'imo naha mian nu Amalaek da boli belemiu kupatei hingga-hinggat tiba aha, kalana naipuan mae nompolee' nu belemiu nompotoamo kalakuan anu mompahakona tiba aha mian nu Israel tempo'nyo mian nu aha Israel tinokamo lengkat mae i Mesir.” Sahingga mian nu aha Keni nompala'imo tampat aijo'.

⁷Lapas aijo' nahampatemo tiba aha mian nu Amalek ka' nompatundu'mo aha tutuus jalan lengkat i Hawila tinoka-toka no kiijo' i Syur sasu kabete'an i Mesir.

⁸Iwi-iwi' na aha mian da'isan tiba suludadu nu aha Amalek pinateanmo i Saul. Panyo i Agag tomundo' nu aha Amalek i hakop ka' pinotumuu' i Saul ka' suele suludadunyo madi' pinatean, sumo aijo' mule' na dombanyo nu aha tiba sapi' nuaha anu molompo' hondo, anak nu sapi' tiba anak nu domba anu molompo' hondo tiba iwi-iwi' na anu ko angga'nyo; ola potuu'on anu madi' ko angga'nyo ka' anu madi' ko gunanyo na pinateanmo.

¹⁰Lantas pinoto'imo nu Tumpu hi Samuel,

¹¹“Aku nompele-pele'mo na nohangkat i Saul binau tomundo' kalana ia nohukumo aku ka' madi'mo nombau apaa na anu Ku palentahkon.” I Samuel nolibosmo hondo ka' sinusa'mo sinampahu na ia lewa' nompele-pele' hi Tumpu.

¹²Dodododopnyo subu-subu i Samuel nambamo kahanda' da singkabot tiba i Saul. Ko anu nompoto'i hi ia tukoonyo nu aha, i Saul nambamo i kota' Karmel mompotinjomo batu salaku bau tanda nu butongnyo ikiijo' mae, lantas mambamo lau-laus i Gilgal.

¹³Salatan i Samuel siningkabotmo tiba i Saul, notataemo na i Saul hi ia, “O'amalakon Tumpu mombalakati belento Tuuma! Aku nombaumo palentah nu Tumpu.”

¹⁴Panyo pinokilawa i Samuel, “De sumo itina' kadaka' ihongongku mae sapi' molonga' tiba domba molombee'?”

¹⁵Tinaaman i Saul, “Binatang haha aijo' anu pinahuhuakon lengkat mae hi aha mian nu Amalek. Domba tiba sapai' anu molompo' hondo ingalamo nu aha mian da'isan ka' sinombahkonmo hi Tumpu Allah salaku bau koloban hi Tumpu Allah nu belento. Panyo labinyo sangga'at pinateanmo mami iwi-iwi'.”

¹⁶Nohongo sumo aijo' i Samuel notataemo, “Soba hongo pe'e mae da kupoto'i apaa na anu ihongongkumo na uutu pihi-pihi pinoto'i nu Tumpu Allah hi belengku.” “Soba poto'i mae,” na koonyo i Saul.

¹⁷I Samuel notataemo, “Te misa' belento Tomundo' tinimbalimo pamalentah hi aha to tulu-tulunan nu bansa Israel maumo ahi' belento Tomundo'mongakui butong nu belento madi' penting? Belento Tomundo' pinile'anmo nu Tumpu da timbali Tomundo hi aha Israel.

¹⁸Ka' mule' belento Tomundo' pinalentahmo nu Tumpu da mompatei aha mian nu Amalek anu ma'idek hondo na kinyonyoa nu aha aijo'. Belento Tomundo' pinokau-Nyo da mahampate mongewa aha, sahingga mingkot iwi-iwi'.

¹⁹Kadaka' belento Tomundo' madi' nontuluti palentah nu Tumpu? Kadaka' belento Tomundo' binilahimo na nongala to langke-langke anu pinahuhuakon, ka'kalana aijo' belento Tomundo' nomposakitmo kinyonyoa nu Tumpu?”.

²⁰Tinaaman i Saul, “Nontulutimo na aku palentah nu Tumpu ka' nambamo nahampate susumo anu pinalentahkon-Nyomo hi belengku; I Agag tomundo nu aha Amalek i hakopku ka' binoangku mae iwi-iwi' na mian nu aha Amalek ka' pinateankumo.

²¹Panyo suludadungku madi' nompatei iwi-iwi' na potuu'on; aha nompile'imo domba tiba sapi' anu molompo' hondo' apaa na anu pinahuhuakon mo mae aijo' ka' sinombahkonmo nu aha kiijo' i Gilgal salaku bau koloban hi Tumpu Allah nu belento.”

²²Panyo notatae na i Samuel, “Iya na anu talalo nu ka'ima'i nu Tumpu, tulu-tulutan hi Tumpu kabai koloban anu osombahkon? Montuluti Tumpu na lebe ma'ima' nu lingkudui na monsombahkon koloban. Tulu-tulutan hi Tumpu na lebe ma'ima nu lingkudui na lompo'nyo nu domba.

²³Kalau panggaga hi Tumpu madi' mohongo-hongo palentahnyo pokakanamo na ko ideknyo sumomo mompake ajimat, ka' mule' kinyonyoa anu buulon pokakanamo na ko ideknyo sumomo montunde' pilogot. Kalana belento Tomundo' madi'mo nontuluti palentah nu Tumpu, jadi Tumpu madi'mo mongakui belento Tomundo' timbali Tomundo'.”

²⁴Nohongo anu sumo aijo' i Saul nangakumohi Samuel, ia notatae, “Memang aku binaladosa'mo. Aku madi'mo nontuluti anu pinalentahkonmo nu Tumpu, ka' madi'mo nontuluti anu pinoto'imo nu belento Tuumangku, lantas ingii'kumo na poitaon nu aha.

²⁵Panyo uuka aiya, ku kakase hi belento Tuumangku, ampuniakon mae na dosa'ku ka' imbo'da hingga-hinggatmo tiba aku mamba i Gilgak, da ku sombah mule na Tumpu.”

²⁶Panyo tinaaman i Samuel, “Aku madi'mo mongka'oho' minsusule' hingga-hinggat tiba belento Tomundo'. Belento Tomundo' madi'mo nohongo-hongo palentah nu Tumpu, ka' uuka aiya Ia madi'mo mongakui belento Tomundo' timbali Tomundo' nu aha Israel.”

²⁷Lantas i Samuel nobalikmo kahanda'mo mamba, panyo tinewa'mo i Saul na ia ka' tinoongannyomo na juba'nyo sahingga juba'nyo aijo' no beakmo.

²⁸Lantas notataemo na i Samuel hi ia, “Sinaa aiya Israel anu nu palentah nu belento Tomundo' bineakmo nu Tumpu ka' nu bee'mo hi mian sangga'at anu lebe ma'ima' molingkudui belento Tomundo'.

²⁹Anu Talasanggo hondo Tumpu Allah nu aha Israel madi' baleko' ka' madi' mule' mombabali'i apa na anu tinaloakon-Nyomo, kalana Ia misa' manusia.”

³⁰Tinaaman i Saul, “Binaladosa'mo na aku. Panyo tulungi mae kita Tuumangku, imbo' minsusule'mo hingga-hinggat tiba aku da aku monsombahmo Tumpu Allah nu belento Tuumangku. Tiba jalan anu sumo aijo' belento Tuumangku mongadatimo aku i ahop nu to pola-polaya' nu bansangku tiba mule' i ahop nu aha iwi-iwi' na mian nu Israel.”

³¹Sahingga ninsusule'mo na i Samuel hingga-hinggat tiba ia namba i Gilga, ka' i Saul nonsombahmo Tumpu.

³²Lapas aijo' i Samuel nompalentahmo, “Boa mae mo uuka na i Tomundo' Agag,” i Agag nambamo hi ia, ka' ia nontaha imanimo kalana tinutugannyo, “Balaa' kapatean i madi'mo.”

³³Lantas i Samuel notataemo, “Susumo bajak nu beleyum nombaumo manjoo' na tina nu anak amdi'mo ko anaknyo, sumo aitumo na beleyum saidi' mae madi'mo ko anaknyo.” Lantas pinahantabasakonmo i Samuel na i Agag i ahop nu mezbah ikiijo' i Gilgal.

³⁴Lapas aijo' i Samuel nambamo i Rama ka' i Tomundo' Saul suele ninsusule'mo i laigannyo kiijo' i Gibea.

³⁵Sampe ia sinilaka, i Samuel saja'mo sinusa' kalana Tumpu nompele-pele'mo na nohangkat i Saul tininbali Tomundo' nu aha Israel.