Read Saluan 1 SAMUEL 30 Bible Online

1 SAMUEL 30 - Saluan bible

1 SAMUEL 30

¹ Inguansinaamo na i Daud tiba to sulu-suludadunyo tinokaje i kota' Ziklag. Salatan tinokamo ikiijo' tinokan nu aha mian nu Amalek nontumbuhimo mae sasu salatan lipu' nu aha Yehuda ka' nontumbuhimo mule' Ziklag. Madi' ko anu pinatean nu aha mau ola samian. Panyo pinapuanmo nu aha na kota' aijo' sampe noangot, lantas aha lau-lausmo namba ka' nomboamo to bou-boune, to ana-anak ka' mian sangga'at. Aha mule' nohakopmo bengkele' i Daud ua-ua aha i Ahinoam tiba i Abigail, tiba to ana-anaknyo ka' suele bengkele' tiba to ana-anak nu suludadunyo. I Daud tiba to sulu-suludadunyo sinusa'mo hondo, sahingga aha lewa'mo nohaangi ka' luusmo hondo na butong nu aha.

⁶To sulu-suludadu i Daud sinusa'mo hondo kalana madi'mo kino anak tiba bengkele' nu aha. Mokonyo aijo' aha kahanda'mo mompahambunu'akon nu batu i Daud. Jadi i Daud sinusa'mo hondo panyo kinyonyoanyo po ule'mo pinohoson nu Tumpu Allahnyo.

⁷ Lantas pinoto'imo i Daud hi Imam Abyatar anak i Ahimelekh, “Boa mae na baju' nu Imam itina'!” Sahingga binoamo i Abyatar na baju' nu Imam aijo' hi ia.

⁸Lapas aijo' pinokilawamo i Daud hi Tumpu, “Pa' tionyo ahi' ku loloi' na mian anu nambamo mae nontumbuhi aijo'? Pa' timbali ku tuusakon na aha?” Tinaaman nu Tumpu, “Ii' timbali, loloi'mo, timbali nu tuusakon na aha ka' po ule'mae nu boa na anu ihakopmo nu aha.”

⁹Lantas nambamo na i Daud tiba to sulu-suludadunyo, aha ano atu. Salatan aha tinokamo i Kaunyo nu Besor i Daud tiba aha 400 na mian na namba; ka' aha anu 200 na mian sangga'at jinojoongmo ikiijo'. Kalana talalomo nalawe ka' madi'mo noko ala notaap i Kaunyo nu Besor.

¹¹Hau-haunyo aha namba aijo' suludadu i Daud nongkabotmo samian na anak mo'ane ia mian nu Mesir kiijo' mae i padang lantas ia binoamo nu aha hi Daud. Ia binee'anmo nongkaan ka' nonginum,

¹²ka' suele binee'anmo kukis bua'nu anggur na binau ka' uampumpung na anggur anu nahamo. Salatan kinaannyomo ia po ule'mo nahoson; taalu' tolunsinaamo na ia madi' nongkaan ka' nonginum.

¹³Lapas aijo' pinokilawamo i Daud hi ia, “Ihe na tuan nu beleyum ka' lengkat mae iya na beleyum? Tinaaman nu anak aijo', aku mian nu Mesir posihon nu aha mian Amalek. Aku pinala'ianmo nu tuanku tolunsinaamo kalana aku nasakitmo.

¹⁴Kami nontumbuhimo da'erah nu aha mian Kreti isasu salatan Yehuda tiba da'erah nu aha mian Kaleb, ka' pinapuanmo mami sampe noangot na kota' Ziklag.”

¹⁵Lantas pinokilawamo i Daud hi ia, “Mongka'oho' na beleyum molaya' aku mamba ikajojoongan nu aha mian haha itina'?” Tinaamannyo, “Aku mongka'oho' asan belento Tuan bajanji' hi belengku i uno nu sanggo nu Tumpu Allah, aku madi' opatei nu belento Tuan, kabai obee'mo hi tuanku.”

¹⁶Lantas ilaya'nyomo namba i tampat kajojoongan nu aha. Tempo'nyo aitu aha nobagi-bagimo i tampat kiijo', ka' lewa'mo nongkakaan ka' nonginum, lewa'mo nombau lamean kalana nanjoo'mo na anu pinahuhuakon mae nu aha, anu binoa mae nu aha lengkat ilipu' nu Filistin tiba Yehuda.

¹⁷Dodododopnyo salatan sinaa binete'mo aha tinumbuhanmo i Daud. Aha nahampate sampe inalom. Ola aha 400 na to oli-olitau anu nonsake'i unta na noko ala nopalai panyo anu sangga-sangga'atannyo pinateanmo madi'mo noko ala nopalai.

¹⁸Pinobebasmo i Daud iwi-iwi' na anu pinahuhuakonmo mae nu aha mian Amalek, tibamo bengkele'nyo ua-ua aha;

¹⁹mau pe'e sangahan na apa-apaa madi' ko anu naga'a. Iwi-iwi' na anak to momo'ane tiba boune ka' iwi-iwi' na anu pinahuhuakonmo mae nu aha mian Amalek po ule'mo ingala i Daud.

²⁰Ka' mule' i Daud suele nompahuhuakonmo iwi-iwi' na domba, ka' potuu'on nu aha. Binatang haha aijo' binoamo nu to sulu-suludadu i Daud namba momona, panyo balang sangga'at anu pinahuhuakon mae na binoaje nu mian sangga'at, ka' koonyo nu aha, “Aiya i Daudmo na tumpunyo!”

²¹Lapas aijo' i Daud ninsusule'mo hi aha anu ua atu na mian anu nalawemo hondo anu madi'mo noko ala nombatuki ia ka' anu pinala iannyomo i sohipi' nu Kaunyo Besor. Aha nolalabotmo i Daud tiba to sulu-suludadunyo, ka' i Daud nongohanimo aha ka' nonsalando'aimo aha.

²²Panyo aha to sulu-suludadu i Daud anu namba hingga-hinggat tiba ia, daagi ko anu ma'idek na kinyonyoanyo ka' mule' pangalu'. Aha notatae, “Mian haha aiya madi' namba nombatuki; jadi aha madi' ko hak mohumpak apa-apaana balang anu pinahuhuakon mae aijo'. Aha ola timbali mongala bengkele' tiba to ana-anak nu aha, lapas aijo' mambamo.”

²³Panyo tinaaman i Daud, “To utu-utusku, boli belemiu mombau sumo aijo' apaa na anu binee'mo nu Tumpu hi kita! Te misa' kita jinagaan-Nyomo ka' binee'an-Nyomo ka untungan nahampate nongewa aha anu saja' mombau anu ma'idek ka' anu lewa' montomang aijo'?

²⁴Jadi boli ko anu monsitujui tanga'an anu sumo aijo'! Iwi-iwi' tionyo ahi' mohumpak bagi pokakana na konjoo'nyo; mian anu jinojoong nonjagai balangto tionyo ahi' mohumpak bagi pokakana sumo mian anu namba nahampate.”

²⁵Lapas aijo' binauakonmo i Daud sa'angu' na atulannyo ka' saja'mo tinulutan nu aha Israel sangkut tempo uuka aiya.

²⁶Salatan i Daud ninsusule'mo i Ziklag, sambagian na balang haha aijo' pinakatunyomo ka' binagi-bagiakonnyomo hi to pola-polaya' i kota' Yehuda anu nonsangaja'imo ia, ia notatae, “Aiyamo na palasen toka hi belemiu, balang anu pinahuhuakon mami mae hi aha sampo bali' nu Tumpu.”

²⁷Kota haha aijo', aijo'mo Betel tiba Rama anu i sasu salatan Yehuda, Yatir, Aro'er, Sifmot, Estemoa, Rakhal, ka' suele to kota-kota' nu aha mian Yehrameel, to kota-kota' nu aha mian Keni, Horma, Bor-Asan, Atakh tiba Hebron. Iwi-iwi' na kota' anu toho'mo kinajojoongan i Daud tiba suludadunyo pinahapakatuannyo palasen aijo'.