Read Saluan 1 SAMUEL 4 Bible Online

1 SAMUEL 4 - Saluan bible

1 SAMUEL 4

¹Tempo'nyo aijo' aha mian Filistin nompalentahmo suludadu nu aha iwi-iwi' da montumbuhimo Israel; kalana aijo' suele suludadu nu Israel nambamo i tampat pahampaten, aha nombaumo kemah koko Eben-Haezer, ka' mule' suludadu nu aha Filistin suele nombaumo kemah i Afek.

²Suludadu nu aha Filistin nontumbuhimo, ka' salatan sinidamo hondo na nahampate suludadu nu Israel nahungku'mo ka' kila-kila opat na madala na mian nate i pahampatean aijo'.

³Salatan tuha' nu suludadu anu nahungku'mo ninsusule'mo i kemah nu aha, to pola-polaya' nu aha Israel notataemo, “Kadaka' Tumpu nompojohokmo kita da ihungku'anmo nu mian Filistin sinaa aiya? Imbo' da mamba o'alanto na Peti' Palajanjian nu Tumpu kiijo' mae i Silo, da oboantomo mae da nu tulungi nu Tumpu na kita ka' oposalamatmo na kita madi'mo nupatei nu sampo bali'.”

⁴ Lantas aha nonsaimo mian namba i Silo mongala Peti' Palajanjian nu Tumpu, anu salaku kajojoongan nu Tumpu Anu Daka' na kuasanyo. Anak i Eli ua-ua aha, i Hofni tiba i Pinehas na nontuntuni mae Peti' Palajanjian aijo'.

⁵Salatan Peti' Palajanjian aijo' tinokamo i kemah nu aha ingaisanmo nu aha daka-daka'nu aha mian Israel ka' i lame'mo sahingga tano' ginayu'anmo.

⁶Aha mian nu Filistin suele nohongomo aha lewa' noloais daka-daka' aijo' ka' ilame'mo aijo', lantas aha mian nu Filistin notataemo, “Kadaka' aha mian nu Ibrani haha kiijo' lewa'mo noloais ka' tahahumo i lame'?” Panyo salatan sinumbu'mo nu aha taalu' Peti' Palajanjian nu Tumpu tinokamo i kemah nu aha mian Ibrani,

⁷aha nabuhukmo ka' notataemo, “Daagi kopilogot tinokamo i kemah nu aha! Matemo na kita! Ma'isa kita toho' nongoa'i susumo aiya!

⁸Memang kita matemo! Ihe na moko ala momposalamat kita de kita mompaha bali'mo tiba pilogot haha kiijo' anu baani hondo? Temisa pilogotmo haha kiijo' na nompatei aha mian nu Mesir i padang bone'naipuan mae?

⁹Pa'baani ahi' na kinyonyoa nu belemiu mian Filistin! Pahampate ka' pimo'anemo de madi', belemiu nu botuanimo nu aha mian Ibrani haha aijo', susumo aha naipuan mae binotuananmo nu belemiu. Kalana aijo' pahampatemo totu-totu'u!”

¹⁰Lapas aijo' nahampatemo na aha mian Filistin, nahampate totu-totu'u ka nohungku'imo suludadu nu Israel. Mian nu Israel nompalentahmo suludadu nu aha da minsusule'mo i kemah nu aha toto samian. Talalomo hondo na aha nahungku aijo'; 30.000 na suludadu nu Israel sinilaka.

¹¹Peti' Palajanjian nu Tumpu Allah ingagoanmo nu sampo bali' nu aha Israel, ka' ua-ua aha na anak i Eli, i Hofni tiba i Pinehas sinilakamo.

¹²Samian na tulunan mae nu bansa Benyamin anu nahampate nopadeka'mo namba i Silo ka' sinaamo aijo' na ia tinoka ikiijo'. Salaku tanda ko anumo sinilaka binea-beaknyomo na baju'nyo ka' pino anuannyomo tano' na ubaknyo.

¹³I Eli anu talalomo hondo binata-bata na mompotutugakon kasalamatan nu Peti' Palajanjian nu Tumpu hau-haunyo suha-suhang i kadela anu kiijo' isohipi' nu jalan lewa' mompopikilakon. Salatan mian aijo' nonsisikmo lele, Israel nahungku'mo iwi-iwi' na anu jojoong i kota lewa'mo no haangi ka' nontando'i.

¹⁴Ihongo i Eli na tando aijo' lantas pinokilawanyomo, “Mosia ka' ihengge'mo na aha kiijo'?” Hau-haunyo aijo' mian anu u'uka nopadeka' mae nambamo hi Eli; salatan ia tinokamo ikiijo' pinoto'inyomo na lele anu ma'idek aijo'.

¹⁵Umun i Eli siompulu'mo ka' uwalu' na taun ka' mule' ia gio-giomo paha.

¹⁶Mian aijo' nompoto'imo hi Eli, “Aku nopadeka' mae sinaa aiya lengkat mae kiijo' nahampate ka' sala'je aku tinoka.” I Eli nompokilawamo hi ia, “Mosia na lelenyo nu anaku?”

¹⁷Anu nomboa mae lele aijo' nontaami, “Israel nopalaimo kalana nahungku'mo hi aha mian Filistin. Kita nahungku'mo totu-totu'u manjoo'mo na mian sinilaka, ka' suele ua-ua aha na anak nu belento Tuuma, i Hofni tiba i Pinehas. Ka' Peti' Palajanjian nu Tumpu Allah suele ingagoanmo nu aha sampo bali'!”

¹⁸Salatan pinoto'imo nu mian aijo' na Peti' Palajanjian aijo' i Eli tinombahangkangmo aijo' suha-suhang i kadelanyo anu aijo' sasu sabatan daka' nu kota'. Ia ilangkai'mo ka' nolompo'mo hondo sahingga salatan tinombahangkangmo aijo' gogohongnyo nopato'mo ka' sinilakamo na ia. Ia nompalentah Israel pinatompulu' na taun na kinopinnyo.

¹⁹Tempo'nyo aijo' monian i Eli aijo'mo bengkele' i Pinehas naboatmo na butong malia'mo hampe, ka' kahampeannyo aijo' memang malia'mo. Salatan ihongonyo na Peti' Palajanjian nu Tumpu Allah ingagoanmo ka' moniannyo i Eli tiba langkai'nyo i Pinehas sinilakamo monti-montiik ia nongka oa'imo lantas madi'pinin ihampemo.

²⁰Salatan ia ohanimo silaka to bou-boune anu nontulungi ia nompoto'imo, “Posanang na kinyonyoa! Anak nu beleyum aiya mo ane!” Panyo ia madi'mo nontaami ka nompalahatikan aha.

²¹Anak aijo sinanggohannyo, i Ikabod kalana koonyo, “Tumpu Allah Anu Daka' na kuasanyo madi'mo jinojoong hi aha mian Israel” — alati'nyo nu potatae aijo', mongkona Peti' Palajanjian ingagoanmo ka' mule' moniannyo tiba langkai'nyo sinilakamo. Kalana aijo' aha notataemo “Tumpu Allah Anu talasanggo madi'mo jinojoong hi aha mian Israel kalana Peti' Palajanjian nu Tumpu Allah ingagoanmo”.